وبلىستىق مادەنيەت جانە تىلدەردى دامىتۋ باسقارماسىنىڭ ۇيىمداستىرۋىمەن اعىمداعى جىلدىڭ 10-13 مامىر كۇندەرى ارالىعىندا قازاقستانداعى وزبەكستان رەسپۋبليكاسىنىڭ جىلىنا وراي وزبەك ۇلتتىق اكادەميالىق دراما تەاترىنىڭ وڭتۇستىك قازاقستان وبلىسىندا گاسترولدىك ءىسساپارى ءوتتى. اتالعان جىل اياسىندا وڭىرىمىزگە كەلگەن وزبەكستاندىق ونەر ۇجىمى ءۇش كۇن بويى وبلىس جۇرتشىلىعىنا ەركين حۋشۆاقتوۆتىڭ «كوڭىل» كومەدياسىن ۇسىنىپ، زور قوشەمەتكە بولەندى.

مادەني قارىم-قاتىناستى ۇلعايتۋ،  كورشى ەلدىڭ ساحناداعى ەرەكشە قويىلىمدارىن كۇنگەي ولكەنىڭ كورەرمەندەرىنە تارتۋ ەتىپ، دوستىق بايلانىستى پاش ەتۋگە باعىتتالعان  ساپار بارىسىندا وزبەكستاندىق ونەر ۇجىمى شىمكەنت قالاسى مەن سايرام اۋداندارىندا اتالعان تۋىندى ارقىلى وتباسى باقىتى مەن قۇندىلىعى جايىندا تەرەڭ وي قوزعادى. سونداي-اق، دەلەگاتتار ءوڭىرىمىزدىڭ كيەلى ورىندارى سايرام اۋدانىنداعى يبراحيم اتا، قاراشاش انا كەسەنەلەرى مەن تۇركىستان قالاسىنداعى قوجا احمەت ياساۋي باسىنا بارىپ قۇران باعىشتاپ، زيارات ەتتى.

گاسترولدىك ساپاردىڭ جابىلۋ سالتاناتىندا وزبەك ۇلتتىق اكادەميالىق دراما تەاترىنىڭ ديرەكتورى، وزبەكستان رەسپۋبليكاسىنا قىزمەت كورسەتكەن ءارتىس، «مەحمات-شۋحرات» وردەنىنىڭ يەگەرى ماسۋدوۆ فاتحۋللا حۋسان ۇلى جىلى شىرايمەن قارسى الىپ، ەرەكشە ىقىلاس بىلدىرگەن وڭتۇستىكقازاقستاندىقتارعا العىسىن ءبىلدىرىپ، ەكى ەل اراسىنداعى بايلانىس ودان ارمەن  نىعايا بەرەتىندىگىنە سەنىمدىلىگىن جەتكىزدى.

شارا سوڭىندا تەاتر ۇجىمىنا وبلىستىق مادەنيەت جانە تىلدەردى دامىتۋ باسقارماسىنىڭ مادەنيەت جانە ونەر ءبولىمىنىڭ باسشىسى شارافييەۆا عاليا اليكەن قىزى مەن وقو وزبەك مادەني ورتالىعىنىڭ ءتوراعاسى يكرام حاشيمجانوۆ ارنايى العىس حاتتار تابىستادى.