وڭتۇستىك قازاقستان وبلىسىنىڭ تۇلكىباس اۋدانىندا ايماق باسشىسى جانسەيىت تۇيمەبايەۆ مادەنيەت جانە ونەر سالاسىنداعى قىزمەتكەرلەرمەن كەزدەستى.

باسقوسۋدا وبلىس اكىمى ونەر ازاماتتارىن كاسىبي مەرەكەمەن قۇتتىقتاپ، ءوڭىردىڭ رۋحاني دامۋى مەن مادەني گۇلدەنۋىنە ايتۋلى ۇلەس قوسىپ جۇرگەندەرى ءۇشىن العىسىن ءبىلدىردى.

«ەلباسىمىز نۇرسۇلتان ءابىش ۇلى نازاربايەۆ تاۋەلسىز ەلىمىزدە مادەنيەتتىڭ، ۇلتتىق ونەرىمىز بەن سالت-داستۇرلەرىمىزدىڭ وسىپ-وركەندەۋىنە، وتكەنىن جاڭعىرتا وتىرىپ جاڭاشا باعىتتا جۇمىس جاساۋعا ەرەكشە ءمان بەرىپ، ۇنەمى نازاردا ۇستاپ كەلە جاتقانى بارشامىزعا ايان. ەلىمىزدىڭ بولاشاعى جەكە تۇلعانىڭ مادەنيەتتىلىگىنە بايلانىستى. جەكە تۇلعا مەن قوعامنىڭ ساياسي، ەڭبەك، قارىم-قاتىناس مادەنيەتىن قالىپتاستىراتىن ارنايى مەكەمەلەر مەن الەۋمەتتىك ورتا. سول مەكەمەلەردىڭ ءبىرى مادەنيەت وشاقتارى بولسا، ادامدى رۋحاني ازىققا بولەيتىن مادەنيەت پەن ونەر قىزمەتكەرلەرى»، - دەدى جانسەيىت تۇيمەبايەۆ.

«مادەني قىزمەت -مەرەيلى مىندەت» تاقىرىبىندا وتكەن مەرەكەلىك كەشتە وبلىس مادەنيەتىنىڭ دامۋىنا سۇبەلى ۇلەس قوسقان 49 ونەر قىزمەتكەرى «وبلىسقا سىڭىرگەن ەڭبەگى ءۇشىن» مەدالىمەن، وبلىس اكىمىنىڭ قۇرمەت گراموتاسىمەن جانە العىس حاتىمەن، وبلىس اكىمىنىڭ ارنايى سىيلىعى، وبلىستىق ءماسليحات گراموتاسى، «نۇر وتان» پارتياسى وبلىستىق فيليالى العىس حاتىمەن ماراپاتتالدى.

بۇدان بولەك، شارا بارىسىندا زيالى قاۋىم قكىلدەرى مەن ونەر ادامدارى ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ وڭىردە جۇزەگە اسىرىلۋى جايىندا ءوز ويلارىن ايتىپ، مادەنيەت سالاسىنىڭ دامۋى باعىتىندا ۇسىنىستارىن جەتكىزدى.

ايتا كەتەيىك، بۇگىندە وبلىستاعى مادەنيەت سالاسىندا 5 مىڭعا جۋىق قىزمەتكەر ابىرويلى جۇمىس اتقارىپ كەلەدى. ال حالىققا 736 مادەنيەت جانە ونەر مەكەمەلەرى قىزمەت ەتۋدە. اتالعان ۇيىمداردىڭ قاتىسۋىمەن وتكەن جىلى 31 مىڭنان اسا ءىس-شارالار وتكىزىلدى. ءىس-شارالار نەگىزىنەن «ەكسپو-2017» حالىقارالىق مامانداندىرىلعان كورمەسى، «تۇركىستان - تۇركى الەمىنىڭ مادەني استاناسى» جىلى جانە ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇيىمداستىرىلدى.

سونىمەن قاتار، «رۋحاني جاڭعىرۋ» باعدارلامالىق ماقالاسىنداعى «جاھاندىق زاماناۋي قازاقستاندىق مادەنيەت» باعىتى بويىنشا وبلىسىمىزدىڭ مادەنيەتى مەن ونەرىن شەتەلدەرگە تانىستىرۋ ماقساتىندا وسى جىلى ش.قالداياقوۆ اتىنداعى وبلىستىق فيلارمونيانىڭ انشىلەرى مەن «قازىنا» بي ءانسامبلى تۇركيا رەسپۋبليكاسىنداعى «كاستامونۋ - تۇركى الەمىنىڭ مادەني استاناسى» جىلىنىڭ اشىلۋ سالتاناتىنا جانە حالىقارالىق ناۋرىز مەرەكەسىنە قاتىسىپ، 6 مەملەكەتتە ونەر كورسەتتى.

سونىمەن بىرگە، وبلىسىمىزدىڭ ونەرپازدارى فينليانديادا وتكەن «جۇمباق جىبەك جولى» حالىقارالىق فەستيۆالىنە قاتىستى. ال يتاليانىڭ پەزارو قالاسىندا وتكەن XV «چيتتا دي پەزورو» حالىقارالىق ۆوكاليستەر بايقاۋىندا جاس ونەرپازدارىمىز كارينا ناجمەددينوۆا جانە نۇرقانات تاپيۆتەر ءى ورىنعا يە بولىپ، يتاليادا 1 جىل تەگىن وقۋعا شاقىرتۋ الدى.