وڭتۇستىك قازاقستان وبلىسىنىڭ اكىمى ج.تۇيمەبايەۆ حالىقارالىق تۇركى اكادەمياسىنىڭ پرەزيدەنتى د.ءقىدىرالى باستاعان عالىمدار توبىمەن كەزدەستى. اكادەميا پرەزيدەنتىنىڭ كەڭەسشىسى ە.يساقۇلوۆ، پروفەسسور ق.قونقابايەۆپەن، عالىم ا.تويشانۇلىمەن بولعان باسقوسۋدا ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان مىندەتتەردى ىسكە اسىرۋ جايى تالقىلاندى.
جيىن بارسىندا ءوڭىر باسشىسى عالىمداردى وبلىس اۋماعىنداعى ماڭىزدى تاريحي نىساندار تۋرالى ماعلۇمات جيناستىرىپ، ارنايى سەريامەن كىتاپ شىعارۋعا اتسالىسۋعا شاقىردى.
«وزدەرىڭىز بىلەسىزدەر، وڭتۇستىك ءوڭىرى تاريحقا باي ولكە. ءالى دە زەرتتەۋدى قاجەت ەتەتىن دۇنيەلەر، زەرتتەلگەنىنەن كوپ. سوندىقتان وسىعان ءمان بەرۋىمىز كەرەك. وبلىستاعى بارشا تاريحي جانە مادەني جەرلەردىڭ ءتىزىمىن جاساپ، ولار تۋرالى مالىمەتتەردى جيناقتاپ، كىتاپتار سەرياسىن شىعارۋدى جانداندىرۋ كەرەك دەپ ويلايمىن. مىنە، وسى ءىستى قارقىنمەن اتقارۋعا شاقىرامىن»، – دەدى جانسەيىت تۇيمەبايەۆ.
تۇرىكولوگ عالىمدارمەن كەڭەسۋ بارىسىندا وڭىرىمىزدە عالىمداردىڭ باسىن قوسىپ، تىزىمگە ەنبەي، ەسكەرۋسىز قالعان تاريحي ورىندارعا ارحەولوگيالىق قازبا جۇمىستارىن جۇرگىزۋ جايى ءسوز بولدى.
ءوز كەزەگىندە د.ءقىدىرالى تولەبي اۋدانىنداعى ەسىمحاننىڭ ورداسى بولعان تاريحي ماڭىزى بار جەردى مەملەكەتتىك دەڭگەيدە قورعاۋعا الىپ، ارحەولوگيالىق زەرتتەۋ جۇمىستارىن جۇرگىزۋدى ۇسىندى. مۇنى قولداعان ايماق باسشىسى، عالىمدار توبىن تارتىپ اتالعان نىسانعا زەرتتەۋ جۇمىستارىن جۇرگىزۋگە باستاماشى بولاتىنىن ايتتى.
سونداي-اق، اتاقتى تۇركولوگتاردىڭ باسىن قوساتىن كەلەلى كەڭەستىڭ ءبىرىن وڭتۇستىكتە ۇيىمداستىرۋ ماسەلەسى دە قوزعالدى.
جيىن سوڭىندا قوناقتارعا سىي-سياپات جاسالىپ، ەستەلىككە سۋرەتكە ءتۇستى.
