جامبىل اۋدانىنىڭ ورتالىعى ۇزىناعاش اۋىلىندا رەفەرەندۋم كۇنى ەرەكشە ۇسىنىس جاسالدى. وسى ەلدىمەكەن تۇرعىنى ەلجان ەربول ۇلى رەسپۋبليكالىق رەفەرەندۋمعا قاتىسىپ، ءوز تاڭداۋىن جاساعاننان كەيىن بولاشاق قالىڭدىعى جانەركەگە ۇيلەنۋگە ۇسىنىس جاسادى.

جاستار بۇگىنگى كۇندى ەلىمىزدەگى تاريحي كۇندەردىڭ ءبىرى رەتىندە باعالايدى. ەلجان التىباقان كوشەسىندەگى №1 مەكتەپ-گيمنازياسىنىڭ عيماراتىندا ورنالاسقان №262 رەفەرەندۋم ۋچاسكەسىندە داۋىس بەرگەننەن كەيىن ىلە-شالا سول جەردە سۇيىكتىسىنە ساقينا ۇسىنىپ، ومىرلىك سەرىگى بولۋعا شاقىردى.

بۇل كۇن ومىرىندەگى جانە ەل تاريحىنداعى ەرەكشە ساتتەردىڭ ءبىرى ەكەنىن ەلجان بىلايشا ءبىلدىردى: «بۇگىنگى كۇن مەن ءۇشىن عانا ەمەس، تۇتاس قازاق ەلى ءۇشىن ەرەكشە مانگە يە كۇندەردىڭ ءبىرى. سەبەبى مەملەكەتىمىزدىڭ جاڭا كەزەڭگە قادام باسۋىنا نەگىز بولاتىن ماڭىزدى شەشىم قابىلدانىپ جاتىر دەپ ەسەپتەيمىن. سوندىقتان مەن بۇل كۇندى ادەيى تاڭدادىم. ويتكەنى بولاشاق جارىما جاساعان ۇسىنىسىم ەشقاشان ۇمىتىلمايتىن كۇندەردىڭ ءبىرى بولىپ قالارىنا سەنەمىن»، – دەدى ول.

وسىلايشا، ەل بولاشاعىنا قاتىستى ماڭىزدى تاڭداۋ جاسالعان كۇنى ەكى جاستىڭ ومىرىندەگى قۋانىشتى وقيعا دا قاتار ءورىلىپ، بۇل ءسات كوپشىلىككە ەرەكشە اسەر سىيلادى.