ءال-فارابي اتىنداعى قازۇۋ-دا 4-15 ءساۋىر ارالىعىندا وتكەن ءداستۇرلى V حالىقارالىق فارابي وقۋلارىنىڭ قورىتىندى جينالىسى ءوتتى.
قازۇۋ رەكتورى عالىم مۇتانوۆتىڭ باستاماسىمەن قاتارىنان بەسىنشى جىل وتكىزىلىپ وتىرعان فارابي وقۋلارى ەلباسى نۇرسۇلتان نازاربايەۆتىڭ «بولاشاققا باعدار:رۋحاني جاڭعىرۋ» باعدارلامالىق ماقالاسى اياسىندا ءوتتى. كونفەرەنسيا اتاقتى ويشىل، الەمنىڭ ەكىنشى ۇستازى اتانعان ءال-فارابيدىڭ فيلوسوفيالىق وي-پىكىرلەرىن، جازعان كىتاپتارىن، باي مۇراسىن جان-جاقتى زەردەلەۋگە باعىتتالعان. ەرەكشە ايتا كەتەرلىگى، فارابي وقۋلارىنىڭ اۋقىمدىلىعى جىل وتكەن سايىن كەڭەيىپ، شاراعا شەتەلدىكتەردىڭ قىزىعۋشىلىعى ارتىپ كەلەدى. بيىل فورۋمنىڭ اشىلۋ سالتاناتىنا الەمنىڭ 30-دان استام ەلىنەن شەتەلدىك عالىمدار كەلدى، سونىمەن قاتار ەلىمىزدىڭ جوو-لارى مەن عىلىمي مەكەمەلەرىنىڭ وكىلدەرى قاتىستى.
قازۇۋ رەكتورى عالىم مۇتانوۆ: «بۇگىنگى تەحنيكا مەن تەحنولوگيا قارىشتاپ دامىعان زاماندا ءال-فارابي مۇراسى ەرەكشە قۇندىلىعىمەن ادامزاتقا اسەر ەتۋدە. ويتكەنى تەحنيكا ادامدارعا كەرەمەت مۇمكىندىكتەردى اشقانمەن، زيانىن دا اكەلۋى مۇمكىن. سوندىقتان سانا مەن رۋحانياتى تەپە-تەڭدىكتە ۇستاي ءبىلۋ وتە ماڭىزدى. وسى تۇرعىدان كەلگەندە ءال-فارابي بارشا ادامزاتقا سانانىڭ ەڭ بيىك قوزعاۋشى كۇشى رۋحانيات پەن ادامگەرشىلىك بولۋى كەرەكتىگىن، ولاي بولماعان كۇندە الەم جاھاندىق اپاتقا ۇشىراپ، بار قۇندىلىعىمىزدان ايىرىلىپ قالۋىمىز مۇمكىن ەكەندىگىن ايتقان ەكەن. دەمەك، ءال-فارابي مۇراسى جاس ۇرپاقتى ءبىلىم مەن ادامگەرشىلىك ۇعىمىن قاتار الىپ جۇرۋگە شاقىرادى»، – دەپ اتاپ ءوتتى.
حالىقارالىق فورۋم اياسىندا 17 ءىرى حالىقارالىق شارالار، عىلىمي كونفەرەنسيالار مەن دوڭگەلەك ۇستەلدەر، سەمينارلار مەن يننوۆاسيالىق جوبالاردىڭ بايقاۋى ءوتتى. قورىتىندى جينالىستا ستۋدەنتتەر مەن جاس عالىمدارعا ارنالعان «فارابي الەمى» اتتى حالىقارالىق عىلىمي كونفەرەنسيا تۋرالى عىلىم جانە يننوۆاسيالىق قىزمەت جونىندەگى دەپارتامەنت ديرەكتورى سەرىك مۇحامبەتجانوۆ بايانداما جاسادى. ءداستۇرلى تۇردە جىل سايىن ءوتىپ كەلە جاتقان ستۋدەنتتەر مەن جاس عالىمداردىڭ «فارابي الەمى» اتتى حالىقارالىق كونفەرەنسياسىنا 6325-گە جۋىق ستۋدەنتتەر مەن جاس عالىمدار قاتىسقان. ولاردىڭ ىشىندە 583 قاتىسۋشى ەلىمىزدىڭ جوو-لارىنان بولسا، 301 قاتىسۋشى الىس-جاقىن شەتەلدەردەن كەلگەن، اتاپ ايتار بولساق، نيدەرلاندى، اقش، كورەيا، جۇڭگو، رەسەي، ت.ب.
