اعىمداعى وقۋ جىلىندا جاڭارتىلعان ءبىلىم بەرۋ مازمۇنى بويىنشا 1، 2، 5 جانە 7 سىنىپ وقۋشىلارى ءبىلىم الۋدا.

بۇگىن الماتى قالاسىنىڭ وڭىرلىك كوممۋنيكاسيالار قىزمەتى الاڭىندا قازاقستان رەسپۋبليكاسىنىڭ ءبىلىم جانە عىلىم مينيسترلىگى «وقۋلىق» رەسپۋبليكالىق عىلىمي-پراكتيكالىق ورتالىعىنىڭ ديرەكتورى بەيبىتكۇل سارسەمحان قىزىنىڭ قاتىسۋىمەن بريفينگ ءوتتى.

بەيبىتكۇل كارىموۆانىڭ ايتۋىنشا، وزدەرىڭىزگە بەلگىلى، اعىمداعى وقۋ جىلىندا جاڭارتىلعان ءبىلىم بەرۋ مازمۇنى بويىنشا 1، 2، 5 جانە 7 سىنىپ وقۋشىلارى ءبىلىم الۋدا.

بۇگىن سىزدەرمەن كەزدەسۋىمىزدىڭ باستى تاقىرىبى جاڭارتىلعان ءبىلىم بەرۋ مازمۇنىنا كوشۋدىڭ كەلەسى كەزەڭى – جاڭا وقۋ جىلىندا ەندىرىلەتىن 3، 6 جانە 8 سىنىپ وقۋلىقتارىن دايىنداۋ بارىسى.

الدىمەن  وسى وقۋلىقتاردىڭ ساپاسىن باعالاۋ جۇيەسىندەگى جاڭالىقتارعا قىسقاشا توقتالاتىن بولساق 2017 جىلدىڭ جەلتوقسان ايىندا «وقۋلىقتاردى، وقۋ-ادىستەمەلىك كەشەندەر مەن وقۋ-ادىستەمەلىك قۇرالداردى ازىرلەۋ، ساراپتاما جۇرگىزۋ، ولاردى باسىپ شىعارۋ جونىندەگى جۇمىستى ۇيىمداستىرۋ قاعيداسىنا» وزگەرىستەر ەنگىزىلدى،-دەيدى ول.

وسى قۇجاتتاعى باستى وزگەرىستەر:

- ورتا مەكتەپكە ارنالعان وقۋ ادەبيەتتەرىنىڭ اۆتورلىق ۇجىمىنا تالاپ كۇشەيتىلدى. قازىرگى كەزدە اۆتورلىق ۇجىم قۇرامىندا عالىم، ادىسكەر جانە ءمۇعالىم بولۋى كەرەك؛

- ءاربىر ءتورت جىلدا وقۋ باسىلىمدارىن قايتا وڭدەۋ تۋرالى قاعيدا الىنىپ تاستالدى. اۆتورلىق ۇجىم وقۋ ادەبيەتتەرىن ءبىلىم بەرۋ ستاندارتتارىنا، ۇلگىلىك وقۋ باعدارلامالارىنا ەلەۋلى وزگەرىستەر ەنگىزگەن جاعدايدى، ونىڭ ساپاسىنىڭ مونيتورينگى ناتيجەلەرىن ەسكەرە وتىرىپ قانا وڭدەيدى؛

- نەگىزگى ورتا جانە جالپى ورتا ءبىلىم دەڭگەيلەرىنە ارنالعان وقۋلىقتاردى سىناقتان وتكىزۋ نورماسى بەكىتىلدى؛

- پاندىك كوميسسيالار وقۋلىقتاردىڭ جانە وقۋ-ادىستەمەلىك كەشەندەردىڭ ساراپتاما، سىناق، وقۋلىقتار ساپاسىن قوعامدىق باعالاۋدىڭ ارالىق جانە سوڭعى قورىتىندىلارىن قاراستىرادى. 3، 6 جانە 8 سىنىپتارعا ارنالعان وقۋلىقتار مەن وقۋ-ادىستەمەلىك كەشەندەر پاندىك كوميسسيالاردىڭ 2 وتىرىسىندا قاراستىرىلدى،-دەپ اتاپ ءوتتى ول.

