الماتىدا يتتەر مەن مىسىقتاردى ۇستاۋ جانە سەرۋەندەتۋدىڭ جاڭا قاعيداسى بەكىتىلدى. ەندى كەز كەلگەن جەردە ءۇي جانۋارلارىن ەركىن الىپ جۇرۋگە بولمايدى. ەرەجەگە باعىنباعاندار جازاعا تارتىلىپ، ايىپپۇل تولەيدى. اتالمىش قۇجات «ءۇي جانۋارلارىنىڭ يگىلىگى 2017-2020» جول كارتاسى اياسىندا ازىرلەندى.

جاڭا قاعيداعا سايكەس، يتتەردىڭ بارلىق تۇقىمدارى باقىلاناتىن ۇزىندىققا دەيىن جۇرە الادى. ال 32 ءيتتىڭ تۇرىنە يەلەرىنىڭ ەرەكشە جاۋاپكەرشىلىگى جۇكتەلگەن. ەرەجەگە سايكەس، جانۋارلاردى ءۇي جاعدايىندا ۇستاعاندا تازالىق ساقتالماسا، ماسەلەن، شۋ مەن يىسكە كورشىلەردەن شاعىم تۇسسە - سوت ءتارتىبى ارقىلى جانۋارلارعا تىيىم سالىنۋى مۇمكىن.  يتتەردى سەرۋەندەتۋ ءۇشىن قارعىباۋ مەن تۇمىلدىرىق تاعىپ قويۋ مىندەتتى.

«يتتەردى سەرۋەندەتۋ جانە بۇزۋ ەرەجەسىن بۇزعاندارعا اكىمشىلىك قۇقىق بۇزۋ كودەكسىنىڭ 408-بابىنا سايكەس اكىمشىلىك جازا قولدانىلادى. ول بىرىنشىدەن، ەسكەرتۋ، ال ەكىنشى رەت بۇزسا 3 ايلىق اەك»، - دەدى  الماتى قالالىق اۋىلشارۋاشىلىعى جانە ۆەتەريناريا باسقارماسىنىڭ ءبولىم باسشىسى  نۇرلان ءتاشىموۆ.

نادەجدا كراسنوششەكوۆانىڭ بۋلتەرەر تۇقىمداس ەكى ءيتى بار. جانۋارلاردى جاقسى كورەتىن ول ءوزىنىڭ ماقۇلىقتارىن ادامعا زيانى جوق، بوتەنگە ءتىس باتىرمايدى دەيدى. يتتەرىنە تۇمىلدىرىق كيگىزگەندى ۇناتپايدى ەكەن. دەگەنمەن، ءتورت اياقتىنىڭ ءبارى بىردەي ءتىلالعىش ەمەس. جاڭا قاعيدا جالپى قوعام ءۇشىن ءتيىمدى، دەيدى نادەجدا.

«مەنىڭ ويىمشا، يتتەردىڭ تۇقىمى مەن ونىڭ كولەمىنە قاراماستان بارلىعىن ارنايى ورىنداردا جاتتىقتىرىپ، ۇيرەتۋ كەرەك. مەن ەكى ءيتىمدى سولاي تاربيەلەيمىن. ءيتتى بالالار جۇرەتىن ورىنداردى قارعىباۋمەن الىپ ءجۇرۋ دەگەن دۇرىس شىعار. جالپى ءوزىمنىڭ يتتەرىم ەشكىمدى قاپپايدى، سوندا دا ەرەجە بولعاندىقتان تۇمىلدىرىقتى ۇمىتپاي الىپ جۇرەمىز»، - دەدى نادەجدا كراسنوششەكوۆا.

جاڭا قاعيداعا سايكەس تىيىم سالىنعان بەلگىلەرى بار بالاباقشا مەن سپورت الاڭدارىندا، مەكتەپكە دەيىنگى جانە مەكتەپ مەكەمەلەرىندە، سونداي-اق مەديسينا ورىندارىندا يتتەردى سەرۋەندەتۋگە تىيىم سالىنادى. يەلەرى وزدەرىمەن بىرگە ارنايى پاكەتتەردى الىپ جۇرۋگە مىندەتتى.

جاڭا ەرەجەنىڭ تاعى ءبىر جاعى - جوعالعان جانۋارلاردى ءبىرىڭعاي ەسەپكە الۋدى جانە ىزدەۋدى جەڭىلدەتۋ ءۇشىن الماتى قالاسى اۋماعىنداعى بارلىق يتتەر مەن مىسىقتار ءبىرىڭعاي يدەنتيفيكاسيالىق دەرەكقوردا تىركەلەدى. ماسەلەن، ءقازىر قالادا رەسمي تىركەلگەن 127 مىڭ يت بولسا، بۇدان بولەك 120 مىڭداي قاڭعىباس يت بار، دەيدى ماماندار. بيلىك ءۇيسىز جانۋارلاردىڭ سانىن رەتتەۋ ماقساتىندا يتتەر مەن مىسىقتاردى باقىلاۋسىز وسىرۋگە جول بەرمەۋگە شاقىرادى. ەگەر ءۇي جانۋارىن يەسى ءارى قاراي اسىراۋعا جاعدايىڭىز بولماسا باسقا مەنشىك يەلەرىنە، مامانداندىرىلعان كاسىپورىنعا نەمەسە باسقا ۇيىمدارعا بەرۋگە مىندەتتى. بۇدان باسقا، قالا اۋماعىندا يتتەردىڭ جەكپە-جەكتەرىن وتكىزۋگە جول بەرىلمەيدى.