ماقتارال اۋدانىندا سىبايلاس جەمقورلىقتى بولدىرماۋ جانە الدىن الۋ ماقساتىندا القالى ءماجىلىس ءوتتى.  جيىنعا وقو اكىمى اپاراتىنىڭ پەرسونالدى باسقارۋ قىزمەتى ءبولىمىنىڭ باس ينسپەكتورى م. قىدىربەكوۆ،   اۋدان اكىمى ج.بەيسەنبايەۆ، اۋدان پروكۋرورى ن. اسحانبەكوۆ، ماسليحات حاتشىسى م. جايلىمشييەۆ، اۋداندىق "نۇر وتان"   پارتياسى ءتوراعاسىنىڭ ورىنباسارى ءا. بايدۋللايەۆ جانە  قۇقىق قورعاۋ ورگاندارىنىڭ، قالا، كەنت اۋىلدىق وكرۋگ اكىمدەرى، مەكتەپ ديرەكتورلارى قاتىستى.

ەلباسىمىزدىڭ "قازاقستان-2050" ستراتەگياسىندا، "100 ناقتى قادام" ۇلت جوسپارىندا بەلگىلەنگەن سىبايلاس جەمقورلىقپەن كۇرەسۋ ءىس-شارالارىنىڭ ماقتارال اۋدانىندا جۇزەگە اسۋى تۋرالى جيىندى اۋدان اكىمى ج. بەيسەنبايەۆ جۇرگىزىپ وتىردى.

ەڭ الدىمەن وقو اكىمى اپپاراتىنىڭ پەرسونالدى قىزمەت ءبولىمىنىڭ باس ينسپەكتورى احمەت ساقابايەۆقا ءسوز كەزەگى بەرىلدى. ول قوعامنىڭ دەرتىنە اينالعان سىبايلاس جەمقورلىقتىڭ الدىن الۋ بويىنشا وبلىسىمىزدا اتقارىلىپ جاتقان جۇمىستار تۋرالى بايانداما جاسادى. سونداي-اق، سىبايلاس جەمقورلىققا قارسى ءىس-قيمىل ۇلتتىق بيۋروسى وقو بويىنشا دەپارتامەنتىنىڭ ماقتارال ايماعى اۋدانارالىق باسقارماسىنىڭ اسا ماڭىزدى ىستەر جونىندەگى وفيسەرى مارات ورازوۆ ءسوز سويلەدى.

جيىن بارىسىندا سىبايلاس جەمقورلىقپەن ۇستالعان مەملەكەتتىك قىزمەتكەرلەر تۋرالى دايىندالعان ارنايى ۆيدەوروليكتەر كورسەتىلىپ، قوعامنىڭ جەگى قۇرتى سانالعان قىلمىستىڭ ەلىمىزگە كەلتىرەتىن زيانى تۋرالى ايتىلدى. سونداي-اق، ۇزاق جىلدان بەرى مەملەكەتتىك قىزمەتتە جۇرگەن اۋىلدىق وكرۋگتىڭ اكىمدەرى، مەكتەپ ديرەكتورلارى ءوز تاجىريبەلەرىمەن ءبولىسىپ، بۇل دەرتپەن كۇرەسۋدىڭ ءتيىمدى تاسىلدەرىن قوعامنىڭ نازارىنا ۇسىندى.   

ءماجىلىستى قورىتىندىلاعان اۋدان باسشىسى ج.بەيسەنبايەۆ سىبايلاس جەمقورلىققا قارسى كۇرەستى كۇشەيتۋ ماقساتىندا ارنايى 5 نەگىزگى ۇستانىمدى ۇسىندى.

"بىرىنشىدەن، قوعامنىڭ دەرتىنە اينالعان سىبايلاس جەمقورلىققا قارسى كۇرەستى ءاربىر مەملەكەتتىك قىزمەتكەر ءبىرىنشى وزىنەن باستاۋى كەرەك. ەكىنشىدەن، سىبايلاس جەمقورلىقپەن كۇرەسۋ بارلىق قازاقستان رەسپۋبليكاسى ازاماتتارىنىڭ ازاماتتىق بورىشى دەپ ءبىلۋ كەرەك. ۇشىنشىدەن، ەل بولام دەسەڭ، بەسىگىندى تۇزە دەگەندەي، ءبىز سىبايلاس جەمقورلىقپەن كۇرەستى بەسىكتە جاتقان بالادان، بالا تاربيەسىنەن، بالاباقشادان باستاپ، مەكتەپ قابىرعاسىنان، جوعارى وقۋ ورىندارىنان ءاربىر جەتكىنشەكتىڭ، ءاربىر  ءبۇلدىرشىننىڭ، ءاربىر وقۋشىنىڭ، شاكىرتتىڭ، ساناسىنا سىڭىرە بىلۋگە ءتيىسپىز. تورتىنشىدەن، ءاربىر مەملەكەتتىك قىزمەتكەر سوڭعى زاماناۋي تەحنولوگيالاردى جەتىك مەڭگەرۋى ءتيىس. كەلەشەكتە بارلىق مەملەكەتتىك قىزمەت تۇرلەرى 100 پايىز ەلەكتروندى تۇردە كورسەتىلەتىن بولادى. بەسىنشىدەن، ءاربىر مەملەكەتتىك قىزمەتكەر ادەپ كودەكسىندە كورسەتىلگەن تارتىپتەردى قاتاڭ ساقتاپ، ەل مەن حالىقپەن سويلەسكەندە اسا ۇقىپتىلىقپەن، ەرەكشە ىقىلاسپەن، ادەپتىلىكپەن سويلەسە ءبىلۋى كەرەك" - دەدى جامانتاي قاناي ۇلى.