وڭتۇستىك قازاقستان وبلىسىندا كاسىپكەرلەرگە مەملەكەت تاراپىنان بولىنەتىن قارجىلاردى الۋعا كەدەرگىلەر كوپ. بۇل تۋرالى وبلىستىق كاسىپكەرلەر پالاتاسىندا وتكەن كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەستىڭ كەزەكتى وتىرىسىندا ايتىلدى.
جيىنعا قاتىسقان وبلىستىق كاسىپكەرلەر پالاتاسى ماماندارىنىڭ سوزىنشە، اگروونەركاسىپتىك باعدارلامالاردى دامىتۋ اياسىندا نەسيەلەۋ بويىنشا قارجى ينستيتۋتتارى تاراپىنان كوپتەگەن قيىندىقتار تۋىنداۋدا. سوڭعى ۋاقىتتا وڭىرلىك پالاتاعا ىسكەر ازاماتتاردان «اۋىل شارۋاشىلىعىن قارجىلاي قولداۋ قورى» مەن «ميكروقارجى ۇيىمى» جانە «ىرىس» قارجى ۇيىمدارىنىڭ قىزمەتىنە قاتىستى ارىز-شاعىمدار كوپتەپ تۋسۋدە. ماسەلەن، اتالعان قارجىلىق ۇيىمدار كاسىپكەرلەرگە كەپىلدىك مۇلىكتى ساقتاندىرۋدى جانە باعالاۋدى تەك وزدەرى بەلگىلەپ بەرگەن ساقتاندىرۋ جانە باعالاۋ كومپانيالارىندا عانا جۇرگىزۋگە ماجبۇرلەيدى. شارۋالار شالعاي اۋدانداردا تۇرعاندارىنا قاراماستان مۇلىكتەرىن باعالاتۋ ءۇشىن وبلىس ورتالىعىنا سابىلۋعا ءماجبۇر.
ماسەلەن، تۇركىستان قالاسىندا ەكى باعالاۋشى كومپانيانىڭ بولۋىنا قاراماستان، «اۋىل شارۋاشىلىعىن قارجىلاي قولداۋ قورى» اق جانە «ىرىس» مقۇ» وكىلدەرى كاسىپكەرلەردى شىمكەنت قالاسىنداعى «پرەميۋم باعالاۋ» جانە BION GROUP كومپانيالارىندا عانا باعالاۋ جۇرگىزۋگە ءماجبۇر ەتەدى. ول ازداي كاسىپكەرلەر ميكروكرەديتتەۋ تۋرالى ءوتىنىشتى قاراستىرۋ الدىندا ۇلكەن شىعىندار جاساۋلارىنا تۋرا كەلەدى. كەپىلدىكتى باعالاۋ مەن نوتاريالدى كۋالاندىرۋ ءۇشىن كوپ قاراجات جۇمساعانىمەن، ءتيىستى كوميسسيا ول ازاماتقا قارىز بەرۋدەن باس تارتادى. سونىمەن بىرگە، قۇجاتتاردى دايىنداۋ كەزىندە ءبىراز قارجىلار جۇمسالعانىمەن ول كاسىپكەر ءۇشىن قايتارىلمايتىن شىعىن بولىپ تابىلادى.ءقازىر وڭىردە ونداعان كاسىپكەرلەر پالاتادان وسى ماسەلەلەرگە ارالاسىپ، وعان قاتىستى دۇرىس شەشىم قابىلدانۋىنا قولداۋ كورسەتۋىن سۇراپ وتىر.
«كەڭەس وتىرىسىنىڭ ناتيجەسى بويىنشا كاسىپكەرلەر پالاتاسى تاراپىنان وبلىستىق پروكۋراتۋراعا، وبلىستىق مەملەكەتتىك كىرىستەر دەپارتامەنتىنىڭ باسشىلىعىنا جانە اۋىل شارۋاشىلىعىن قولداۋ قورىنىڭ باسشىلىعىنا ءتيىستى ۇسىنىستار ەنگىزىلەتىن بولادى. ناقتى ماقساتىمىز - قويىپ جاتقان كاسىپكەرلەردىڭ قۇقىعىن قورعاپ، زاڭبۇزۋشىلىققا جول بەرمەۋ»،- دەيدى وبلىستىق كاسىپكەرلەر پالاتاسىنىڭ ءبولىم باستىعى سابيرا ادامبەكوۆا.
