وڭتۇستىك قازاقستان وبلىسىندا قۇقىقبۇزۋشىلىق پروفيلاكتيكاسى جونىندەگى ۆەدومستۆوارالىق كوميسسياسى مەن زاڭدىلىقتى، قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ بىرلەسكەن وتىرىسى ءوتتى.

ايماق باسشىسى جانسەيىت تۇيمەبايەۆتىڭ توراعالىعىمەن وتكەن وتىرىسقا ۆەدومستۆوارالىق كوميسسيا مۇشەلەرى، وبلىستىق باسقارما باسشىلارى، اۋدان، قالا اكىمدەرى جانە پروكۋرورلار، ىشكى ىستەر ورگاندارىنىڭ، جەرگىلىكتى پوليسيا قىزمەتىنىڭ باسشىلارى قاتىستى.

جيىندا ءمالىم بولعانداي وبلىس اۋماعىندا اعىمداعى جىلدىڭ 4 ايىندا وتكەن جىلدىڭ وسى كەزەڭىمەن سالىستىرعاندا جالپى قۇقىقبۇزۋشىلىق 8،8 پايىزعا تومەندەگەن. الايدا باياندامانى تىڭداعان وبلىس اكىمى جەرگىلىكتى پوليسيا قىزمەتى قۇرىلعان 2016 جىلدان بەرى باسشىلىعى حالىق الدىندا ەسەپ بەرمەگەنىن اتاپ ءوتتى. سونىمەن بىرگە ايتىلعان تاپسىرمانىڭ ءتيىستى دەڭگەيدە ورىندالمايتىنىنا توقتالىپ، قۇقىقبۇزۋشىلىقتى الدىن-الۋ بويىنشا جۇمىستاردى شيراتۋدى تاپسىردى.

جيىندا قارالعان باسقا دا ماسەلەلەردى مۇقيات تىڭداعان ايماق باسشىسى ءتيىستى سالا باسشىلارىنا كامەلەتتىك جاسقا تولماعان جاسوسپىرىمدەردىڭ دەمالىس ۋاقىتىن ءتيىمدى وتكىزۋىن ۇيىمداستىرۋدى، جاسوسپىرىمدەرمەن جاسالاتىن قىلمىستى بولدىرماۋ ءۇشىن جاسالعان الدىن الۋ شارالارىنىڭ تيىمدىلىگىن زەردەلەۋدى جۇكتەدى. جاڭا ادىس-تاسىلدەردى ازىرلەۋدى تاپسىردى.

قىلمىستاردىڭ باسىم كوپشىلىگى جۇمىسپەن قامتىلماعاندار ازاماتتار تاراپىنان جاسالاتىنىن ايتقان وبلىس اكىمى حالىقتى جۇمىسپەن قامتۋعا باعىتتالعان مەملەكەتتىك باعدارلامالاردىڭ ساپالى ورىندالۋىن باقىلاۋعا الىنۋىن، ءتيىستى باسقارمامەن بىرلەسىپ جۇمىسسىزداردىڭ سانىن تومەندەتۋ بويىنشا جوسپارلى تۇردە ناقتى ءىس-شارالار جۇرگىزۋدى جۇكتەدى. وبلىس پروكۋراتۋراسىمەن بىرلەسكەن وتىرىستى قورىتىندىلاعان جانسەيىت تۇيمەبايەۆ ءماجىلىس بارىسىندا ايتىلعان كەمشىلىكتەر مەن سىن-ەسكەرتپەلەردى حاتتاماعا ەنگىزىپ، وڭ ناتيجەلى جۇمىستاردى اتقارۋدى تاپسىردى.