جەر بەتىندەگى كليمات سەكىلدى ساياسي مەتەورولوگيا دا ۇنەمى وزگەرىپ وتىرادى. الەمدەگى ءتۇرلى ەكونوميكالىق-ساياسي سانكسيالار، اسكەري قارۋلى كۇشتەر، ديپلوماتيا مەن باق-تىڭ ءسوز بوستاندىعىنا كەدەرگى كەلتىرەتىن ارەكەتتەر قازىرگى قوعامنىڭ ۇيرەنشىكتى جاعدايىنا اينالدى. وسىنداي كەزەڭدەردە جۋرناليستيكانىڭ ءرولى قانداي؟
بۇل سۇراق ەۋرازيا مەديا فورۋمىندا تالقىلانادى. جيىنعا قاتىساتىن سپيكەرلەر: قر-نىڭ سىرتقى ىستەر ءمينيسترى كايرات ابدراحمانوۆ، يتاليانىڭ ەكس پرەمەر-مينيسترى ماتتەو رەنسي، بۇۇ-نىڭ جەنيەۆاداعى ءبولىمىنىڭ مەڭگەرۋشىسى داۆيد چيكۆايدزە، اقش-تىڭ (2011-2014) قىتايداعى ەلشىسى گەري لوك.
سەسسيا مودەراتورى «پۋليتسەر» سىيلىعىنىڭ يەگەرى، «نيۋ-يورك تايمس» گازەتىنىڭ كولۋمنيستى نيكولاس كريستوف بولادى.
ب ا ق بولعان جەردە سارى باسىلىمدار مەن بۇرمالانعان جاڭالىقتار، ارانداتۋشىلار مەن جالعان اقپاراتتاردىڭ بولۋى زاڭدىلىق. سونداي-اق، جالعان اقپاراتتى قولدان جاسايتىن مۇددەلى توپتاردىڭ دا بار ەكەنىن ەسكەرۋ قاجەت. اقپاراتتىق تەحنولوگيا دامىعان زاماندا فەيك-جاڭالىقتار جاساۋ، ونى الەۋمەتتىك جەلىلەر ارقىلى تاراتۋ ءتىپتى وڭاي. وسىنداي ارەكەتتەردىڭ قوعامعا كەرى اسەرىن تيگىزەتىنى بەلگىلى. الدىن الۋ جولدارى قانداي؟ بۇل تۋرالى ەقىۇ-نىڭ ب ا ق بوستاندىعى جونىندەگى وكىلى ارلەم دەزير، «New Day Strategy» كومپانياسىنىڭ باسشىسى، ساياسي ستراتەگ رودجەر فيسك، جۋرناليست، ساياساتكەر، قۇقىق قورعاۋشى اندرەي بۋزاروۆ ، Zaborona.com جوباسىنىڭ نەگىزىن قالاۋشى، تەلەجۋرناليست كاتەرينا سەرگاسكوۆا، «Hashtag our stories» نەگىزىن قالاۋشى يۋسۋف ومار سىندى ساياساتكەرلەر مەن جۋرناليستەر ءسوز قوزعايتىن بولادى.
سونىمەن قاتار، ەۋروپالىق وداق ەۋروپالىق تۇراقتىلىق پەن وركەندەۋدىڭ ىرگەتاسى بولىپ سانالادى. الايدا، سوڭعى جىلدارداعى ساياسي قيىندىقتار مەن الەمدىك وقيعالار ەۋرووداقتى اينالىپ وتپەگەنى راس. وسىنداي قيىنشىلىقتاردا ەۋرووداقتىڭ اتقارار ءرولى قانداي؟ بولاشاعى مەن مۇمكىندىگى قانداي؟ بۇل پروبلەمالار مەديانارىقتا قالاي تالقىلانىپ جاتىر؟ وسى تاقىرىپ توڭىرەگىندە وي بولىسەر سپيكەرلەر قاتارىندا ۇلىبريتانيانىڭ سىرتقى ىستەر مينيسترلىگىنىڭ باسپا ءسوز حاتشىسى سايمون ماكگي، يتاليا پارلامەنتىنىڭ مۇشەسى، ساياسي قايراتكەر جۋرناليست دەبورا بەرگاميني جانە تاعى باسقا ايتۋلى الەم ساياساتكەرلەرى بار. شارا مودەراتورى: جازۋشى، تەلەجۇرگىزۋشى، BBC Europe ارناسىنىڭ رەداكتورى گيەۆين حيۋيتت.
وسى جانە وزگە دە وزەكتى تاقىرىپتار فورۋمنىڭ ەكىنشى كۇنىندە تالقىلاناتىن بولادى. فورۋم ۇستىمىزدەگى جىلدىڭ 22-24 مامىر كۇندەرى الماتى قالاسىنداعى The Ritz Carlton وتەلىندە وتەدى.
XV ەۋرازيالىق مەديا فورۋمعا تىركەلۋ 16-مامىرعا دەيىن جالعاسادى. تىركەۋ ءۇشىن http://eamedia.org/ru/ سىلتەمەسىنە وتۋگە بولادى. ورىن ساناۋلى.
جالپى، ءۇش كۇندى قامتيتىن شاراعا 500-دەن استام وتاندىق جانە الەمدىك تانىمال سپيكەرلەر، ساياساتتانۋشىلار مەن قوعام قايراتكەرلەرى قاتىسىپ، مەديا سالاسىنىڭ وزەكتى ماسەلەلەرى قوزعالادى.
پىكىر قالدىرۋ