وڭتۇستىك قازاقستان وبلىسىندا اعىمداعى جىلى ورمان قورى جەرىنىڭ 10 500 گەكتارىنا سەكسەۋىل تۇقىمى سەبىلەدى. وڭىردەگى ورمان تۇقىمباقتارىنداعى كوشەتتەردىڭ سانىن بيىل 20 ميلليونعا جەتكىزۋ جوسپارلانعان. بۇل تۋرالى وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ ماماندارى ءمالىم ەتتى.
مامانداردىڭ ايتۋىنشا، وبلىستا مىڭ گەكتار جەرگە مادەني ەكپەلەر ەگىلىپ، 5،5 مىڭ گەكتار القاپقا ورماننىڭ تابيعي ۇرپاقتانۋىنا ىقپال جاساۋ جۇمىستارى جۇرگىزىلەتىن بولادى. اتالعان جۇمىستار قازاقستان رەسپۋبليكاسىنىڭ «جاسىل ەكونوميكاعا» كوشۋى جونىندەگى تۇجىرىمداماسىنىڭ 2013-2020 جىلدارعا ارنالعان ءىس-شارا جوسپارىنىڭ «ەكوجۇيەلەردى باسقارۋ» ءبولىمىن ىسكە اسىرۋ اياسىندا اتقارىلماق. جاسىل ەكونوميكاعا كوشۋ بويىنشا بۇدان باسقا وبلىستاعى ەلدى مەكەندەردى كوگالداندىرۋ ماقساتىندا 2017-2021 جىلدارعا ارنالعان «شاتقال» ءىس-شارا جوسپارى بەكىتىلگەن. الداعى بەس جىل ۋاقىت ارالىعىندا وبلىستىڭ ەلدى مەكەندەردەگى 36 659 گەكتار بولاتىن جەرگە 15،5 ملن ءتۇپ اعاش كوشەتتەرى وتىرعىزىلاتىن بولادى.
