الماتىداعى ىقىلاس اتىنداعى مۇراجايعا قۇرمانعازى دومبىراسىنىڭ كوشىرمەسى قويىلدى.

الماتىداعى ىقىلاس اتىنداعى حالىق مۋزىكالىق اسپاپتار مۇراجايى جاڭا جادىگەرمەن تولىقتى. بۇگىن قازاقتىڭ ۇلى كۇيشى-كومپوزيتورى، اسپاپتى مۋزىكا ونەرىنىڭ كلاسسيگى قۇرمانعازى دومبىراسىنىڭ كوشىرمەسى مۇراجايعا قويىلدى. سونىمەن قاتار، كۇيشىنىڭ ءتول شاكىرتى ەرعالي ەسجانوۆتىڭ دا دومبىراسى رەسمي تۇردە تابىستالدى.

ءدۇلدۇل دومبىراشىنىڭ دارا اۋىز مىلتىعىن مۇراجايعا تابىستاۋ كۇي كەشىمەن باستالدى. وندا «قۇرمانعازى اتىنداعى اكادەميالىق حالىق اسپاپتار» وركەسترىنىڭ دومبىراشىلار قۇرامى جانە باسقا دا كۇيشىلەر ونەر كورسەتتى. كۇيشىنىڭ شىعارمالارى ورىندالىپ، ونەرپازدار ساحنادا ءان شىرقادى.

قۇرمانعازى ساعىرباي ۇلىنىڭ 200 جىلدىق مەرەيتويى حالىقارالىق يۋنەسكو اياسىندا كەڭىنەن تويلانىپ جاتىر. كيەلى دومبىرانىڭ كوشىرمەسى استراحان وبلىسى التىنجار اۋىلىنداعى قۇرمانعازى اتىنداعى مادەني ورتالىق قورىندا ساقتالىپ كەلگەن. بۇگىن كۇيشى-كومپوزيتوردىڭ اسپابىمەن بىرگە ءتول شاكىرتىنىڭ دە دومبىراسى مۇراجايعا تابىستالدى.

سونىمەن قاتار، دينا نۇرپەيىسوۆانىڭ كامزولى، 19-شى عاسىردا كيگەن شاپانى مەن زەرگەرلىك بۇيىمدارى كورمەگە قويىلدى. كەش «رۋحاني جاڭعىرۋ» باعدارلاماسى اياسىندا ۇيىمداستىرىلعان.

الماتىداعى ىقىلاس اتىنداعى حالىق مۋزىكالىق اسپاپتار مۇراجايىندا ماحامبەت، ءبىرجان سال، سۇگىر، ەسباي، قازانعاپ، جامبىل، اباي سىندى ۇلى تۇلعالاردىڭ دومبىرالارى بار. سوڭعى ەكى جىلدا مۇراجايعا 100-گە جۋىق مەموريالدى ەكسپوناتتار الىنىپتى. ونىڭ ىشىندەگى ەڭ قۇندىسى اقان سەرى مەن قۇرمانعازىنىڭ دومبىرالارى ەكەن.