باتىس قازاقستان وبلىس ورتالىعىنداعى قوعامدىق كولىكتىڭ ءبىرازى جاڭارماقشى. ماسەلەن، رەيسكە شىعاتىن اۆتوبۋستارى مەن تاسىمالدايتىن جولاۋشىلار سانى جاعىنان وزگەلەردەن وق بويى وزىق سانالاتىن  «ورالتەحسەرۆيس» سەرىكتەستىگىنىڭ مارشرۋتتا جۇرگەن اۆتوبۋستارىنىڭ 30 پايىزى سۋ جاڭا كەيىپتە كورەمىز.

اتالمىش كاسىپورىن 2001 جىلى ورال قالالىق اۆتوبۋس پاركى بازاسىندا قۇرىلعان بولاتىن. اۆتوپاركتەن قالعان قوعامدىق كولىكتەرمەن قىزمەت كورسەتۋدى باستادى. سەرىكتەستىك ديرەكتورى الەكساندر باكلاننىڭ سوزىنە قاراعاندا، «مۇراعا قالعان» اۆتوبۋستاردىڭ سانى كوپ بولعانىمەن، ساپاسى سىن كوتەرمەدى، ناقتىلاپ ايتقاندا، ءجيى سىندى، جاعارمايدى كوپ ىسىراپتادى، ياعني ولاردى قالپىنا كەلتىرىپ، مارشرۋتقا شىعارۋ ءۇشىن ءبىراز شىعىندانۋعا تۋرا كەلدى. بۇدان ءىستىڭ ونبەسىن كورگەن سوڭ 2004 جىلى وزدەرى ليزينگتىك نەگىزدە سۋ جاڭا 20 پاز اۆتوبۋسىن ساتىپ الىپ، №20 مارشرۋتقا قويدى. كەلەر جىلى گەرمانيادان جەتكىزىلگەن «مان»، «مەرسەدەس» سىندى 30 اۆتوبۋس №2 مارشرۋتتا جۇمىستارىن باستادى. كاسىپورىنداعى ۇلكەن جاڭارتۋ 2007 جىلى ءجۇردى. №2 مارشرۋتقا 30 «لياز» جانە ۇزارتىلعان 20 شاقتى «پاز» اۆتوبۋستارى كەلدى. وسىلايشا بىرتىندەپ كاسىپورىن ءوز تەحنيكاسىمەن قىزمەت كورسەتۋگە كوشتى. ءقازىر پارك تەڭگەرىمىندەگى 82 بىرلىك كولىكتىڭ ءبارى وزدەرىنىكى. بۇگىنگى تاڭدا ولار ءتورت قالالىق جانە ەكى ساياجايلىق مارشرۋتتارعا قىزمەت كورسەتۋدە.

– جەرگىلىكتى اقپارات قۇرالدارىندا اۆتوبۋس بيلەتىنىڭ باعاسى وسكەنىمەن قىزمەت ساپاسى ءالى دە سىن كوتەرمەيتىندىگى تۋراسىندا ماقالا-ماتەريالدار اراكىدىك جاريالانىپ ءجۇر. قالا تۇرعىندارىنىڭ جولاۋشىلار تاسىمالىمەن اينالىساتىن كومپانيالاردىڭ قىزمەتتەرىنە كوڭىلى تولمايتىندارى تۋرالى پىكىرلەرىن ورىنسىز دەمەيمىز. مەن ءوز كاسىپورنىم ءۇشىن جاۋاپ بەرسەم، ءبىز تۇرعىندارعا قولايلى جاعداي جاساۋ ءۇشىن بارىنشا جۇمىستانىپ جاتىرمىز. ماسەلەن، بىلتىر جىل باسىندا وتكەن وبلىس اكىمىنىڭ ەسەپ بەرۋ كەزدەسۋىندە ءبىر قالا تۇرعىنى كەيبىر قوعامدىق كولىكتەر قىستا سالقىن ءارى اۆتوبۋس ەدەنى تايعاق بولاتىنىن ايتقان ەدى. ال بىزدە مۇنداي كەمشىلىك ەشقاشان بولعان ەمەس. سەبەبى، مۇنىڭ ءبارىن قاداعالايتىن ارنايى ماماندارىمىز بار. اۆتوبۋستار كەشكە رەيستەن كەلگەن بويدا جۋىلىپ-تازارتىلىپ، جىلى عيماراتقا قويىلادى. ەگەر تەحنيكادا كىنارات بولسا، جوندەۋشىلەر بريگاداسى ونى قالىپقا كەلتىرەدى. وسىلايشا تازا، جىلى ءارى ەش اقاۋسىز اۆتوبۋس تۇرعىندارعا قىزمەت كورسەتۋگە شىعادى. ودان بولەك، تۇرعىنداردىڭ سۇرانىسىنا بايلانىستى كەيبىر مارشرۋتتارداعى اۆتوبۋستار سانىن ارتتىردىق. ماسەلەن، 30د اۆتوبۋستارىن ايتۋعا بولادى. بۇل بىزگە ءتيىمسىز بولسا دا، جەرگىلىكتى اتقارۋشى بيلىكتىڭ، حالىقتىڭ ۇسىنىس-تىلەگىن قابىل الىپ وتىرمىز.

350-گە جۋىق ادام ءوزىنىڭ ءناپاقاسىن تاۋىپ جۇرگەن «ورالتەحسەرۆيس» ج ش س – كوپ ۇلتتى ۇجىم. ءبارى دە ءتاتۋ-تاتتى، ىنتىماقتاسا جۇمىس ىستەپ، ەلىمىزدىڭ دامۋىنا ءوز ۇلەستەرىن قوسۋدا. سوعان وراي مۇندا مەملەكەتتىك، ۇلتتىق، كاسىبي مەرەكەلەردى تويلاۋ جولعا قويىلعان.

كاسىپورىننىڭ ەلىمىزدىڭ الەۋمەتتىك-ەكونوميكالىق دامۋىنا قوسىپ كەلە جاتقان ەڭبەگى مەملەكەت تاراپىنان دا باعالانباي قالىپ جاتقان جوق. اۆتوموبيل جانە جولاۋشىلار كولىگى سالاسىنداعى ەلەۋلى ەڭبەگى ءۇشىن سەرىكتەستىك ديرەكتورى «قازاقستان رەسپۋبليكاسىنىڭ قۇرمەتتى اۆتوموبيل جۇرگىزۋشىسى» اتاعىن الىپ، وڭىرىنە ءتۇرلى توسبەلگى، مەدالدار تاقتى. كاسىپورىننىڭ ءبىراز قىزمەتكەرلەرى ەل تاۋەلسىزدىگىنىڭ مەرەيتويلىق مەدالدارىمەن، ق ر كولىك جانە كوممۋنيكاسيا ءمينيسترىنىڭ، جەرگىلىكتى اتقارۋشى بيلىك قۇرىلىمدارىنىڭ قۇرمەت گراموتالارىمەن، العىس حاتتارىمەن ماراپاتتالعان.