قازاقستان مەن نيدەرلاند اراسىنداعى اۋىل-شارۋاشىلىعى ىنتىماقتاستىعى كەڭ. "نيدەرلاند - قازاقستاننىڭ باستى ينۆەستورى. بۇل ەل يننوۆاسيادا، ەكولوگيا مەن مەديسينادا الەمدە كوشباسشى سانالادى. سونداي-اق، نيدەرلاندتا اۋىل شارۋاشىلىعى سەكتورى دا وتە ءتيىمدى"، - دەگەن ەدى ەلباسى نۇرسۇلتان نازاربايەۆ.

وڭتۇستىك قازاقستان وبلىسىنىڭ اكىمى ج.تۇيمەبايەۆ نيدەرلاند كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى يان كوپ ديرك، الماتى قالاسىنداعى ەلشىلىك كەڭسەسىنىڭ ساۋدا-ساتتىق جونىندەگى مامانى ز.سادىكدجانقىزىمەن كەزدەستى. باسقوسۋدا تاراپتار ەكى ەل اراسىنداعى ەكونوميكالىق بايلانىستى نىعايتۋ، بىرلەسكەن ينۆەستيسيالىق جوبالاردى ىسكە اسىرۋ جايىن اقىلداستى، - دەپ حابارلايدى Qamshy.kz اقپارات اگەنتتىگى.

كەزدەسۋ بارىسىندا ايماق باسشىسى قوناقتاردى وڭىرىمىزگە كەلۋىمەن قۇتتىقتاپ، وبلىستىڭ ەكونوميكالىق الەۋەتىمەن جانە كاسىپكەرلەرگە جاسالىپ جاتقان مۇمكىنشىكتەرىمەن تانىستىردى.

«نيدەرلاند – قازاقستان ەكونوميكاسىنداعى ەڭ ءىرى شەتەلدىك ينۆەستور. سىزدەر جاقتان ەلىمىزگە تارتىلعان ينۆەستيسيانىڭ كولەمى 6 ملرد. اقش دوللارىنا جەتتى. وتكەن جىلدىڭ قورىتىندىسى بويىنشا ەكى ەل اراسىنداعى تاۋار اينالىمى دا اۋقىمدى، 5 ملرد. اقش دوللارىنان استى. بۇل قارىم-قاتىناس اسىرەسە ءبىزدىڭ وبلىسىمىز ءۇشىن تيىمدىلىگى ەرەكشە بولىپ وتىر. ءوڭىرىمىز اۋىل شارۋاشىلىق سالاسىنا بەيىم ايماق. وسى باعىتتا وزدەرىڭىزبەن بىرلەسە وتىرىپ، كوپتەگەن جوبالاردى جۇزەگە اسىردىق. سىزدەردى بۇدان دا تىعىز بايلانىس ورناتۋعا شاقىرامىن»، – دەدى جانسەيىت قانسەيىت ۇلى.

سونداي-اق، ءوڭىر باسشىسى قوناقتاردى وقو مەن نيدەرلاند اراسىندا ارنايى مەموراندۋم تۇزۋگە شاقىردى. كەلىسىم-شارت نەگىزىنەن اۋىل شارۋاشىلىعى سالاسىن وركەندەتۋگە باعىتتالاتىن بولادى.

ءوز كەزەگىندە يان كوپ ديرك وبلىس اكىمىنىڭ ۇسىنىسىنا قولداۋ ءبىلدىرىپ، جاڭا جوبالاردى بىرلەسىپ جۇزەگە اسىرۋعا دايىن ەكەندىكتەرىن جەتكىزدى. كەزدەسۋ سوڭىندا ايماق باسشىسى قوناقتارعا سىي-سياپات جاساپ، ەستەلىككە سۋرەتكە ءتۇستى.

نيدەرلاند اقش-تان كەيىنگى الەمدىك اۋىل شارۋاشىلىق ونىمدەرىن ەكسپورتتاۋشى. جىل سايىن 80 ملرد. ەۋرودان استام سوما كولەمىندە اۋىلشارۋاشىلىق ونىمدەرىن ەكسپورتتاپ، ەلدىڭ جالپى ىشكى ءونىمىنىڭ 10 پايىزىن قۇراپ وتىر. نيدەرلاند كورولدىگى قازاقستانعا 70 ملرد دوللاردان استام ينۆەستيسيا قۇيعان.