بۇگىن وبلىس اكىمى بەرىك ءۋاليدىڭ توراعالىعىمەن ينۆەستيسيا تارتۋ جونىندەگى وڭىرلىك ۇيلەستىرۋ كەڭەسىنىڭ كەزەكتى وتىرىسى ءوتتى.

جيىندا «MIRYILDIZ KZ Ltd.» كومپانياسىنىڭ اباي اۋدانىندا التىن ءوندىرۋ فابريكاسىن، «Nurbay Operating» سەرىكتەستىگىنىڭ اياگوز اۋدانىندا مىس كەنىن وڭدەيتىن بايىتۋ فابريكاسىن، «گرەس كۋرچاتوۆ» كومپانياسىنىڭ كۋرچاتوۆ قالاسى ماڭىندا ەلەكتر ستانسياسىن سالۋ، «Abai Poultry Agro» كومپانياسىنىڭ قۇس فابريكاسىن اشۋ جوبالارى تانىستىرىلدى. سونداي-اق، «BiBi Product» سەرىكتەستىگىنىڭ قويما قۇرىلىسى، «TAB Development» كومپانياسىنىڭ سەمەي قالاسىندا قوناق ءۇي كەشەنىن، «Global Construction» كومپانياسىنىڭ قويما نىسانىن، جەكە كاسىپكەر قىمبات زەينەعابيدەنوۆانىڭ مەيرامحاناسى بار قوناق ءۇي كەشەنىن سالۋ، «سەمەي مەحانيكالىق زاۋىتىنىڭ» مەتالل جانە بەتون بۇيىمدارى ءوندىرىسىن ىسكە قوسۋ، «اسىل تۇلىك KZ» سەرىكتەستىگىنىڭ جارما اۋدانىندا سۋارۋ ينفراقۇرىلىمىن دامىتۋ، «الفا مەديكا قازاقستان» سەرىكتەستىگىنىڭ جەكە مەديسينالىق كلينيكا اشۋ جوبالارى ۇسىنىلدى.

كەڭەس قورىتىندىسىندا جالپى سوماسى 1 228،2 ملرد تەڭگەنى قۇرايتىن، 1584 تۇراقتى جۇمىس ورنىن قۇرۋعا مۇمكىندىك بەرەتىن 12 جوبا ماقۇلداندى. ايماق باسشىسى بۇل جوبالار ءوڭىردىڭ ينۆەستيسيالىق تارتىمدىلىعىن ارتتىرىپ، جاڭا جۇمىس ورىندارىن قۇرۋعا سەپتىگىن تيگىزەتىنىن اتاپ ءوتتى.