قازاقستاندا كەدەيلىك قالاي ولشەنەتىنىن ۇكىمەت جاڭارتتى. 16 قاڭتاردان باستاپ كىم كەدەي سانالادى دەگەن مەجەلەر باسقاشا ەسەپتەلە باستايدى.

قۇجات قاشان كۇشىنە ەنەدى جانە نەنى قامتيدى

جاڭا ادىستەمەنى 2026 جىلعى 5 قاڭتاردا ۇلتتىق ستاتيستيكا بيۋروسىنىڭ باسشىسى بەكىتتى. قۇجات 16 قاڭتاردان كۇشىنە ەنەدى.

كەدەيلىكتىڭ نەگىزگى كورسەتكىشتەرى ىرىكتەمەلى ءۇي شارۋاشىلىقتارى زەرتتەۋلەرىنىڭ دەرەكتەرىمەن ەسەپتەلەدى. مۇنداي زەرتتەۋلەردى ۇلتتىق ستاتيستيكا بيۋروسى تۇراقتى تۇردە جۇرگىزەدى.

ابسوليۋتتىك شەك: تىرشىلىك مينيمۋمىنا قاراپ ولشەنەدى

باستى كورسەتكىش بۇرىنعىداي ابسوليۋتتىك كەدەيلىك بولىپ قالادى. ول تىرشىلىك مينيمۋمىمەن ولشەنەدى. ادامنىڭ نە وتباسىنىڭ تۇتىنۋ دەڭگەيى وسى مەجەدەن تومەن تۇسسە، ولار كەدەي سانالادى.

كورسەتكىشتەر ەل جانە وڭىرلەر كەسىنىسىندە، قالا مەن اۋىلعا ءبولىپ، جىنىس، جاس جانە ءۇي شارۋاشىلىعىنىڭ كولەمى بويىنشا دەربەس ەسەپتەلەدى. كۆارتالدىق دەرەكتەر ماۋسىمدىق تۇزەتۋسىز جاريالانادى.

قاتىستىق كەدەيلىك: مەدياندىق تابىسقا بايلانادى

ادىستەمە قاتىستىق كەدەيلىكتى دە ەنگىزدى. ول مەدياندىق تابىسقا سۇيەنىپ انىقتالادى. مەديانا – حالىقتىڭ جان باسىنا شاققانداعى تابىستارى رەتتەلگەن كەزدە ءدال ورتاسىندا تۇرعان شاما.

بيۋرو ەكى شەك بويىنشا ۇلەستى ەسەپتەيدى: مەدياندىق تابىستىڭ 50%-ىنا دەيىنگى بولىگى – تۇراقتى دامۋ ماقساتتارىن باقىلاۋعا، 60%-ىنا دەيىنگىسى – حالىقارالىق تاجىريبەگە ساي مونيتورينگكە الىنادى. الدىمەن حالىق جان باسىنا شاققان تابىس بويىنشا رەتتەلەدى، سودان كەيىن مەديانا انىقتالىپ، بەلگىلەنگەن شەكتەن تومەن ۇلەس ەسەپتەلەدى.

سونىمەن بىرگە حالىقارالىق كەدەيلىك شەگى ساتىپ الۋ قابىلەتىنىڭ پاريتەتىن ەسكەرىپ ەسەپتەلەدى.

سۋبەكتيۆتى جانە بالالاردىڭ كوپولشەمدى كەدەيلىگى

قۇجاتتا سۋبەكتيۆتى كەدەيلىك بولەك قاراستىرىلدى. ول ادامداردىڭ ءوز تۇرمىسىن قالاي باعالايتىنىنا جانە بازالىق قاجەتتىلىكتەرگە تابىسى جەتەتىنىنە قاتىستى جاۋاپتارمەن ولشەنەدى. بۇل دەرەكتەر «حالىقتىڭ ءومىر ساپاسى» ساۋالناماسىنان الىنادى. رەسپوندەنتتەر وزدەرىن قاي دەڭگەيدەگى تۇرمىستاعى توپقا جاتقىزاتىنىن كورسەتەدى.

بالالاردىڭ كوپولشەمدى كەدەيلىگىنە ارنالعان ارنايى يندەكس ەنگىزىلدى. مۇندا تەك تابىس ەمەس، بالانىڭ ءومىر ءسۇرۋ جاعدايلارى دا ەسكەرىلەدى: ءبىلىم مەن مەديسيناعا قولجەتىمدىلىك جانە ساپا، تۇرعىن ءۇي احۋالى، تاماق پەن كيىم، بوس ۋاقىت پەن مەكتەپتەگى شارالارعا قاتىسۋ، كىتاپتار مەن دامىتۋشى ويىنداردىڭ بولۋى، وتباسىلىق دەمالىس، سونداي-اق وتباسىنىڭ مىندەتتى تولەمدەردى وتەۋ، بازالىق جيھازدى الماستىرۋ نەمەسە كولىكپەن ءجۇرىپ-تۇرۋ مۇمكىندىگى نازارعا الىنادى.

ۇلتتىق ستاتيستيكا بيۋروسى كورسەتكىشتەردى كۆارتال جانە جىل قورىتىندىسىمەن تۇراقتى تۇردە جاريالايدى.

بۇل تۋرالى Qamshy.kz اقپارات اگەنتتىگى حابارلايدى.