الماتى وبلىستىق №1 بالالار ۇيىندەگى تاربيەلەنۋشىلەرىنىڭ سانى جىل وتكەن سايىن ازايىپ جاتىر. وسىدان ەكى جىل بۇرىن بۇل جەردە 197 بالا بولسا، ءقازىر 122 بالا قالعان. باسشىلار بۇنىڭ سەبەبىن جەتىمدەردى اسىراپ الۋعا نيەتتى ادامدار سانىنىڭ ارتۋىمەن ءتۇسىندىردى. ءاربىر جەتىمدى اسىراپ العان ادامعا مەملەكەت قامقورلىق كورسەتىپ، اي سايىن اقشا ءبولىپ وتىرادى. ءبىراق ولاردىڭ الۋشىلاردىڭ اراسىندا بالانى قولعانات رەتىندە كورىپ، ءارى مەملەكەتتىڭ اقشاسىن الۋ ماقساتىندا پەندەلىككە باراتىنداردا بار كورىنەدى. تەك سوڭعى رەت اسىراپ الىنعان سەگىز بالانىڭ جاعدايى جاقسى بولماعان سوڭ كەرى قايتىپ كەلگەن.

«اتا-انالاردى شاقىرىپ، ەرىكتىلەردى دە شاقىرىپ، وسىندا ناۋرىز مەيرامىن وتكىزىپ جاتقان جايىمىز بار. قازىرگى تاڭدا ءبىزدىڭ بالالار ۇيىندە سەگىز ۇلتتىڭ وكىلى تاربيەلەنىپ جاتىر. ءبارىنىڭ جاعدايى جاقسى. بالالار ءۇيى قوعامعا تولىقتاي اشىق دەپ ايتا الامىن. ەشكىم كىرمەسىن، جوق دەگەن اڭگىمە جوق. بۇكىل رەسپۋبليكالىق بازا بار. بازادان بالانى كورۋگە بولادى. سول ارقىلى بىزگە كەلىپ، بالالاردى اسىراپ الۋعا بولادى»، - دەدى الماتى وبلىستىق №1 بالالار ءۇيىنىڭ ديرەكتورى گۇلميرا قوندىبايەۆا. 

باعاناشىلداعى بالالار ۇيىندە العاش رەت كيىز ءۇي تىگىلىپ، ءاز-نارۋىز كەڭ كولەمدە تويلاندى. «اتا-انانىڭ ىقىلاسىنا ءزارۋ، ۇلتتىق سالت-سانا، قازاقى داستۇردەن ادا قالىپ كەلگەن جەتكىنشەكتەرگە جاڭا جىل، ياعني نارۋىز مەرەكەسىنىڭ بەرەر تاربيەسى مول» - دەدى سالتاناتتى شاراعا كەلگەن قوناقتار.

«مۇندا ءبىزدى كيىز ءۇيدى تىگۋگە ۇيرەتەدى، نارۋىزدا قازاقتىڭ ۇلتتىق تاعامدارىن دايىنداۋعا ۇيرەتەدى. بۇل مەرەكەگە ءبىز كوپ ۋاقىت دايىندالدىق. كوستيۋم تىكتىك. كونسەرتتىك اندەر دايىندادىق»، - دەدى  الماتى وبلىستىق №1 بالالار ءۇيىنىڭ تاربيەلەنۋشىسى  ارتەم وسمانوۆ.