يلون ماسكتىڭ ەكس-قالىڭدىعى ياعني ءبىر ۇلىنىڭ اناسى ەشلي سەنت-كلەر ماسكقا تيەسىلى xAI كومپانياسىن سوتقا بەردى. ول Grok جاساندى ينتەللەكتى ءوزىنىڭ رۇقساتىنسىز جىنىستىق سيپاتتاعى جالعان (deepfake) سۋرەتتەر جاساعانىن مالىمدەدى. تالاپ ارىز نيۋ-يورك شتاتىنىڭ جوعارعى سوتىنا بەرىلگەن.
27 جاستاعى سەنت-كلەردىڭ ايتۋىنشا، Grok ناقتى ادامدارعا قاتىستى ادەپسىز بەينەلەر جاساماۋعا ۋادە بەرگەنىنە قاراماستان، ونىڭ اتىنا ونداعان قورلايتىن جانە زاڭعا قايشى سۋرەتتەر تاراتىلعان. كەيبىر ماتەريالداردا ول كامەلەتكە تولماعان كەيىپتە كورسەتىلگەن دەپ ايتىلادى.
سەنت-كلەر — وڭشىل كوزقاراستاعى ساياسي كوممەنتاتور جانە جازۋشى. ول ماسكپەن اراداعى قارىم-قاتىناسى ۇزىلگەنىن، ەكەۋىنىڭ 2024 جىلى دۇنيەگە كەلگەن ورتاق بالاسى بار ەكەنىن راستادى.
ونى تەحنولوگيالىق كومپانيالاردان زارداپ شەككەن ادامداردىڭ قۇقىعىن قورعاۋمەن اينالىساتىن ادۆوكات كەرري گولدبەرگ قورعاۋدا. ادۆوكاتتىڭ ايتۋىنشا، Grok ءقاۋىپسىز ءونىم ەمەس جانە ول قاساقانا قورلاۋ قۇرالىنا اينالعان.
سوت قۇجاتتارىندا X الەۋمەتتىك جەلىسى سەنت-كلەردىڭ شاعىمدارىنان كەيىن ونىڭ اككاۋنتىن تابىس تابۋدان اجىراتىپ، وعان قاتىستى جالعان بەينەلەردىڭ ودان ءارى تارالۋىنا جول بەرگەنى ايتىلعان.
سەنت-كلەر بۇل ارەكەتتەر ءوزىن قاتتى پسيحولوگيالىق كۇيزەلىسكە ۇشىراتقانىن ايتىپ، مورالدىق جانە قارجىلىق وتەماقى تالاپ ەتۋدە.
ال يلون ماسك X پلاتفورماسىندا پايدالانۋشىلار جاساعان كونتەنتكە وزدەرى جاۋاپتى ەكەنىن مالىمدەدى. ونىڭ ايتۋىنشا، Grok وزدىگىنەن سۋرەت جاسامايدى، تەك قولدانۋشى سۇرانىسى بويىنشا ارەكەت ەتەدى. X كومپانياسى بولسا كامەلەتكە تولماعاندارعا قاتىستى نەمەسە رۇقساتسىز جىنىستىق كونتەنتكە «مۇلدە توزبەۋشىلىك» ساياساتىن ۇستاناتىنىن حابارلادى.
سونىمەن قاتار X كومپانياسى قارسى تالاپ ارىز بەرىپ، پلاتفورما شارتتارىنا سايكەس ءىستىڭ نيۋ-يوركتە ەمەس، تەحاستا قارالۋى ءتيىس ەكەنىن العا تارتتى.
سەنت-كلەر بۇعان دەيىن بەرگەن سۇحباتىتارىندا ءوزىن «قاتتى شوشىنعان ءارى جەكە شەكاراسى بۇزىلعانداي سەزىنگەنىن» ايتقان. ونىڭ سوزىنشە، بۇل — حاراسسمەنتتىڭ تاعى ءبىر قۇرالى. «ماسەلەنىڭ ءتۇپ-تامىرى — كەلىسىمنىڭ بولماۋىندا»، — دەدى ول.
قازىرگى تاڭدا ماسكتىڭ ءۇش ايەلدەن 13 بالاسى بار ەكەنى بەلگىلى.
