الماتىدا «كانيكۋل» جەدەل الدىن الۋ شاراسى بارىسىندا 400-دەن استام ءجاسوسپىرىم ۇستالدى.

الماتىدا «كانيكۋل» جەدەل الدىن الۋ شاراسى اياقتالدى. قالالىق پوليسەيلەر ەكى اپتا بويى تۇنگى ۋاقىتتا ويىن كلۋبتارى مەن ويىن-ساۋىق ورىندارىن تەكسەرىپ شىققان. وسى ۋاقىت ارالىعىندا ينسپەكتورلار اۋداندىق ىشكى ىستەر باسقارماسىنا ءار ءتۇرلى قۇقىقبۇزۋشىلىق ارەكەتى ءۇشىن 442 ءجاسوسپىرىمدى جەتكىزگەن.

بۇل كامەلەت جاسىنا تولماعان جەتكىنشەكتەر دوستارىنىڭ تۋعان كۇنىن اتاپ ءوتۋ ءۇشىن جينالىپتى. ءتۇرلى سۋسىنداردان بولەك، داستارحاندا ىشىمدىك تە قويىلعان. باس قوسقانداردىڭ اراسىندا جەتەۋىنىڭ جاسى 18-گە تولماعان بولىپ شىقتى. ال ءدامحانا اكىمشىسى ادەتتەگىدەي ودان بەيحابارمىن دەپ باسىن الىپ قاشتى.

«مەن بىلگەن جوقپىن. قۇجاتتارىن تەكسەرمەدىك. ولار كەشكى ساعات 9-دا كەلدى. بىزدەن تەك ءتورت سۋسىن الدى. مەن نەگە تاپسىرىس بەرگەندەرىن كورسەتە الامىن. ال اراقتى قالاي الىپ كىرگەندەرىن بىلمەيمىن»، - دەدى  ءدامحانا اكىمشىسى زارينا مۇسايەۆا.

ينسپەكتورلار جاسوسپىرىمدەردى تۇركسىب اۋدانىنىڭ ىشكى ىستەر باسقارماسىنا جەتكىزدى. كەيىننەن الكوتەستەرمەن تەكسەرىلگەن سوڭ، اتا-اناسى شاقىرتىلىپ، ۇيىنە جىبەرىلدى. ولارعا 7 مىڭ تەڭگەدەن اسا ايىپپۇل سالىندى. ودان بولەك، ءدامحانا يەسى دە اكىمشىلىك جاۋاپكەرشىلىككە تارتىلماق. وسىعان بايلانىستى ءىس كامەلەتكە تولماعاندار ىستەرى جونىندەگى مامانداندىرىلعان اۋدانارلىق سوتىنا جولدانادى.

ءتارتىپ ساقشىلارى كومپيۋتەر كلۋبتارىن دا تەكسەردى. تۇنگى ساعات ءبىر بولعانىنا قاراماستان، ينسپەكتورلار ويىن زالىندا 13 جاسار جەتكىنشەكتى كەزدەستىردى. ونى مۇندا اعالارى ەرتىپ اكەلگەن. ال جەتكىنشەكتىڭ ءوزى الماتىعا تۇركىستاننان اپاسىمەن ەرىپ كەلگەن.

اپاسى سەنىمحاتتى كورسەتكەن سوڭ، ينسپەكتورلار بالانى قولىنا تاپسىردى. دەگەنمەن، ايىپپۇل سالىندى. ال ماتەريال يۋۆەنالدى سوتقا جولداندى. كومپيۋتەر كلۋب باسشىلىعى دا جاۋاپكەرشىلىككە تارتىلادى.

پوليسەيلەر تۇرمىس جاعدايى تومەن وتباسىلاردى دا ارالادى. «جۇلدىز-1» ىقشاماۋدانىنداعى 5 قاباتتى پاتەرگە باس سۇقتى. 

بۇل ۇيدە ءۇش بالالى وتباسى كۇن كەشەدى ەكەن. سونىڭ ءبىرى 11 جاستاعى جەتكىنشەك ساباقتى ءجيى قالدىراتىن بولىپ شىقتى.

«قولايسىز وتباسىعا بايلانىستى بارلىق جاداعاتتار تۇركسىب اۋداندىق بالالار قۇقىعىن قورعاۋ كوميسسياعا جىبەرىلدى. الداعى ۋاقىتتا ءبىز جۇمىس جاسايمىز جانە وسى ۋاقىتقا دەيىن بىرنەشە پروفيلاكتيكالىق شارا جۇرگىزىلىپ وتىر. ءۇش بالاعا قاتىستى، ەندى، كەلەسىدە بالانىڭ وقۋ ورنى جانە تۇرعىلىقتى ورنىن انىقتايتىن بولامىز»، - دەدى الماتى قالاسى تۇركسىب اۋداندىق ءىىب اعا لەيتەنانتى ايجان قاناتوۆا.

دونەنتايەۆ كوشەسىندەگى 4 ادام تۇراتىن قۋىقتاي ءۇيدىڭ ءىشى ادام كورگىسىز. ءتىپتى ولاردىڭ ءبارى مۇنداي جاعدايعا اششى سۋدىڭ سالدارىنان تاپ بولعانىن جاسىرمايدى. 32 جاستاعى ەكى بالانىڭ اناسى وتباسىنى قامتۋ ءۇشىن كولىك جۋاتىن جەردە جۇمىس ىستەيمىن دەيدى.

كەزەكتى تۇنگى رەيد بارىسىندا اۋداندىق پوليسيا باسقارمالارىنا اتا-انانىڭ قاراۋىنسىز بەيساۋات جۇرگەن 70 ءجاسوسپىرىم ءتۇستى.