الماتى قالاسىنىڭ اكىمى باۋىرجان بايبەك كوشەدەگى زاڭسىز ساۋدامەن كۇرەس جالعاسا بەرەتىنىن مالىمدەدى.
الماتىدا بىرنەشە جىلدان بەرى ساۋدا دۇڭگىرشەكتەرى ءسۇرىلىپ، زاڭسىز ساۋدامەن كۇرەس بەلسەندى تۇردە جالعاسىپ كەلەدى.
«كولەڭكەلى ەكونوميكا ۇلەسىن ازايتۋ ماقساتىندا ءبىز قالانى زاڭسىز ساۋدا دۇڭگىرشەكتەرى مەن بيلبوردتاردان، باسقا دا زاڭسىز دۇنيەلەردەن تازالاۋدى قولعا الدىق. «جۇمىس ورىندارى» دەپ كوپشىلىكتىڭ ايتارى تۇسىنىكتى. بىزدە ساۋدا ورىندارىندا 27 مىڭ شارشى مەتر بوس جەر تۇر. ءبىز نەگە قالانى بازارعا اينالدىرۋىمىز كەرەك؟ ونىڭ ۇستىنە ول جەردەگى ازىق-تۇلىكتەن ەشكىم ساقتاندىرىلماعان. ول جەردەگى جۇمىسشىلار ەڭبەكاقىنى كونۆەرتپەن الادى، زەينەتاقى قورىنا دا ەشتەڭە اۋدارمايدى»، - دەدى قالا اكىمى.
ونىڭ ايتۋىنشا، قولعا الىنعان جۇمىستار جالعاسا بەرمەك. كولەڭكەلى ەكونوميكامەن كۇرەس جۇمىستارى قالا بيۋدجەتىنىڭ قورجىنىنا تۇسەتىن قارجىنى مولايتادى، ول قارجى قالا ينفراقۇرىلىمىنا باعىتتالماق.
«ءبىز شاعىن جانە ورتا بيزنەستى قولداي تۇسەمىز، وسى رەتتە بيۋروكراتيالىق كەدەرگىلەردى قىسقارتىپ، جەمقورلىق جاعدايلارىنىڭ جولىن جابامىز. بيزنەستىڭ دامۋى قالا تۇرمىسىنىڭ جاقسارىپ، جۇمىس ورىندارىنىڭ كوبەيۋىنە نەگىز بولادى»، - دەدى باۋىرجان بايبەك.
