بيىل بقو-دا  «بيزنەس باستاۋ» باعدارلاماسى بويىنشا 2071 ادامدى وقىتۋ جوسپارلانعان. بۇل كورسەتكىش بىلتىر 938 ادامدى قۇراعان بولاتىن. بۇل تۋرالى ءبىرقاتار ماسەلەلەردى كوتەرگەن بقو كاسىپكەرلەر پالاتاسى ديرەكتورىنىڭ مىندەتىن اتقارۋشى ساكەن كارين، وڭىردەگى كاسىپكەرلىك سەكتورىن، سونداي-اق شاعىن جانە ورتا بيزنەستى دامىتۋ تۋرالى ۇسىنىستارىمەن ءبولىستى.

ساكەن ءابۋحان ۇلى ايتىپ وتكەندەي، سوڭعى جىلدارى شاعىن جانە ورتا كاسiپورىنداردىڭ وبلىستىڭ ەكونوميكاسىنا قوسقان ۇلەسi ايتارلىقتاي وسكەن. 2016 جىلى وڭىردەگى شاعىن جانە ورتا بيزنەس قۇرىلىمىنداعى جالپى وڭىرلىك ءونىم ۇلەسى 42% قۇراعان ەكەن. سوڭعى ەكى جىلدا ساۋدا اينالىمى ديناميكاسى ەكسپورتتىڭ 31%-عا وسكەنىن، يمپورتتىڭ 5،6%-عا تومەندەگەنىن كورسەتەدى.

اعىمداعى جىلدىڭ 1 توقسانىندا كاسىپكەرلىكتى قورعاۋ سالاسىندا 71 جازباشا ءوتىنىش قارالىپ، ونىڭ 30-ى (42%) وڭ شەشىمىن تاپقان. قورعالعان مەنشىك قۇقىعى 107 ملن. تەڭگەنى قۇراپ وتىر. وتكەن جىلى جازباشا وتىنىشتەردىڭ ازايعانى بايقالادى. وبلىستا مەملەكەتتىك-جەكە مەنشىك ارىپتەستىكتى دامىتۋ باعىتىندا دا جوسپارلى جۇمىستار قولعا الىنعان. بۇگىندە بۇل سالا بويىنشا جالپى سوماسى 19 125 495 مىڭ تەڭگەنى قۇرايتىن 14 جوبا جۇزەگە اسىرىلۋدا. ونىڭ 7ء-ۋى ءبىلىم بەرۋ، 3ء-ۋى دەنساۋلىق ساقتاۋ سالاسىنا باعىتتالسا، قالعانى تۇرعىن ۇي-كوممۋنالدىق شارۋاشىلىق، ەكونوميكا، جولدار، قوعامدىق ءتارتىپ جانە قاۋىپسىزدىك سالاسىنا تيەسىلى.

– وبلىس بويىنشا بيزنەس باستاۋعا جالپى سوماسى 441،3 ملن. تەڭگەگە 188 جوباعا قارجىلاي قولداۋ كورسەتىلدى. 14 ساۋىرىندەگى جاعداي بويىنشا وڭىردە بارلىعى 216 اكك جۇمىس ىستەيدى، ونىڭ 8ء-ى ءسۇت ءوندىرۋ باعىتى بويىنشا، 168ء-ى سەلەكسيالىق باعىتتا، 31ء-ى بورداقىلاۋ،9-ى وسىمدىك شارۋاشىلىعى بويىنشا جۇمىس جاسايدى. كۇنى بۇگىن اكك-لەرگە مال بورداقىلاۋعا 2748،0 ملن. تەڭگە، انالىق ءىرى قارا مال ساتىپ الۋعا 988،3 ملن. تەڭگە نەسيە بەرىلدى. 2018 جىلى ءسۇت جيناۋ پۋنكتىن اشۋ، مال بورداقىلاۋ، اسىل تۇقىمدى مال باسىن ءوسىرۋ، مال سويۋ الاڭدارىن سالۋ، اۋىل شارۋاشىلىعى جانۋارلارىن ءوسىرۋ، جەم-شوپ تاسىمالدارىن ۇيىمداستىرۋعا كولىك قۇرالدارىن ساتىپ الۋ، ەت وڭدەۋ زاۋىتىن سالۋعا باعىتتالعان 11 اۋىل شارۋاشىلىعى كووپەراتيۆتەرىن قۇرۋ كوزدەلۋدە. بۇل باعىتتاعى جۇمىستارعا رەسپۋبليكالىق بيۋدجەتتەن 4014،0 ملن. تەڭگە ءبولىندى، – دەدى ساكەن كارين.

 گۇلىم اقاپ،

باتىس قازاقستان وبلىسى