وڭتۇستىك قازاقستان وبلىسىندا ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ قۇرىلىمدىق بولىنىستەرىنىڭ اراسىندا  ءورت ءسوندىرۋ-قۇتقارۋ سپورتى بويىنشا اشىق چەمپيوناتى باستالدى. قىزمەتتىك مىندەتىن اتقارۋ كەزىندە قازا بولعان سوندىرۋشىلەر باقىت الپىسبايەۆ، نۇرعالي قارابايەۆ، جۇلدىزبەك ەسەنالييەۆتەردى ەسكە الۋعا ارنالعان سايىستىڭ سالتاناتتى اشىلۋى №1 مامانداندىرىلعان جاساقتىڭ سپورت الاڭىندا ءوتتى.

ءوڭىردىڭ  توتەنشە جاعدايلار دەپراتامەنتىنىڭ باستىعى نۇربولات دەربىسوۆ جارىستى اشىق دەپ جاريالاپ، قاتىسۋشىلارعا جەڭىس  تىلەدى.  

جالپى 23 كوماندا قاتىسقان سايىستا قىزمەتكەرلەر ءورت ءسوندىرۋ-قۇتقارۋ سپورتىنىڭ 4 ءتۇرى بويىنشا ەڭ ۇزدىك اتاعىنا سىنعا تۇسپەك.   ولار الدىمەن سپورت الاڭىندا ءۇش ءيىندى ساتىمەن وقۋ-جاتتىعۋ مۇناراسىنىڭ 3-4ء-شى قاباتتارىنا كوتەرىلۋ سايىسى  بويىنشا ءوز باقتارىن سىنادى. بۇل كۇنى ءورت سوندىرۋشىلەر  وقۋ-جاتتىعۋ مۇناراسىنىڭ 4ء-شى قاباتىنا ءيىندى ساتى ارقىلى كوتەرىلۋ بويىنشا كۇشتىلەردى دە انىقتادى. جارىستىڭ ءبىرىنشى كۇنگى قورىتىندىسى بويىنشا  ءۇش ءيىندى ساتىمەن وقۋ-جاتتىعۋ مۇناراسىنىڭ 3 قاباتىنا كوتەرىلۋ سايىسى  بويىنشا جالپى كوماندالىق ەسەپتە  №1 مامانداندىرىلعان جاساق، «ءورت ءسوندىرۋشى» اق جانە №4 ءورت ءسوندىرۋ ءبولىمىنىڭ كوماندالارى جۇلدەلى ورىندارعا يە بولدى.   ەندى جارىستىڭ جالعاسى «قاجىمۇقان» جانە «دينامو» ستاديوندارىندا وتەتىن بولادى. وندا سوندىرۋشىلەر «100 مەترلىك كەدەرگىسى بار جولاقتان جۇگىرۋ» جانە «جاۋىنگەرلىك قانات جايۋ» بويىنشا   جارىسادى دەپ كۇتىلۋدە.