وڭتۇستىك قازاقستان وبلىسىندا ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا بىرلىكتىڭ باستاۋى بولعان ورداباسىداعى تاريxي قورىقتى تۋريزم ورتالىعىنا اينالدىرۋ جۇمىستارى باستالدى. بۇگىندە قۇرىلىس جۇمىستارى قارقىن العان اتالعان جوبانىڭ جۇمىسىمەن وبلىس اكىمى جانسەيىت تۇيمەبايەۆ ارنايى بارىپ تانىسىپ قايتتى.

ايماق باسشىسىنىڭ باستاماسىمەن قولعا الىنعان جوبا اياسىندا كەلۋشىلەر ءۇشىن جاياۋ جۇرگىنشىلەر جانە اۆتوموبيل جولدارى مەن جوبانىڭ ەكىنشى كەزەڭىندە ەتنوقالاشىق، مۋزەي، امفيتەاتر سالۋ جوسپارلانۋدا. وسىلايشا تاريحي ايماق جاڭعىرتىلا وتىرىپ، تۋريستەر كەلىپ تاماشالايتىنداي اباتتاندىرىلعان ورىنعا اينالماق.

«ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان تاريحتا ءتۇرلى ءرول اتقارعان قاسيەتتى ورىنداردى قولعا الىپ، ونى دامىتۋ ارقىلى كەلەشەك ۇرپاقتىڭ بويىنا ءسىڭىرۋ جانە سونىڭ اياسىندا وتاندىق ءتۋريزمدى دە دامىتۋ قاجەت. ال ورداباسى تاۋى - حالىق كەلىپ دەمالاتىن ورىن بولۋى كەرەك. سوندىقتان دا مۇنداعى ءاربىر جۇمىسقا نازار سالىپ، قۇرىلىستى ساپالى جۇرگىزۋدى تاپسىرامىن»،-دەدى وبلىس اكىمى.

ايتا كەتەيىك، وبلىستىق ساۋلەت جانە قالا قۇرىلىسى باسقارماسىنىڭ مالىمەتىنشە، جالپى قورىق اۋماعىندا جوسپارلانعان جوبالاۋ جۇمىستارى 85،9 گەكتاردى قامتيدى. ونىڭ ىشىندە جاياۋ جۇرگىنشىلەرگە ارنالعان جولدىڭ ۇزىندىعى 2415،4 مەتردى، ال اۆتوموبيل جولىنىڭ ۇزىندىعى 3129،5 مەتردى قۇرايتىن بولادى.