ەلباسى قابىرعاعا جانە شاتىرعا ارنالعان ماتەريالدار، شىنى جانە مەتالل بۇيىمدارىن شىعاراتىن «اگران» زاۋىتىنا باردى.
قازاقستان پرەزيدەنتىنە كاسىپورىننىڭ قازىرگى دامۋ بارىسى جانە مەملەكەتتىك ينۆەستيسيالىق باعدارلامالارعا قاتىسۋ ارقىلى ونىڭ وندىرىستىك قۋاتىن ارتتىرۋ پەرسپەكتيۆالارى جونىندە مالىمدەلدى.
سونداي-اق، مەملەكەت باسشىسى كاسىپورىننىڭ وندىرىستىك ۇدەرىسىمەن تانىسىپ، دايىن ءونىم ۇلگىلەرىن كوردى.
"اگران" سەرىكتەستىگى - كوپسالالى كاسىپورىن. مۇندا جىلۋۇستاعىش اينەك پاكەتتەر شىعارىلادى. ولار جوعارى ساۋلە وتكىزگىشتىك قاسيەتكە يە. شيكىزات نەگىزىنەن رەسەيدىڭ جاقىن وڭىرلەرىنەن جەتكىزىلەدى. زاۋىتتىڭ نەگىزگى تەحنولوگيالىق قوندىرعىلارى اينەك كەسۋ، اينەك پاكەتتەرى ءوندىرىسىنىڭ اۆتوماتتى جەلىلەرىنەن جانە اينەكتى پىسىتۋ پەشىنەن تۇرادى. شاعىن زاۋىتتى سالۋعا 150 ميلليون تەڭگە قارجى جۇمسالعان. كاسىپورىننىڭ جىلدىق قۋاتى جىلىنا 200 مىڭ شارشى مەتر قۋات ۇنەمدەگىش اينەك پاكەتتەرىن شىعارۋعا مۇمكىندىك بەرەدى.
