سوزاق اۋدانىنىڭ ورتالىعىنداعى تاۋەلسىزدىك ساياباعىندا ءۇش ايدان بەرى ءوتىپ جاتقان "تەرىسكەي تالانتتارى-2018" حالىق ونەر فەستيۆالىنىڭ "حالىق-ونەر قاينارى" اتتى ۇجىمدىق كوركەمونەرپازدار بايقاۋى سىزعان، جۋانتوبە اۋىلدىق وكرۋگتەرى ونەرپازدارىنىڭ كونسەرتىمەن جالعاستى.

ەلباسى نۇرسۇلتان ءابىش ۇلى نازاربايەۆتىڭ  "بولاشاققا باعدار: رۋحاني جاڭعىرۋ" باعدارلامالىق ماقالاسى اياسىندا تۋعان جەردىڭ رۋحاني، مادەني قۇندىلىقتارىن كەڭىنەن ناسيحاتتاۋ جانە استانانىڭ 20 جىلدىعى مەن سوزاق اۋدانىنىڭ 90 جىلدىعىنا ارناپ ۇيىمداستىرىلعان فەستيۆال بارىسىندا اۋدانداعى ءاربىر اۋىلدىق وكرۋگتە ونەردىڭ بارلىق جانرى بويىنشا ءىس-شارالار ءوتىپ، قورىتىندى گالا-كونسەرتتى ورتالىقتا وتكىزۋ مىندەتتەلگەن بولاتىن.

وسى ورايدا، اتالعان قوس اۋىلدىق وكرۋگ كەزەگىمەن ءوز باعدارلامالارىن ۇسىندى.

ايتا كەتەرلىگى، جۋانتوبە اۋىلى مادەني ءىس-شارانى تۇڭعىش رەت كەڭ كولەمدە وتكىزىپ، ەلگە ەرەكشە اسەر قالدىرعان. 2000-نان اسا حالقى بار ەلدىمەكەننەن 100-دەن اسا ونەرپاز جۇمىلدىرىلىپ، "ۇشكوكشە اۋەنى-جۋانتوبە" اتتى مەرەكەلىك شارادا تەرىسكەي توسىندەگى تاسادا جۇرگەن تالانتتار كيەلى ساحنا تورىنە شىعىپ  اسەم ءان ايتىپ، مىڭ بۇرالا بي دە بيلەدى. اسىرەسە، "رۋحاني جاڭعىرۋ"، استاناعى - 20جىل"، "سوزاققا - 90 جىل" فلەشموبى مەن جەرگىلىكتى اقىن-سازگەرلەردىڭ اندەرى، مەكتەپ ۇستازدارىنىڭ ينتەرمەدياسى، ءوڭىردىڭ سۇلۋ ءسوز زەرگەرلەرى جۇپار جۇزبايەۆا مەن قىزى ءجاۋدىر جۇبانىشيەۆانىڭ "جۋانتوبە" شىعارمالارى قارت قاراتاۋ قويناۋىندا مامىراجاي كۇن كەشىپ جاتقان مەيىربان دا ەڭبەكقور، تاتۋلىعى مەن اۋىزبىرلىگى بەكەم حالىقتىڭ قاسيەتىن، جەردىڭ ەرەكشەلىگىن، تابيعي قالپىن كورەرمەن كوڭىلىنە ونەر ارقىلى قوندىرا ءبىلدى.

"جۋانتوبە اۋىلىنان شىققان قانشاما ءانشى، اقىن، سازگەرلەر جەتەرلىك. بۇگىنگى بايقاۋدا بارىنشا تاقىرىپتى اشۋعا تىرىستىق. اۋىلدىق وكرۋگتىڭ تاريحى مەن تىنىس-تىرشىلىگىن، قولونەر جانە قىلقالام شەبەرلەرىنىڭ ەڭبەگىن كورسەتەتىن كورمە ۇيىمداستىرۋمەن قاتار، ەڭكەيگەن قارتتان جۇگىرگەن بالاعا دەيىن اۋدان ورتالىعىنان 150 شاقىرىم جەردەن 30-عا جۋىق كولىكپەن كەلدىك. قاريالارىمىز اۋىلدان ءوسىپ كەلە جاتقان جاس دارىنداردى بۇگىن كورىپ، قۋانىپ،  اق باتالارىن بەرىپ جاتقانىن دا كوردىڭىزدەر. ۇلكەن ساحناعا شىعىپ، ءدۇيىم حالىق الدىندا تۇساۋى كەسىلىپ جاتقان جاس تالانتتارىمىزدىڭ باعى جانا بەرەتىنىنە سەنىمىم مول"-دەيدى، جۋانتوبە اۋىلدىق وكرۋگىنىڭ اكىمى ابرايەۆ ءداۋىرجان جولداس ۇلى.

كەرۋەندەتە جەتكەن مەرەكەلىك كەشكە رەسپۋبليكاعا تانىمال ءانشى، جۋانتوبە اۋىلىنىڭ تۋماسى مارات يماشوۆ تا قاتىسىپ، ەلگە ونەر سالەمىن جولدادى.

فەستيۆال جەڭىمپازدارى 1 ماۋسىم كۇنى "تەرىسكەي تالانتتارى-2018" بايقاۋىنىڭ قورىتىندى گالا-كونسەرتىندە اۋدان اكىمىنىڭ قوماقتى سىيلىعىمەن ماراپاتتالاتىن بولادى .