پرەزيدەنتتىڭ باتىس قازاقستان وبلىسىنا ساپارى جالعاسىپ جاتىر، دەپ جازادى Qamshy.kz اقپارات اگەنتتىگى.

قازاقستان پرەزيدەنتى قالاداعى ورتالىق الاڭدى ارالاپ كورگەننەن كەيىن، مەملەكەتتىك تۇرعىن ءۇي باعدارلاماسىنىڭ ىسكە اسىرىلۋ بارىسىمەن جانە ورال قالاسىن ودان ءارى دامىتۋ جوسپارىمەن تانىستى.

ەلباسى جولداۋىندا "اكىمدەر تۇرعىن ۇي-كوممۋنالدىق ينفراقۇرىلىمىن جەتىلدىرۋ ماسەلەسىن مەملەكەت-جەكەمەنشىك سەرىكتەستىگى نەگىزىندە بەلسەندى شەشۋى كەرەك"، - دەپ ايتىلعان بولاتىن.

اعىمداعى جىلى ناۋرىز ايىندا نۇرسۇلتان نازاربايەۆ باستاعان بەس الەۋمەتتىك باستاماداعى ءبىرىنشى كەزەكتەگى ماسەلە - "ءاربىر وتباسىعا باسپانا الۋدىڭ جاڭا مۇمكىندىكتەرى" بولدى. 

مەملەكەت باسشىسى ۇسىنعان 5 باستامانىڭ العاشقىسى – ەلىمىزدىڭ ءار وتباسىنا باسپانا الۋعا مۇمكىندىك بەرۋ. بىلتىردىڭ وزىندە 11،2 ميلليون شارشى مەتر تۇرعىن ءۇي پايدالانۋعا بەرىلدى. بۇل ەل تاريحىندا بولماعان رەكوردتىق كورسەتكىش. دەگەنمەن، حالىقتىڭ كوبىندە باسپانا جوق. پرەزيدەنت مۇنى ەسكەرىپ «7-20-25» باعدارلاماسىن ۇسىندى.

- جۇمىس ىستەيتىن ءاربىر قازاقستاندىق تومەندەگىدەي شارتتار بويىنشا تەڭگەمەن نەسيە الۋ مۇمكىندىگىنە يە بولادى. نەسيە ءوسىمىنىڭ مولشەرلەمەسى قازىرگىدەي 14-16 ەمەس، جىلىنا 7 پروسەنتتەن اسپايتىن بولادى. ءقازىر بانكتەر باستاپقى جارناعا باسپانا قۇنىنىڭ 30 پروسەنتىنە دەيىن، كەيدە ءتىپتى 50 پروسەنتىن سالۋدى تالاپ ەتسە، بۇل باعدارلاما بويىنشا ول 20 پروسەنتتەن اسپاۋعا ءتيىس، - دەگەن بولاتىن ەلباسى.

مەملەكەت باسشىسىنا ەسكى ۇيلەردى بۇزىپ، ورنىنا جاڭا ءۇي سالۋ، سونداي-اق الەۋمەتتىك سالا نىساندارىنىڭ قۇرىلىسىنا ينۆەستيسيا تارتۋ بارىسى جونىندە مالىمدەلدى.

سونىمەن قاتار، نۇرسۇلتان نازاربايەۆقا «اقىلدى قالا» تۇجىرىمداماسى اياسىنداعى جوبالاردىڭ ىسكە اسىرىلۋى تۋرالى باياندالدى.

ەلباسى، سونداي-اق، ءوڭىر جۇرتشىلىعىمەن كەزدەستى. وندا تۇرعىندار مەملەكەت باسشىسىنا «بەس الەۋمەتتىك باستامانىڭ» قابىلدانعانى ءۇشىن العىس ءبىلدىردى.

قازاقستان پرەزيدەنتى ەلىمىزدە جۇزەگە اسىرىلىپ جاتقان الەۋمەتتىك باعدارلامالار قوعامنىڭ، اسىرەسە جاستاردىڭ، مەيلىنشە وزەكتى پروبلەمالارىن شەشۋگە باعىتتالعانىن اتاپ ءوتتى.

نۇرسۇلتان نازاربايەۆ قازاقستان قوعامىندا بەيبىتشىلىك پەن كەلىسىمدى ساقتاۋدىڭ ماڭىزدىلىعىنا توقتالىپ، ەلىمىزدىڭ قارقىندى ەكونوميكالىق دامۋى ءۇشىن وڭىرلىك جانە حالىقارالىق ىنتىماقتاستىقتى نىعايتۋدىڭ ءمانى زور ەكەنىن ايتتى.

اڭگىمەلەسۋ سوڭىندا ەلباسى وبلىس تۇرعىندارىنا تابىس پەن باق-بەرەكە تىلەپ، قازاقستاندى وركەندەتۋ ىسىنە بەلسەندى اتسالىسۋعا شاقىردى.