اقش پرەزيدەنتى دونالد ترامپ وسى اپتادا شۆەيساريانىڭ داۆوس قالاسىندا وتەتىن حالىقارالىق فورۋمدا ەۋروپالىق كوشباسشىلارعا «گرەنلانديا بىزگە كەرەك» دەپ اشىق ايتاتىنىن مالىمدەدى. بۇل مالىمدەمە ەۋروپا مەن اقش اراسىنداعى ساياسي شيەلەنىستى كۇشەيتە ءتۇستى.

ترامپ الەۋمەتتىك جەلىدە فرانسيا پرەزيدەنتى ەممانۋەل ماكروننان كەلگەن حابارلامانى جاريالادى. وندا ماكرون: «گرەنلانديا بويىنشا نە ىستەپ جاتقانىڭىزدى تۇسىنبەيمىن» دەپ جازعان. سونداي-اق اقش پرەزيدەنتى ناتو باس حاتشىسىنان كەلگەن حابارلامانى ءبولىسىپ، ءوزىن گرەنلاندياعا اقش تۋىن قاداپ تۇرعان كۇيدە بەينەلەيتىن جاساندى سۋرەتتەردى جاريالادى.

سەنبى كۇنى ترامپ گرەنلاندياعا قاتىستى كەلىسىمگە قول جەتكىزىلمەسە، ۇلىبريتانيا مەن دانيانى قوسا العاندا سەگىز ەۋروپالىق وداقتاس ەلگە 10% كەدەندىك تاريف ەنگىزەمىن دەپ قورقىتتى. بۇل مالىمدەمە ەۋروپا ەلدەرىنىڭ قاتاڭ سىنىنا ۇشىرادى.

گرەنلانديانىڭ پرەمەر-مينيسترى «بىزگە قىسىم كورسەتۋگە جول بەرمەيمىز» دەپ مالىمدەدى. ال ەۋروپانىڭ ءبىرقاتار ەلدەرى دانياعا قولداۋ ءبىلدىرىپ، گرەنلانديانىڭ جارتىلاي اۆتونوميالىق مارتەبەسىن قورعاۋعا دايىن ەكەنىن ايتتى.

سونىمەن قاتار دونالد ترامپ ۇلىبريتانيانىڭ چاگوس ارالدارىن ماۆريكييگە بەرۋ جوسپارىن «وتە اقماقتىق» دەپ اتاپ، لوندوننىڭ بۇل شەشىمىن قاتاڭ سىنعا الدى.

وعان قوسا، ترامپ فرانسيا پرەزيدەنتى ەممانۋەل ماكروننىڭ اقش ۇسىنعان «بەيبىتشىلىك كەڭەسى» (Board of Peace) قۇرامىنداعى ورىندى قابىلداۋدان باس تارتقانى تۋرالى اقپاراتتاردان كەيىن، فرانسۋز شاراپتارىنا 200% كولەمىندە باج سالىعىن ەنگىزەمىن دەپ قوقان-لوقى جاسادى.