بۇگىن سەمەي قالاسىندا دەنە شىنىقتىرۋ-ساۋىقتىرۋ كەشەنىنىڭ ىرگەتاسىن قالاۋ ءراسىمى ءوتتى. شاراعا وبلىس اكىمى بەرىك ءۋالي، «سامۇرىق-قازىنا» اق باسقارما ءتوراعاسى نۇرلان جاقىپوۆ قاتىستى.
سالتاناتتى شارادا ءسوز سويلەگەن ايماق باسشىسى پرەزيدەنت قاسىم-جومارت توقايەۆتىڭ قولداۋىمەن باستالعان «ابايعا قۇرمەت» اكسياسى اياسىندا جۇزەگە اسىرىلاتىن جوبانىڭ ءوڭىر تۇرعىندارى ءۇشىن ماڭىزى جوعارى ەكەنىن اتاپ ءوتتى.
«پرەزيدەنتىمىز قاسىم-جومارت كەمەل ۇلى توقايەۆتىڭ باستامالارى اياسىندا حالىقتىڭ ءال-اۋقاتىن ارتتىرۋ، بۇقارالىق سپورتتى دامىتۋ باعىتىندا جۇيەلى جۇمىستار جۇرگىزىلۋدە. مەملەكەت باسشىسى قىزىلوردادا وتكەن ۇلتتىق قۇرىلتايدىڭ V وتىرىسىندا بۇقارالىق سپورتتى دامىتۋ – سالاۋاتتى ۇلت قالىپتاستىرۋدىڭ ماڭىزدى ەلەمەنتى ەكەنىن اتاپ ءوتتى. «ابايعا قۇرمەت» اكسياسىن ءىرى ينۆەستورلار دا قولداپ وتىرعانىن ىلتيپاتپەن ايتا كەتكەن ءجون. اتاپ ايتساق، «KAZ Minerals» كومپانيالار توبى جاڭا شاعىن اۋداندا 18 مىڭ كورەرمەنگە ارنالعان جاڭا ستاديون قۇرىلىسىن باستاپ كەتتى. وسى ۇردىسپەن «سامۇرىق – قازىنا» اق سپورت كەشەنىن سالۋعا ءوز قولداۋلارىن ءبىلدىرىپ وتىر. بۇل – ءوڭىرىمىز ءۇشىن ۇلكەن قۋانىش. بۇل جوبا تۇرعىنداردىڭ سپورتپەن تۇراقتى اينالىسۋىنا، جاستاردىڭ سالاۋاتتى ءومىر سالتىن قالىپتاستىرۋىنا جانە بۇقارالىق سپورتتى دامىتۋعا ۇلكەن سەرپىن بەرەدى. اتالعان نىسان – تەك سپورت كەشەنى عانا ەمەس، ول – ەلدىڭ بولاشاعى سانالاتىن جاستاردىڭ دەنساۋلىعىن نىعايتۋعا، جاڭا مۇمكىندىكتەر اشۋعا باعىتتالعان الەۋمەتتىك ماڭىزى جوعارى جوبا. وسى توڭىرەكتە 15 مىڭعا جۋىق حالىق تۇرادى. بۇل – وسى اۋداندا سالىنعالى تۇرعان العاشقى سپورت كەشەنى. قۇتتى بولسىن»، – دەدى بەرىك ءۋالي.
«سامۇرىق قازىنا» باسشىسى جاڭا نىساننىڭ قالا تۇرعىندارى ءۇشىن ماڭىزدى ورتالىققا اينالاتىنىن اتاپ ءوتتى.
