2026 جىلعى 1–16 ءساۋىر ارالىعىندا حالىقارالىق ءبىلىم بەرۋ كورپوراسياسىندا (قازاق باس ساۋلەت-قۇرىلىس اكادەمياسى) «12 ءساۋىر – عىلىم كۇنىنە» جانە وقۋ ورنىنىڭ 45 جىلدىق مەرەيتويىنا وراي «عىلىم دەكاداسى – 2026»اۋقىمدى ءىس-شارالار جوباسى جۇزەگە اسىرىلۋدا.

بۇل باستاما – اكادەميالىق قاۋىمداستىقتىڭ عىلىمي الەۋەتىن كۇشەيتۋگە، جاس زەرتتەۋشىلەردى عىلىمعا تارتۋعا جانە ءبىلىم بەرۋ مەن عىلىم ينتەگراسياسىن تەرەڭدەتۋگە باعىتتالعان ماڭىزدى ينستيتۋسيونالدىق قادام. دەكادانىڭ باستى ماقساتى – پروفەسسور-وقىتۋشىلار قۇرامىنىڭ، ستۋدەنتتەر مەن جاس عالىمداردىڭ عىلىمي بەلسەندىلىگىن ارتتىرۋ، عىلىمدى كەڭىنەن ناسيحاتتاۋ جانە عىلىمي ىنتىماقتاستىقتى دامىتۋ.

عىلىم دەكاداسىنىڭ اشىلۋى 1 ءساۋىر كۇنى جوعارى دەڭگەيدە ءوتىپ، ول بىردەن بىرنەشە مازمۇندى ءىس-شارالاردى قامتىدى. اتاپ ايتقاندا، زەرتحانالاردىڭ اشىق ەسىك كۇنى، عىلىمي جەتىستىكتەر كورمەسى جانە «الماتى تۇراقتى دامۋ جاعدايىندا: ەكولوگيالىق، ينفراقۇرىلىمدىق جانە الەۋمەتتىك-ەكونوميكالىق سىن-قاتەرلەر» تاقىرىبىنداعى دوڭگەلەك ۇستەل ۇيىمداستىرىلدى. بۇل الاڭدا قالا دامۋىنىڭ وزەكتى ماسەلەلەرى تالقىلانىپ، عىلىمي قاۋىمداستىق پەن پراكتيك-ماماندار اراسىنداعى ديالوگ نىعايا ءتۇستى.

دەكادا باعدارلاماسى قاتىسۋشىلارعا عىلىمي قىزمەتتىڭ بارلىق كەزەڭدەرىن قامتيتىن كەشەندى ءبىلىم بەرۋ الاڭىن ۇسىنۋدا. ونىڭ ىشىندە «عىلىمي ماقالانى جاريالاۋ: قۇرىلىمنان باستاپ جۋرنال تاڭداۋعا دەيىن» تاقىرىبىنداعى ماستەر-كلاسستار جاس زەرتتەۋشىلەرگە عىلىمي جاريالانىم مادەنيەتىن مەڭگەرۋگە مۇمكىندىك بەرسە، ستۋدەنتتىك «Structural Stability Challenge» ۆوركشوپى ينجەنەرلىك ويلاۋ مەن پراكتيكالىق داعدىلاردى دامىتۋعا باعىتتالدى.

سونىمەن قاتار، «جاستار جانە عىلىم: العاشقى زەرتتەۋلەردەن كاسىبي دامۋعا دەيىن» اتتى پانەلدىك سەسسيا جاس عالىمداردىڭ كاسىبي قالىپتاسۋ تراەكتورياسىن تالقىلاۋعا ارنالعان ماڭىزدى پىكىرتالاس الاڭىنا اينالدى. بەلگىلى ساراپشىلاردىڭ قاتىسۋىمەن وتكەن «زاماناۋي ارحيتەكتۋرا: شەكسىز مۇمكىندىكتەر» ماستەر-كلاسسى دا قاتىسۋشىلاردىڭ ەرەكشە قىزىعۋشىلىعىن تۋدىردى.

