شىمكەنتتەگى قورعاسىن زاۋىتى اۋماعىندا قۇلاۋعا شاق قالعان ەسكى مۇنارا مەن تەمىرجولدىڭ ۇستىندەگى كوپىر بۇزىلاتىن بولدى. بۇل تۋرالى قالالىق توتەنشە جاعدايلار باسقارماسىنىڭ باستىعى ماديار جاقسىبايەۆ مالىمدەدى.

باسقارما باستىعىنىڭ سوزىنشە، قالالىق اكىمدىكتە مۇنارا مەن كوپىرگە قاتىستى توتەنشە جاعدايلاردىڭ الدىن الۋ جانە جويۋ جونىندەگى كوميسسياسىنىڭ شۇعىل وتىرىسى وتكەن.  كەڭەسكە قالا باسشىلارى مەن پروكۋراتۋرا قىزمەتكەرلەرى، «يۋجپوليمەتالل» اق مەن «فورتە بانك» وكىلدەرى،  «قازاقستان تەمىرجولى» اق مەن توتەنشە جاعدايلار قىزمەتكەرى قاتىسقان. وندا ءقاۋىپتى نىسانداردى زاۋىت قوجايىنى «فورتە بانككە» كەپىلدىككە قويىپ جىبەرگەندىكتەن، بۇزۋ مۇمكىن بولماي تۇرعانى ايتىلدى.  دەگەنمەن، قارجى ۇيىمى الىپ نىساندى بۇزۋعا قارسى ەمەستىگىن ءبىلدىردى. تەك، ونىڭ شىعىنىن تولەۋدى تالاپ ەتتى. ياعني، توتەنشە جاعدايلار قىزمەتى مۇرجا مەن اسپالى كوپىردىڭ بۇزۋ شىعىنىن تاۋەلسىز ساراپشىلارعا ەسەپتەتىپ، تاراپتار ورتاق كەلىسىمگە كەلمەكشى.   

«جينالىس قورىتىندىسى بويىنشا، ەكى نىساندى اپاتتىق جاعدايدا دەپ جاريالاندى. كوميسسيالىق اكت ءتۇزىلىپ، «فورتە بانكپەن» رۇقسات بەرىلگەنى تۋرالى كەلىسىم شارت جاسالدى. سونداي-اق بۇگىن ەرتەڭ «قازاقستان تەمىرجولى» ۇلتتىق كومپانياسىنا حات پەن قۇجاتتار جولداپ، تەمىرجولدىڭ ۇستىنەن وتەتىن كوپىردى بۇزۋ ماسەلەسى بويىنشا كەلىسسوزدەر جۇرگىزىلەدى. ارى قاراي، زاۋىتتىڭ اۋلاسىندا ورنالاسقان مۇرجانى بۇزۋ ماسەلەسى قاراستىرىلادى»، - دەدى ماديار جاقسىبايەۆ.

ەستەرىڭىزگە سالا كەتەيىك، قورعاسىن زاۋىتىنداعى ەسكى مۇنارا مەن تەمىرجول ۇستىندەگى كوپىر ابدەن توزىعى جەتىپ، قۇلاۋعا شاق قالعان بولاتىن. بيىكتىگى 160، اۋدانى 30 مەتر بولاتىن الىپ مۇنارا وتكەن عاسىردىڭ 30-شى جىلدارى سالىنعان. اينالاسى كىرپىشپەن ءورىلىپ، ورتاسى قالىڭ سىم تەمىرمەن بەكىتىلگەن مۇنارا كەيىن قاراۋسىز قالىپ، ونى تۇرعىندار قالىڭ ارماتۋراسىن الۋ ءۇشىن ارنايى تەحنيكانىڭ كومەگىمەن قازىپ تاستاعان. سالدارىنان مۇنارا ءبىر جاعىنا قاراي قيسايىپ، اينالاسىنا ءقاۋىپ توندىرگەن ەدى. ماماندار ول قۇلاعان جاعدايدا اينالاسىنداعى تۇرعىن ۇيلەر مەن تەمىر جولعا كەسىرىن تيگىزۋى مۇمكىن ەكەنىن ەسكەرتكەن.

ال، تەمىرجول ۇستىندەگى  اسپالى كوپىر دە اپاتتى جاعدايعا جەتكەنى بەلگىلى.  ونىڭ دا كەيبىر ادامدار تىرەۋلەرىن كەسىپ اكەتكەن. كوپىر قۇلايتىن بولسا، تاۋلىگىنە 60 جۇك جانە جولاۋشىلار پويىزىنىڭ قاتىناسى ۇزىلەتىن ەدى.