«قازىرگى ۋاقىتتا «سامۇرىق-قازىنا» قورىنىڭ قولداۋىمەن ەل بويىنشا اشىلعان 19 ءىرى سپورت نىسانى جۇمىس ىستەپ تۇر جانە اتالعان كەشەندەردە 700 مىڭنان استام ادام سپورتپەن اينالىسۋدا. سپورت ينفراقۇرىلىمىن دامىتۋ – قوردىڭ نەگىزگى الەۋمەتتىك جاۋاپكەرشىلىكتەرىنىڭ ءبىرى. سوڭعى 8 جىلدا اباي وبلىسىندا 4،3 ملرد تەڭگەگە 19 الەۋمەتتىك جوبا جۇزەگە اسىرىلدى. ءبىز بۇل جۇمىستاردى ءارى قاراي جالعاستىرا بەرەتىن بولامىز. بۇگىن قۇرىلىسى باستالعان نىسان تۇرعىنداردىڭ سپورتپەن اينالىسىپ، دەنساۋلىعىن جاقسارتۋعا ىقپال ەتەدى»، – دەدى ول.
جاڭا نىسان «ابايعا قۇرمەت» اكسياسى اياسىندا «سامۇرىق-قازىنا» اق-نىڭ ءبىرىڭعاي وپەراتورى Samruk-Kazyna Trust ارقىلى قارجىلاندىرىلۋدا. جالپى اۋدانى 2000 شارشى مەتر بولاتىن ەكى قاباتتى ورتالىقتا ءارتۇرلى سپورت تۇرلەرىنە ارنالعان زال، 100 كورەرمەنگە ارنالعان تريبۋنا، كۇرەس جانە بوكس زالدارى، ترەناجەر زالى مەن قوسالقى بولمەلەر قاراستىرىلعان. سپورت كەشەنى وڭ جاعالاۋدا، ساتبايەۆ كوشەسىندە سالىناتىن بولادى. كەشەن ليفتپەن جابدىقتالادى، سونىڭ ارقاسىندا ەكىنشى قاباتقا بارلىق كەلۋشىلەر، ونىڭ ىشىندە مۇمكىندىگى شەكتەۋلى جاندار ءۇشىن دە قولجەتىمدى بولادى. جوبانى ىسكە اسىرۋعا شامامەن 1،6 ملرد تەڭگە ءبولۋ جوسپارلانىپ وتىر.
«ابايعا قۇرمەت» اكسياسى اياسىندا الماتى وبلىسى سەمەي قالاسىنداعى قاراعايلى ىقشام اۋدانىنداعى جاڭادان سالىنعان ساياباققا «التىن ادام» ءمۇسىنىن ورناتتى. ماڭعىستاۋ وبلىسىنىڭ سىيلىعى دوستىق ءۇيىنىڭ قۇرىلىسى جۇرگىزىلۋدە. سولتۇستىك قازاقستان وبلىسىنىڭ سىيى رامىزدەر الاڭىنىڭ قۇرىلىسى بەيبىتشىلىك ارالىندا قارقىندى جۇرگىزىلىپ جاتىر. تۇركىستان وبلىسى كورمە ورتالىعىن، قىزىلوردا وبلىسى «اناعا تاعزىم» عيماراتىن، اتىراۋ وبلىسى «اباي الەمى» ورتالىعىن، اقتوبە وبلىسى جەكپە-جەك سارايىن، پاۆلودار وبلىسى ۇستەل تەننيسى ورتالىعىن، جەتىسۋ وبلىسى سەمەيدىڭ كىرەبەرىسىنە قالا قاقپاسىن، باتىس قازاقستان وبلىسى جەلىلىك ساياباق، قوستاناي وبلىسى رۋحانيات ورتالىعىن، الماتى قالاسى مەدياورتالىق، استانا قالاسى «كەلەشەك» مەكتەبىن سالىپ بەرسە، شىعىس قازاقستان وبلىسى ەرتىس وزەنى جاعالاۋىن اباتتاندىرادى. شىمكەنت قالاسى شىعارماشىلىق ورتالىعىمەن قاتار سەمەي قالاسىنىڭ ۆودنىي كەنتىنە مادەنيەت ءۇيىن سىيعا تارتپاق.