عىلىم دەكاداسىنىڭ نەگىزگى وقيعالارىنىڭ ءبىرى – 6-7 ءساۋىر كۇندەرى وتكەن XXVI رەسپۋبليكالىق ستۋدەنتتىك عىلىمي كونفەرەنسيا. بۇل الاڭ ستۋدەنتتەردىڭ عىلىمي ناتيجەلەرىن جاريالاپ، تاجىريبە الماسۋىنا كەڭ مۇمكىندىك بەرەءدى. سونىمەن قاتار، «KazGASA Research Vision» پوستەرلىك باياندامالار بايقاۋى، «SCIENCE4ENERGY Hack» حاكاتونى، 17 ءپان بويىنشا وتەتىن رەسپۋبليكالىق پاندىك وليمپيادالار جانە 3 ءبىلىم بەرۋ باعدارلاماسى بويىنشا وتەتىن ستۋدەنتتەردىڭ رەسپۋبليكالىق عىلىمي-زەرتتەۋ جۇمىستارىنىڭ كونكۋرسى سياقتى ءىس-شارالار جاس زەرتتەۋشىلەردىڭ شىعارماشىلىق جانە عىلىمي الەۋەتىن اشۋعا ىقپال ەتەدءى.

دەكادا باعدارلاماسىندا الەۋمەتتىك ماڭىزى جوعارى تاقىرىپتار دا قامتىلعان. سونىڭ ءبىرى – ستۋدەنتتەردىڭ «جاستار اراسىندا تاۋەلدى مىنەز-قۇلىقتىڭ قالىپتاسۋىنا الەۋمەتتىك جەلىلەردىڭ اسەرى» تاقىرىبىنداعى زەرتتەۋلەرى. بۇل باعىتتاعى جۇمىستار قازىرگى قوعامداعى وزەكتى ماسەلەلەردى عىلىمي تۇرعىدان زەردەلەۋگە باعىتتالعان.

عىلىم دەكاداسىنىڭ ماڭىزدى باعىتتارىنىڭ ءبىرى – عىلىمي ناتيجەلەردى كوممەرسيالاندىرۋ. وسىعان بايلانىستى «عىلىمي ازىرلەمەلەردى كوممەرسيالاندىرۋ جانە عىلىمي-زەرتتەۋ جۇمىستارىنىڭ ناتيجەلەرىن ەنگىزۋ» تاقىرىبىندا ارنايى ماستەر-كلاسس جوسپارلانىپ، عىلىمي جوبالاردى ناقتى ەكونوميكالىق ناتيجەلەرگە اينالدىرۋ جولدارى تالقىلاناتىن بولادى.

عىلىم دەكاداسى 16 ءساۋىر كۇنى قورىتىندىلانىپ، ۇزدىك عىلىمي جۇمىستار مەن بەلسەندى قاتىسۋشىلار ارنايى ماراپاتتارعا يە بولادى.

ايتا كەتۋ كەرەك، بارلىق ءىس-شارالار حالىقارالىق ءبىلىم بەرۋ كورپوراسياسىنىڭ الاڭدارىندا ءوتىپ، وعان وقىتۋشىلار، ستۋدەنتتەر، جاس عالىمدارمەن قاتار، وتاندىق جانە شەتەلدىك ساراپشىلار، سەرىكتەس ۇيىمداردىڭ وكىلدەرى قاتىسۋدا.

«عىلىم دەكاداسى – 2026» تەك ءىس-شارالار جيىنتىعى عانا ەمەس، ول – عىلىم، ءبىلىم جانە يننوۆاسيا توعىسقان، جاڭا يدەيالار تۋىندايتىن، جاس زەرتتەۋشىلەردىڭ كاسىبي قالىپتاسۋىنا سەرپىن بەرەتىن ستراتەگيالىق الاڭ.

حالىقارالىق ءبىلىم بەرۋ كورپوراسياسىنىڭ عىلىم جانە يننوۆاسيالار دەپارتامەنتىنىڭ ديرەكتورى، PhD، قاۋىمداستىرىلعان پروفەسسور لايسحانوۆ شاحيسلام ۇزاقباي ۇلى