شىمكەنت قالاسىنىڭ اكىمى نۇرلان ساۋرانبايەۆ وزىنە ايتىلعان سىننان سوڭ قازاقشا كىتاپتار وقىپ جۇرگەنىن ايتتى. بۇل تۋرالى شاھار باسشىسى ب ا ق وكىلدەرىمەن كەزەكتى رەت قالا ارالاۋعا شىققان كەزدە ايتتى.

نۇرلان ساۋرانبايەۆ قازاق تىلىندە جاقسى سويلەي الماعانىن سىناعاندارعا العىسىن ءبىلدىرىپ، ول ارەكەتتەرى وزىنە جىگەر سىيلاعانىن اتاپ ءوتتى.  وسىدان كەيىن ابايدىڭ كىتاپتارىن وقىپ، ءتىلىن جەتىلدىرىپ جاتقانىن جەتكىزدى.

«ونى جازعان جىگىتتەرگە راقمەت ايتقىم كەلەدى. شىنى كەرەك، ماعان ۇلكەن موتيۆاسيا سىيلادى. قانداي سىن بولسا دا، دۇرىس قابىلداۋ كەرەك قوي. سول سىننان سوڭ 8-9 شاقتى كىتاپ وقىپ شىقتىم. ونىڭ ىشىندە ابايدىڭ قارا سوزدەرى دە بار»، - دەدى شىمكەنت باسشىسى.

بۇدان بولەك، نۇرلان ساۋرانبايەۆ دومبىرا ۇيرەنىپ جۇرگەنىن دە ايتىپ قالدى.

«دومبىرا تارتۋدى ۇيرەنىپ ءجۇرمىن. ءقازىر «تۇركىمەن» كۇيىن تارتا الامىن. «ءحافيزدى» ۇيرەنىپ جاتىرمىن»، - دەدى ول.

ەسكە سالا كەتسەك، شاھار باسشىسى وسى جىلدىڭ قاڭتار ايىندا قالاداعى اۋدانداردىڭ ءبىرىنىڭ اكىمىنە ەسەپتى تەك قازاق تىلىندە جاساعانىنا ەسكەرتۋ جاساعان بولاتىن. ول سونداي-اق ءوزىنىڭ حالىق الدىنداعى ەسەپ بەرۋ جيىنى كەزىندە ويىن قازاقشا جەتكىزەمىن دەپ، الەۋمەتتىك جەلىلەردە «جۇلدىز» بولعان ەدى. قازاق تىلىنە قاتىستى سىناعان تۇرعىنعا اكىم ولەڭ شۋماقتارىمەن جاۋاپ بەرگەن ەدى.

«قايرات دەگەن اتىم بار، قازاق دەگەن زاتىم بار، ەركەك توقتى قۇرباندىق. اتام دەسەڭ اتىڭدار!». ەندەشە راسۋل گامزاتوۆتىڭ ءسوزى بار «ەگەر مەنىڭ ءتىلىم ەرتەڭ جويىلاتىن بولسا، مەن بۇگىن ولۋگە دايارمىن» دەگەن. بۇل جەردە مەن سىزگە كومەكشى بولامىن، اعا. بىرگە جۇمىس ىستەيىك»، - دەگەن ەدى اكىم ساۋرانبايەۆ.