قازاقستانداعى وزبەكستان رەسپۋبليكاسىنىڭ ەلشىلىگى مەن استانالىق «التىن وردا» بيزنەس-كلۋبى اقتوبە اپاتىندا مەرت بولعان 52 وزبەكستاندىقتىڭ رۋحىنا باعىشتاپ، 52 جەمىس اعاشىن وتىرعىزدى. بۇل تۋرالى قازاقپارات حابارلادى.

شارا اياسىندا ەلوردانىڭ جاڭا «بوتانيكالىق باعىنا» 42 الما جانە 10 شەتەن اعاشى وتىرعىزىلدى.

«التىن وردا» بيزنەس-كلۋبىنىڭ ءتوراعاسى مارحابات بالعابايدىڭ ايتۋىنشا، اكسيانىڭ رامازان ايىندا ۇيىمداستىرىلۋى تەگىن ەمەس. يدەيا نەگىزىندە ەجەلگى مۇسىلمان ءداستۇرى – جاريا-ساداقا جاتقان كورىنەدى.

«كۇزگى ۋاقىتتا پىسكەن جەمىستەردى حالىق جيناپ الادى، ساۋابى اقتوبەدە مەرت بولعان وزبەكستاندىق جولاۋشىلارعا بەرىلەدى دەپ ۇمىتتەنەمىز»، - دەدى مارحابات بالعاباي.

ايتا كەتەيىك، بيىل قاڭتاردا «سامارا-شىمكەنت» اۆتوجولىندا اۆتوبۋس ورتەنىپ، 52 وزبەكستاندىق تىرىدەي جانىپ كەتكەن. ءتىرى قالعان ءۇش جۇرگىزۋشى مەن ەكى جولاۋشى ساناۆياسيامەن وبلىس ورتالىعىنا جەتكىزىلىپ، وقيعاعا قاتىستى جاۋاپ الىندى. ناتيجەسىندە اۆتوبۋس جۇرگىزۋشىلەرى كۇدىككە ءىلىنىپ، 24 ناۋرىزعا دەيىن قاماۋعا الىنعان. كەيىن اقتوبەنىڭ №2 قالالىق سوتى سانكسيا ۋاقىتىن تاعى ءبىر ايعا ۇزارتتى.