شىمكەنتتە 1 عاسىردان استام ۋاقىتتان بەرى تۇرعان تۇركىستان مونشاسىن بۇزىپ جاتىر.
«ءقازىر جۇمىسشىلار مونشانىڭ توبەسىن اشۋعا كىرىستى. عيماراتتىڭ يەسىنە وتەماقى تولەنگەن»، - دەيدى قالا اكىمدىگىنىڭ وكىلدەرى.
ايتا كەتەيىك، ءحىح عاسىردىڭ ەكىنشى جارتىسىندا سالىنعان مونشا تۇركىستان كوشەسىندەگى ەڭ كونە عيمارات ەدى.
ونى بۇزۋ جوسپارى 2014 جىلى قۇرىلعان بولاتىن. سول كەزدە مونشانى بۇزۋ قونايەۆ داڭعىلىن ۇزارتۋ ءۇشىن قاجەت ەكەنى ايتىلعان. ساۋلەتكەرلەر وسى ورتالىق كوشەنى اقتاس شاعىن اۋدانىنا دەيىن ۇزارتپاق.
اكىمدىك باسپا ءسوز قىزمەتىنىڭ مالىمدەۋىنشە، ول ءۇشىن ەسكى قالا اۋدانىنداعى 73 تۇرعىن ءۇيدى بۇزۋعا تۋرا كەلەدى. قازىرگە دەيىن سونىڭ 33ء-ىنىڭ يەسىنە وتەماقى تولەنگەن.
