رەسپۋبليكالىق رەفەرەندۋمدا الماتى وبلىسى تۇرعىندارىنىڭ بەلسەندىلىگى جوعارى بولدى. ورتالىق سايلاۋ كوميسسياسىنىڭ ساعات 20:00-دە بەرگەن مالىمەتى بويىنشا ءوڭىر حالقىنىڭ ساياسي ناۋقانعا قاتىسۋى 71،46%-دى قۇرادى. بۇل وبلىس حالقىنىڭ ماڭىزدى مەملەكەتتىك شەشىمدەر قابىلداۋعا جوعارى تالپىنىسىن كورسەتەدى.

العاشقىلاردىڭ ءبىرى بولىپ قونايەۆ قالاسىنداعى №949 رەفەرەندۋم ۋچاسكەسىندە الماتى وبلىسىنىڭ اكىمى مارات سۇلتانعازييەۆ ءوز تاڭداۋىن جاسادى.

بۇل كۇنى ءوڭىر حالقىمەن بىرگە تانىمال سپورتشىلار، مادەنيەت قايراتكەرلەرى، دەپۋتاتتار جانە باسقا دا تانىمال تۇلعالار بەلسەندىلىك تانىتتى. مىسالى، وتەگەن باتىر اۋىلىندا 2024 جىلعى وليمپيادا ويىندارىنىڭ كۇمىس جۇلدەگەرى دەمەۋ جادىرايەۆ، قارعالى اۋىلىندا گرەك-ريم كۇرەسىنەن سۋردليمپيادا ويىندارىنىڭ چەمپيونى اندرەي سامارين، ال قونايەۆ قالاسىندا ارالاس جەكپە-جەك شەبەرى شاۆكات راحمونوۆ داۋىس بەرۋگە كەلدى.

رەفەرەندۋم ءار بۋىن وكىلدەرىن بىرىكتىردى.

شونجى پوليتەحنيكالىق كوللەدجىندە العاش رەت 18 جاستاعى ستۋدەنت ديانا سەلماحۋنوۆا داۋىس بەردى. ۇيعىر اۋدانىندا ۋچاسكەگە جاس جۇبايلار كەلدى، ال ەڭبەكشىقازاق اۋدانىندا جاس وتباسى ءوز تاڭداۋىن جاسادى.

اعا بۋىننىڭ قاتىسۋى ەرەكشە ءىلتيپات پەن قۇرمەت تۋدىردى. 102 جاستاعى ۇلى وتان سوعىسىنىڭ ارداگەرى الىم كەبيروۆ ۋچاسكەگە ءوز اياعىمەن باردى، ۇزىناعاشتا سوعىس ارداگەرى فەدور كوۆاليەۆ داۋىس بەردى، ال ەڭبەكشىقازاق اۋدانىندا 75 جىل بىرگە تۇرعان، تۇرگەننەن كەلگەن ەرلى-زايىپتى ىسقاقوۆتار ۇيدەن داۋىس بەردى.

رەفەرەندۋم كۇنى تاڭەرتەڭنەن باستاپ ۋچاسكەلەردە تۇرعىنداردىڭ بەلسەندىلىگى جوعارى بولدى. ادامدار وتباسىمەن، دوستارىمەن جانە كورشىلەرىمەن داۋىس بەرۋگە كەلدى.

قونايەۆ جانە الاتاۋ قالالارىندا، سونداي-اق ءبىرقاتار اۋدانداردا ۋچاسكەلەرگە العاشقى ساعاتتاردا ادامداردىڭ كوپ كەلۋىنەن ۇلكەن كەزەك پايدا بولدى.

رەفەرەندۋم وتكىزۋ ءۇشىن ۋچاسكەلەر داۋىس بەرۋگە ارنالعان كابينالارمەن، ستاسيونارلىق جانە تاسىمالداناتىن جاشىكتەرمەن، سونداي-اق بايقاۋشىلار مەن كوميسسيا مۇشەلەرىنە ارنالعان ورىندارمەن تولىق جابدىقتالدى.

ايماقتا 677 ۋچاسكە جۇمىس ىستەدى. پروسەستى ۇيىمداستىرۋعا ارنايى وقىتۋدان وتكەن 4781 كوميسسيا مۇشەسى تارتىلدى. داۋىس بەرۋ بارىسىن باقىلاۋدى 16 وڭىرلىك جانە 11 رەسپۋبليكالىق قوعامدىق ۇيىمداردىڭ وكىلدەرى جۇزەگە اسىردى، بۇل ءراسىمنىڭ اشىقتىعىن قامتاماسىز ەتتى.

داۋىس بەرۋدىڭ قولجەتىمدىلىگىنە ەرەكشە نازار اۋدارىلدى. ۋچاسكەلەردە پاندۋستار، ىڭعايلى كابينالار ورناتىلدى، كورۋ جانە ەستۋ قابىلەتى ناشار ادامدارعا ارنالعان ارنايى قۇرىلعىلار قويىلدى. مۇمكىندىگى شەكتەۋلى ازاماتتار ءۇشىن ينۆاتاكسي قىزمەتى جۇمىس ىستەدى، ال كوميسسيا مۇشەلەرىنە قاجەتتى كومەك كورسەتىلدى.

كوپتەگەن ەلدى مەكەندە رەفەرەندۋم كۇنى اۋىلشارۋاشىلىق جارمەڭكەلەرى، قولونەرشىلەر كورمەلەرى جانە كونسەرتتىك باعدارلامالار ءوتتى.

ايتا كەتەيىك، ىلە اۋدانىندا بىرنەشە ۋچاسكەدە “باۋىرساق party”، اقشي اۋىلىندا “شۇبات Party” اكسياسى ۇيىمداستىرىلدى.

داۋىس بەرۋمەن ءبىر مەزگىلدە وڭىردە ەكولوگيالىق اكسيالار ءوتتى. “ءوز اعاشىڭدى وتىرعىز جانە داۋىس بەر” باستاماسى اياسىندا تۇرعىندار، دەپۋتاتتار، ەرىكتىلەر مەن جۇرتشىلىق وكىلدەرى وبلىستىڭ قالالارى مەن اۋىلدارىنا اعاش وتىرعىزدى.

بۇل كۇن ەرەكشە ەپيزودتارمەن ەستە قالدى. وتەگەن باتىر اۋىلىندا ۋچاسكەگە “زۆەروپوليس” ءمۋلتفيلمىنىڭ كەيىپكەرلەرى كەلدى، ەسىك قالاسىندا داۋىس بەرۋشىلەر «التىن ادامدى» بايقادى، ال قونايەۆتا قار بارىسى بولىپ كيىنگەن ادام تۇرعىنداردىڭ نازارىن اۋداردى.

ۋچاسكەلەرگە ۆەلوسيپەدشىلەر، “ەندۋرو” موتوكلۋبىنىڭ قاتىسۋشىلارى، شاڭعىشى-سپورتشىلار جانە درايف-جارىستاردىڭ جەڭىمپازدارى كەلدى.

وسىلايشا، الماتى وبلىسىنداعى رەفەرەندۋم ماڭىزدى قوعامدىق-ساياسي وقيعاعا عانا ەمەس، سونىمەن قاتار ازاماتتىق بەلسەندىلىككە تولى ءوتتى. الماتى وبلىسىنداعى رەفەرەندۋم وسىنداي قايتالانباس ساتتەرىمەن ەرەكشەلەندى.