سونىمەن قاتار بۇل وقۋلىقتار رەسپۋبليكامىزدىڭ بارلىق وڭىرلەرىندە وقۋلىق اۆتورلارىنىڭ قاتىسۋىمەن ارنايى سەمينارلاردا تالقىلاندى. بۇل سەمينارلاردا اۆتورلار ءوز وقۋلىقتارىنىڭ تۇجىرىمداماسىمەن، قۇرىلىمى جانە مازمۇنىمەن مەكتەپ مۇعالىمدەرىن، ادىستەمەلىك ورتالىقتاردىڭ ادىسكەرلەرىن تانىستىردى. تالقىلاۋلار، پىكىر الماسۋلار ۇيىمداستىرىلدى. بۇل شاراعا 160 وقۋلىق اۆتورلارى مەن 7000-نان اسا مۇعالىمدەر قاتىستى.

وسى وقۋلىقتار بويىنشا «وقۋلىق ساپاسىن باعالاۋ» پورتالىنا دا سىن-پىكىرلەر ءتۇستى،-دەپ باياندادى بەيبىتكۇل سارسەمحان قىزى.

بەيبىتكۇل سارسەمحان قىزىنىڭ اقپاراتىنشا، وقىتۋ پروسەسىنە ەنگىزىلەتىن وقۋلىقتاردى ىرىكتەۋدەگى شەشۋشى ءىس-شارا - پاندىك جانە رەسپۋبليكالىق كوميسسيالاردىڭ وتىرىستارى بولدى. بۇل كوميسسيالار قازاق جانە ورىس تىلىندە وقىتاتىن مەكتەپتەرگە ارنالعان 186 وقۋلىقتاردى قاراستىرىپ، 138ء-ىن مەكتەپتەردە قولدانۋعا ۇسىندى.

ءبىلىم جانە عىلىم ءمينيستىرىنىڭ بۇيرىعىمەن مەكتەپكە دەيىنگى جانە ورتا ءبىلىم وقۋلىقتارى مەن وقۋ-ادىستەمەلىك كەشەندەرىن باسىپ شىعارۋعا دايىنداۋدى ۇيلەستىرۋ جونىندەگى جۇمىس توبى قۇرىلعان بولاتىن. جۇمىس توبى قۇرامىندا 15 جۋرناليست پەن باسپا ءسوز وكىلدەرى، 17 لينگۆيست-عالىمدار (احمەت بايتۇرسىن ۇلى اتىنداعى ءتىل ءبىلىمى ينستيتۋتى ماماندارى)، پاندەر بويىنشا 75 مامان (23 عالىم، 44 مەكتەپ مۇعالىمدەرى، 8 ادىسكەر) بولدى،-دەپ اتاپ ءوتتى ول.

جۇمىس توبى 2018 جىلدىڭ 9-26 ءساۋىر ارالىعىندا 3، 6 جانە 8 سىنىپتارعا ارنالعان وقۋلىقتار مەن وقۋ-ادىستەمەلىك كەشەندەرگە، مەكتەپكە دەيىنگى تاربيە مەن وقىتۋعا ارنالعان وقۋ ادەبيەتتەرىنە باسپا الدى پىسىقتاۋ جۇمىستارىن جۇرگىزدى.

ءار ءپان ماماندارى پاندىك جانە رەسپۋبليكالىق كوميسسيالار بەرگەن ەسكەرتۋلەر مەن ۇسىنىستار بويىنشا جۇمىستار جۇرگىزدى. جۇمىس بارىسىندا وقۋلىقتارداعى مالىمەتتەر ناقتىلانىپ، تاپسىرمالارعا، يلليۋستاسيالارعا، انىقتامالارعا  جانە كوركەم شىعارمالاردىڭ ۇزىندىلەرىنە قاتىستى ۇسىنىستار جاسالدى. ۇسىنىستار مەن ەسكەرتۋلەر بىردەن اۆتورلارمەن كەلىسە وتىرىپ وڭدەلدى. باسپا ءسوز وكىلدەرى وقۋلىقتارداعى بارلىق ماتىندەردىڭ الەۋمەتتىك قابىلداۋىنا قاتىستى مۇقيات قاراپ شىقتى. ءتىل بىلىمىنە قاتىستى ماماندار وقۋلىقتارداعى تەرميندەردىڭ اۋدارماسىن جانە سوزدەردىڭ جازىلۋىن ءبىر ىزگە ءتۇسىردى. وسى اتقارىلعان جۇمىستار وقۋلىقتاردىڭ ساپاسىن جاقسارتۋعا ەلەۋلى ۇلەسىن تيگىزدى دەپ سەنەمىز.

ءار ءپان بويىنشا اتقارىلعان ناقتى جۇمىستار تۋرالى جۇمىس توبىنىڭ مۇشەلەرى تولىعىراق ايتىپ بەرەدى،-دەپ ءسوزىن قورىتىندىلادى بەيبىتكۇل سارسەمحان قىزى.