اقش پرەزيدەنتى دونالد ترامپ اق ۇيدە اقش-قا ءۇش كۇندىك ساپارمەن كەلگەن فرانسيا پرەزيدەنتى ەممانۋەل ماكروندى قابىلدادى.  

ەممانۋەل ماكرون مەن جۇبايى بريجيت ماكرون ۆاشينگتونعا بارعان سوڭ ۇزاماي دونالد ترامپ پەن ونىڭ جۇبايى مەلانيا ترامپپەن بىرگە اق ءۇيدىڭ وڭتۇستىگىندەگى كوگالعا ەۋروپالىق ەمەن اعاشىن وتىرعىزدى. اعاش فرانسيانىڭ ءبىرىنشى دۇنيەجۇزىلىك سوعىس جىلدارىندا 9 مىڭنان استام امەريكالىق سارباز قازا تاپقان اۋدانىنان اكەلىنگەن.

سودان سوڭ پرەزيدەنتتەر جۇبايلارىمەن بىرگە ۆاشينگتوننىڭ تاريحي ورىندارىنىڭ ۇستىنەن تىكۇشاقپەن ەكسكۋرسيا جاسادى.

24 ساۋىردە ترامپ پەن ماكرون رەسمي كەلىسسوز وتكىزەدى. كەزدەسۋدە ماكرون ترامپتى يرانمەن جاسالعان يادرولىق كەلىسىمنەن شىقپاۋعا كوندىرۋگە تىرىسادى. يرانمەن ارادا 2015 جىلى جاسالعان كەلىسىمگە اقش، فرانسيا، ۇلىبريتانيا، گەرمانيا، رەسەي جانە جۇڭگو قول قويعان. كەلىسىمدە تەگەراننىڭ يادرولىق باعدارلاماسىن توقتاتىپ، ەسەسىنە يرانعا سالىنعان حالىقارالىق سانكسيالاردى جويۋ قاراستىرىلعان.

دونالد ترامپ بۇعان دەيىن ەگەر كەلىسىم وزگەرتىلمەسە، ۆاشينگتوننىڭ ودان شىعاتىنى تۋرالى بىرنەشە رەت ەسكەرتكەن. ءبىراق تەگەران اقش بىرنەشە ەل قاتىسقان كەلىسىمنەن شىقسا يران يادرولىق باعدارلاماسىن قايتا باستاۋى مۇمكىن ەكەنىن مالىمدەگەن.

فرانسيامەن قاتار گەرمانيا دا كەلىسىمدى بۇزباۋ كەرەگىن ايتقان. 23 ساۋىردە تورونتودا «ۇلكەن جەتىلىك» ەلدەرى سىرتقى ىستەر مينيسترلەرىنىڭ كەزدەسۋىندە سويلەگەن گەرمانيا سىرتقى ىستەر ءمينيسترى حايكو مااس تا كەلىسىمنەن شىقپاۋ قاجەتىن مالىمدەدى.

25 ساۋىردە ەممانۋەل ماكرون اقش كونگرەسىندە سويلەيدى.