ەكى ەلدىڭ كوشباسشىلارى ءبىرىن-بىرى ۇلى وتان سوعىسىنداعى جەڭىستىڭ الداعى مەرەكەسىمەن قۇتتىقتادى.

اڭگىمەلەسۋ بارىسىندا قازاقستان مەن رەسەي پرەزيدەنتتەرى ەكىجاقتى ىنتىماقتاستىقتىڭ قازىرگى جاعدايى مەن پەرسپەكتيۆالارىن، سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەردى، سونىڭ ىشىندە ارمەنياداعى احۋالدى تالقىلادى.

مەملەكەتتەر باسشىلارى الداعى كەزدەسۋلەر كەستەسى، اتاپ ايتقاندا، بيىلعى 14 مامىردا سوچي قالاسىندا وتەتىن جوعارى ەۋرازيالىق ەكونوميكالىق كەڭەستىڭ وتىرىسىنا ازىرلىك بارىسى جونىندە اڭگىمەلەستى.

وسى ورايدا، ەكى ەلدىڭ كوشباسشىلارى ەۋرازيالىق ەكونوميكالىق وداقتىڭ 2017 جىلعى ىشكى جانە سىرتقى ساۋدا-ساتتىق كولەمى تيىسىنشە 24،4 جانە 26،1 پايىزعا وسكەنىن اتاپ ءوتىپ، حالىقارالىق قوعامداستىق تاراپىنان بۇل بىرلەستىكپەن ىنتىماقتاستىقتى دامىتۋعا قىزىعۋشىلىقتىڭ ارتىپ وتىرعانىن ايتتى.

جالپى ەكى ەل باسشىسى قازاقستان مەن رەسەي اراسىنداعى ساياسي-ديپلوماتيالىق بايلانىس پەن ساۋدا-ەكونوميكالىق بارىس-كەلىس تۋرالى ءجيى تەلەفوندا سويلەسىپ تۇرادى.  

بۇعان دەيىن تەلەفون ارقىلى سويلەسۋگە رەسەي جاعىنىڭ باستاماشى بولۋىمەن 18 ساۋىردە نۇرسۇلتان نازاربايەۆ رەسەي فەدەراسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەسكەن. وندا مەملەكەتتەر باسشىلارى ەكىجاقتى ىنتىماقتاستىققا قاتىستى، سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەردى، سونىڭ ىشىندە سيرياداعى احۋالدى تالقىلادى.

سونداي-اق، ەكى ەل باسشىسى اقپان ايىندا دا تەلەفوندا سويلەسكەن بولاتىن. وندا بيىلعى 29-30 قاڭتاردا سوچيدە وتكەن سيريا ۇلتتىق ديالوگى كونگرەسىنىڭ قورىتىندىلارىن تالقىلادى. قازاقستان پرەزيدەنتى سيريا داعدارىسىن رەتتەۋ ۇدەرىسىنە رەسەي فەدەراسياسىنىڭ قوماقتى ۇلەس قوسقانىن اتاپ ءوتتى.

مەملەكەتتەر باسشىلارى الماتى قالاسىندا وتكەن ەۋرازيالىق ۇكىمەتارالىق كەڭەس وتىرىسى مەن "جاھاندىق داۋىردەگى سيفرلىق كۇن ءتارتىبى" اتتى فورۋم تۋرالى وي ءبولىسىپ، ەۋرازيالىق ەكونوميكالىق ينتەگراسيا اياسىنداعى قازاقستان-رەسەي ىنتىماقتاستىعى جونىندە اڭگىمەلەستى.

پرەزيدەنتتەردىڭ بىر-بىرىنە ءوزارا قۇرمەتى دە ەرەكشە. جاڭادان سايلانىپ، كەزەكتى پرەزيدەنتتىك قىزمەتىنە كىرىسكەلى وتىرعان پۋتين نۇرسۇلتان نازاربايەۆتى ايرىقشا قادىرلەيدى.

قازاقستان رەسپۋبليكاسى پرەزيدەنتى تەلەراديوكەشەنىنىڭ باس ديرەكتورى ەرلان بەكحوجين رەسەي فەدەراسياسىنىڭ پرەزيدەنتى ۆلاديمير پۋتينمەن سۇحباتتاستى، وندا رەسەي پرەزيدەنتى نۇرسۇلتان نازاربايەۆتىڭ كوشباسشى رەتىندەگى ايرىقشا ەرەكشەلىكتەرىن اتاپ ءوتتى.
«بىرىنشىدەن، ول وتە ىسكەر جانە تالاپتى ادامدارمەن، جاستارمەن ۇيىمشىلدىقتا قالاي جۇمىس ىستەۋدى بىلەدى. ول ەشقاشان مىقتى ادامداردان قورىقپايدى. بۇل كەز كەلگەن كۇشتى كوشباسشىنىڭ ەرەكشەلىگى »، - دەدى پۋتين.