وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ شىمكەنت قالاسىنداعى زووباقتى قايتا قۇرۋ باعىتىنداعى جۇمىستارمەن تانىستى.

1980 قۇرىلعان زووباقتىڭ قازىرگى  ديرەكتورى نۇرعازى بۇحاربايەۆ ماسكەۋلىك ارحيتەكتورلاردىڭ قاتىسۋىمەن باقتىڭ باس كونسەنسياسى ازىرلەنگەنىن اتاپ ءوتتى. سونىمەن قاتار ول قايتا قۇرۋ جۇمىسى بويىنشا 5 جىل بۇرىن «افريكا» اۋماعى، اكىمشىلىك عيماراتى جانە «تاۋ» ەكسپوزيسياسى باستالىپ، جوسپارلى ۋاقىتىندا اياقتالعانىن جەتكىزدى. قازىرگى كەزەڭدە 9 ۆولەردىڭ قۇرىلىس جۇمىستارى ءجۇرىپ جاتقانىن ايتتى.

بۇدان بولەك، حايۋاناتتار باعىنىڭ ءىشى كوگالداندىرىلىپ، ىشكى جولدار مەن اياقجولدار بويىنا زووباق لوگوتيپى بەينەلەنگەن ورىندىقتار ورناتىلعان. ال، ورتالىق ىشكى جولدارداعى  گۇلزارلاردا جاعالاي اڭ مۇسىندەرى قويىلعان.

سيرەك كەزدەسەتىن جانە جويىلىپ بارا جاتقان جان-جانۋارلاردى ساقتاپ، ولاردى كوبەيتۋ ماقساتىندا قۇرىلعان زووباقتا بۇگىنگى تاڭدا 2،5 مىڭعا جۋىق  جان-جانۋار بار. مۇنداعى كەلۋشىلەردىڭ سانى وتكەن جىلى 426 مىڭعا جەتسە، وسى جىلدىڭ 3 ايىندا  60 مىڭنان استام ادام كەلگەن.

جانۋارلاردىڭ ءوسۋ ديناميكاسى جىل ساناپ ارتىپ، اڭ-قۇستاردىڭ ءتۇرى  75-تەن 249-عا جەتكەن. ونىڭ ىشىندە 40 شاقتىسى قىزىل كىتاپقا ەنگەن. شىمكەنت  مەملەكەتتىك  زوولوگيالىق  ساياباعىنداعى اتقارىلىپ جاتقان جۇمىسقا وڭ باعاسىن بەرگەن ايماق باسشىسى جانسەيىت تۇيمەبايەۆ قۇرىلىس جۇمىستارىن جەدەلدەتۋدى تاپسىردى.

«زووباق - بۇل قالامىزدىڭ تۇرعىندارى مەن قوناقتارىن قۋانىشقا بولەيتىن جانە ماقتان تۇتاتىن ەرەكشە جەرلەرىنىڭ ءبىرى بولۋى ءتيىس. سوندىقتان دا حايۋاناتتار باعىنداعى قۇرىلىس جۇمىستارىنىڭ بارلىق تالاپتارعا ساي جۇرگىزىلۋىنە نازار اۋدارىپ، اۋماقتى اباتتاندىرۋ جانە كوگالداندىرۋدى مىقتاپ قولعا الۋدى، ىشكى جولداردى رەتكە كەلتىرۋدى تاپسىرامىن. سونىمەن قاتار 2020 جىلعا دەيىن جان-جانۋارلار ءتۇرىن كوبەيتىپ، كەلۋشىلەر سانىن ارتتىرىڭىزدار. ال كەلۋشىلەرگە ىڭعايلى جاعداي جاساڭىزدار، ويتكەنى بۇل جەر تانىمدىق دەمالىس ورنى»، - دەدى وبلىس اكىمى.

ايتا كەتەيىك، زووباقتىڭ جالپى اۋدانى - 30 گەكتاردى قۇرايدى. ونىڭ ىشىندە ەكسپوزيسيالار 19 گەكتار جەرگە ورنالاستىرىلعان.  زووباقتا تۇياقتىلار، جىرتقىشتار، پريماتتار، قۇستار، بالىقتار، باۋىرىمەن جورعالاۋشىلار جانە قوسمەكەندىلەردى تاماشالاۋعا بولادى. سونداي-اق، مۇندا بالىقتىڭ 70 تۇرىنەن 1 254 بالىق مەكەندەيتىن اكۆاريۋم ورنالاسقان.