شىمكەنت مۇناي وڭدەۋ زاۋىتىندا جۇرگىزىلگەن كۇردەلى جوندەۋ جۇمىستارى اياقتالدى.

«پەتروقازاقستان ويل پروداكتس» ج ش س باسپا ءسوز قىزمەتىنىڭ مالىمەتىنشە، زاۋىتتىڭ ءارى قاراي ۇزاق مەرزىمگە توقتاۋسىز جانە اپاتسىز جۇمىس ىستەۋىن قامتاماسىز ەتۋ ماقساتىندا نەگىزگى جانە قوسالقى سەحتاردىڭ تەحنولوگيالىق جانە سوراپتى-كومپرەسسورلىق جابدىقتارى جوندەلگەن. قۇبىر جەلىلەرى مەن وندىرىستىك پەشتەرى، ەلەكتر جابدىقتارى مەن باقىلاۋ-ولشەۋ اسپاپتارى، سونداي-اق اۆتوماتيكا قۇرالدارى تەحنيكالىق كۋالاندىرۋدان جانە جوندەۋدەن وتكىزىلگەن. بۇدان بولەك، بىرلەسىپ جۇمىس جۇرگىزۋ جوسپارىنا سايكەس ارەكەتتەگى تەحنولوگيالىق قوندىرعىلار مەن زاۋىتتى جاڭعىرتۋ جوباسى اياسىندا سالىنعان ءىرى تەحنولوگيالىق نىساننىڭ - RFCC كاتاليتيكالىق كرەكينگ قوندىرعىسى كەشەنىنىڭ جاڭا قوندىرعىلارىن بىر-بىرىنە بىرىكتىرىپ، قوسۋ جۇمىستارى جۇرگىزىلدى. كۇردەلى جوندەۋ جۇمىستارى اياقتالعاننان كەيىن ءوندىرىستىڭ تەحنولوگياسىنا جانە قاۋىپسىزدىك ەرەجەلەرىنە سايكەس زاۋىتتىڭ تەحنولوگيالىق قوندىرعىلارى ىسكە قوسىلىپ، تاۋارلى ءونىم شىعارىلا باستاعان. 

ايتا كەتەيىك، بۇعان دەيىن اتالعان زاۋىتتىڭ كۇردەلى جوندەۋ جۇمىستارىنىڭ باستالۋىنا بايلانىستى ۋاقىتشا توقتاتىلعانىن حابارلاعان بولاتىنبىز. زاۋىتتى جاڭعىرتۋ جۇمىستارى بارىسىندا RFCC كاتاليتيكالىق كرەكينگ كەشەنىنىڭ جاڭا نىساندارى مەن شىمكەنتتىك ءموز-دىڭ قولدانىستاعى نىساندارىن ينتەگراسيالاۋ بويىنشا ءىس-شارالاردى اتقارۋ جوسپارلانعان ەدى.