2026 جىلى 20 ناۋرىزدا قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسىندا «الاتاۋ قالاسىنىڭ ارنايى مارتەبەسى تۋرالى» كونستيتۋسيالىق زاڭ جوباسى ءبىرىنشى وقىلىمدا قارالدى.

قۇجات مەملەكەت باسشىسىنىڭ 2025 جىلعى جولداۋىندا بەرىلگەن تاپسىرمالارىنا سايكەس ازىرلەنىپ، الاتاۋدى زاماناۋي، ەكولوگيالىق تازا ءارى تەحنولوگيالىق تۇرعىدا دامىعان قالا رەتىندە قالىپتاستىرۋعا باعىتتالعان. زاڭ جوباسى قالانى وزىندىك قارجى مودەلى، ارنايى سالىق رەجيمى جانە جاڭارتىلعان باسقارۋ جۇيەسى بار دەربەس ەكوجۇيە رەتىندە دامىتۋدى كوزدەيدى.

جاڭا باسقارۋ مودەلىنىڭ نەگىزگى تەتىگى – قالانىڭ دامۋ باعىتتارىن ايقىندايتىن جانە مەملەكەتتىك ورگانداردىڭ قىزمەتىن ۇيلەستىرەتىن ارنايى قالا كەڭەسى بولماق. ونىڭ قۇرامى مەملەكەت باسشىسى تاراپىنان بەكىتىلىپ، ءتوراعاسى رەتىندە پرەمەر-مينيستر بەلگىلەنگەن.

پرەمەر-مينيستردىڭ ورىنباسارى قانات بوزىمبايەۆتىڭ ايتۋىنشا،  بۇل قۇجات الاتاۋ قالاسىنىڭ جەدەل ءارى تۇراقتى دامۋىنا جاعداي جاساۋ ماقساتىندا ازىرلەنگەن.

زاڭ جوباسىن ازىرلەۋ بارىسىندا حالىقارالىق تاجىريبە، سونىڭ ىشىندە سينگاپۋر مەن دۋبايدىڭ وزىق ۇلگىلەرى ەسكەرىلگەن. بۇل قالاعا باسقارۋ، سالىق جانە ينۆەستيسيا تارتۋ ماسەلەلەرىن ءوز بەتىنشە شەشۋگە مۇمكىندىك بەرەدى. سونىمەن قاتار حالىقارالىق ستاندارتتار مەن تەحنيكالىق رەگلامەنتتەردى ەنگىزۋگە جول اشادى.

زاڭ جوباسى كەلەسى باعىتتاردى قامتيدى:

* جەرگىلىكتى مەملەكەتتىك باسقارۋ ورگاندارىنىڭ قۇرىلىمى مەن وكىلەتتىگىن جەتىلدىرۋ؛
* سيفرلىق اكتيۆتەردىڭ اينالىمىن رەتتەۋ؛
* تومەن بيىكتىكتەگى اۋە كەڭىستىگىن پايدالانۋ جانە ۇشۋ اپپاراتتارىن دامىتۋ؛
* ينۆەستيسيالاردىڭ قورعالۋى مەن تۇراقتىلىعىن قامتاماسىز ەتۋ؛
* ارنايى سالىق رەجيمىن جانە ەرەكشە بيۋدجەت قاتىناستارىن قولدانۋ.

قازىرگى تاڭدا جالپى قۇنى 1،8 ترلن تەڭگە بولاتىن 44 ينۆەستيسيالىق جوبا بار. ولاردى ىسكە اسىرۋ شامامەن 30 مىڭ جاڭا جۇمىس ورنىن اشۋعا مۇمكىندىك بەرەدى. ۇزاق مەرزىمدى پەرسپەكتيۆادا، 2050 جىلعا دەيىن، قالا ينفراقۇرىلىمىن دامىتۋعا شامامەن 10 ترلن تەڭگە قاجەت بولادى. سونىمەن قاتار 50 ملرد اقش دوللارىنا دەيىن شەتەلدىك ينۆەستيسيا تارتۋ جوسپارلانىپ وتىر.

يننوۆاسيالىق كولىكتەردى ەنگىزۋگە ەرەكشە كوڭىل بولىنگەن. ولاردىڭ قاتارىندا اەروتاكسي مەن جۇك دروندارىن ىسكە قوسۋ، الاتاۋدى الماتى، قونايەۆ قالالارىمەن جانە تۋريستىك ايماقتارمەن بايلانىستىراتىن ۆەرتوپورتتار سالۋ، سونداي-اق اۋە كولىگىن پايدالانۋ ارقىلى تۋريستىك باعىتتاردى دامىتۋ بار. بولاشاقتا تۋريستەر الماتى حالىقارالىق اۋەجايى ارقىلى «مەدەۋ» سپورت كەشەنىنە جەدەل جەتۋ مۇمكىندىگىنە يە بولادى.

زاڭ جوباسىنىڭ ەكىنشى وقىلىمى 2026 جىلدىڭ 27 ناۋرىزىندا وتەدى. اي سوڭىنا دەيىن قۇجاتتى مەملەكەت باسشىسىنىڭ قاراۋىنا بەرۋ جوسپارلانعان.

بۇل باستاما الاتاۋدى ينۆەستيسيالار مەن يننوۆاسيالار تارتاتىن جاڭا ورتالىققا اينالدىرىپ، ونى تۇراقتى دامۋ مەن ءتيىمدى مەملەكەتتىك باسقارۋدىڭ زاماناۋي تالاپتارىنا ساي قالا رەتىندە قالىپتاستىرۋعا مۇمكىندىك بەرەدى.