شىمكەنت قالاسىندا كەزەكتى رەت وتكىزىلىپ جاتقان «ونەگەلى ءبىر ساعات» ءىس-شاراcىندا وبلىستىق ءدىن ىستەر باسقارماسىنىڭ مامانى مەدەت حالىقوۆ جاستار تاربيەسىندە ۇلتتىق بىرەگەيلىكتى ساقتاۋ جانە قۇندىلىقتاردى ناسيحاتتاۋ، اتا-انامەن بالا قارىم-قاتىناسىن نىعايتۋعا قاتىستى وقۋشىلارعا ءدارىس وقىدى.
-بۇگىنگى جاستار بۇرىنعىلارمەن سالىستىرعاندا وزگەشەلەۋ. ولاردىڭ ءوي-ورىسى، تالپىنىسى، ساۋىق-سايران قۇرۋى، بىلاي ايتقاندا، ادامي قۇندىلىقتارى بولەكتەۋ. ءبىراق جاستارىمىز جالپى ادامزاتتىق ماڭگىلىك رۋحاني-ادامگەرشىلىك قۇندىلىقتاردىڭ دا بار ەكەنىن ەستەن شىعارماۋلارى قاجەت. ونسىز تۇلعا تولىققاندى قالىپتاسا المايدى. جەكە ادامنىڭ، ونىڭ ساناسى مەن تۇلعاسىنىڭ قالىپتاسۋىنا اسەر ەتەتىن جاعداياتتار مول. ايتالىق، ونىڭ اتا-اناسى، ءومىر ءسۇرىپ وتىرعان ورتاسى. ادام بالاسى كۇن سايىن ءبىر نارسەگە كوڭىل ءبوءلىپ، وي تۇيەدى، ءومىر بويى وقيدى. الايدا، ادام بالاسىنىڭ تۇلعالىق سيپاتى جاس كەزىنەن باستاپ قالىپتاسادى. جاس ءسابي تابيعاتىنان تازا، پاك. بۇل - ادامنىڭ ومىردەن ءالى ەشتەڭە كورمەگەن، كوڭىلگە تۇيمەگەن شاعى. الەمدى ەندى-ەندى تاني باستايدى. مىنە، ءدال وسى كەزەڭدە اتا-انانىڭ، سودان كەيىن ءبىلىم بەرۋ مەكەمەلەرىندەگى مۇعالىمدەردىڭ بالاباقشادان باستاپ، ولاردىڭ بويىنا بىرتە-بىرتە رۋحاني-ادامگەرشىلىك قۇندىلىقتاردى ءسىڭىرىپ، جاقسىلىق پەن جاماندىقتىڭ اراجىگىن اجىراتۋعا ۇيرەتۋ - ماڭىزدى ىس-دەيدى، مەدەت حالىقوۆ.
ماماننىڭ پىكىرىنشە، وتباسىندا اتا-انا ۇل-قىزدارىنىڭ ەلدىڭ ەرتەڭىنە اينالاتىنىن، ۇلتتىڭ بولاشاعىن ايقىندايتىندىعىن ەسىنە سالىپ وتىرسا، ولاردىڭ بويىندا قوعام الدىنداعى جاۋاپكەرشىلىكتى سەزىنۋى ارتا ءتۇسەدى. ادامدار نەعۇرلىم ادامگەرشىلىك تۋىن بيىك ۇستاسا، رۋحاني كەمەلدەنىپ، بىر-بىرىنە دەگەن جاقىندىعىن، باۋىرمالدىعىن تەرەڭدەتەدى.
جيىندا جاستار تاربيەسى، اسىرەسە قىلىقتى قىزدارىمىزدىڭ، مىنەزدى ۇلدارىمىزدىڭ بويىنداعى قالىپتاسقان قاسيەتتى مىنەز-قۇلىق ماسەلەسى دە اڭگىمە وزەگىنە اينالدى. وسىناۋ مىنەز-قۇلىقتىڭ استارىندا ۇلت بولىپ ۇيىسۋدىڭ، ەلىن سۇيگەن، جەرىن سۇيگەن پاتريوتيزم تۇلعانىڭ قالىپتاسىپ كەلە جاتقانى اشىق ايتىلدى.