«فارابي الەمى» اياسىندا فاكۋلتەتتەردە 117 سەكسيا جۇمىس جاساپ، 191-گە جۋىق دوڭگەلەك ۇستەلدەر مەن عىلىمي سەمينارلار ءوتتى. ال جاس عالىمدار بايقاۋىنا 72 يننوۆاسيالىق جوبا ۇسىنىلىپ، جۇزدەن جۇيرىك مىڭنان تۇلپار شىققان جەڭىمپازدار ديپلوم جانە اقشالاي سىيلىقتارمەن ماراپاتتالدى. سولاردىڭ ىشىندە ەرەكشە اتاپ وتەتىن يننوۆاسيالىق جوبا – مەحانيكا-ماتەماتيكا فاكۋلتەتى ستۋدەنتتەرى قۇراستىرعان «گۋمانويد-روبوت»، ياعني امبەباپ روبوت كوپشىلىكتىڭ قىزىعۋشىلىعىن تۋعىزدى. ادامعا ءتان ءىس-قيمىلداردىڭ بارلىعىن جاساي الاتىن «گۋمونويد-روبوت» بولاشاقتا قازۇۋ-دىڭ «كەرەمەت» ستۋدەنتتەرگە قىزمەت كورسەتۋ ورتالىعىندا قىزمەتكەرلەرمەن بىرگە ستۋدەنتتەردىڭ سۇراقتارىنا جاۋاپ بەرەتىن بولادى.
سونداي-اق جيىندا V حالىقارالىق فارابي وقۋلارى بويىنشا ەسەپ بەرگەن فاكۋلتەت دەكاندارى مەن جاۋاپتى تۇلعالاردىڭ باياندامالارى تىڭدالدى.
فارابي وقۋلارى اياسىندا وتكەن ءىرى شارالاردىڭ ءبىرى – وڭتۇستىكتە تۇراقتى دامۋ ءۇشىن عىلىم مەن تەحنولوگيا بويىنشا كوميسسياسىنىڭ («COMSATS») XXIء-شى وتىرىسى. اتالمىش حالىقارالىق ۇكىمەتارالىق ۇيىم كەڭەسىنىڭ وتىرىسى قازاقستاندا جانە پوستكەڭەستىك كەڭىستىكتە العاش رەت وتكىزىلدى. قازۇۋ 2015 جىلدان بەرى اتالمىش حالىقارالىق ۇيىمنىڭ تمد-داعى جالعىز مۇشەسى بولىپ تابىلادى.
ۇلى ويشىلدىڭ 1150 جىلدىق مەرەيتويىن 2020 جىلى يۋنەسكو دەڭگەيىندە اتاپ ءوتۋدى ماقسات ەتىپ وتىرعان قازۇۋ ءال-فارابي مۇراسىن زەرتتەۋ بويىنشا فارابي وقۋلارى اتتى اسا اۋقىمدى شارانى اتقارىپ وتىر. ودان بولەك عالىمنىڭ كىتاپتارى جارىق كورىپ، مۇراجاي اشىلدى، سونداي-اق «Al-Farabi university smart sity» جوباسى جۇزەگە اسىرىلۋدا. الەمنىڭ ەكىنشى ۇستازى اتانعان دارا دا دانا تۇلعا ءال-فارابي مۇراسى جىلدار جىلجىپ، زامان قانشا وزگەرىسكە ۇشىراسا دا ءوزىنىڭ وزەكتىلىگىن ەشقاشان جوعالپاق ەمەس.
