بايدىبەك اۋدانى بورالداي اۋىلىندا «بورالدايدىڭ بوزتورعايى» اقىن ورىنباي تايمانوۆتىڭ 150 جىلدىعى اتالىپ ءوتتى. شارا ورىنباي تايمانوۆتىڭ كەسەنەسىندە قۇرباندىق شالىنىپ، قۇران وقۋمەن باستالدى. بۇل جايىندا Qamshy.kz اقپارات اگەنتتىگى بايدىبەك اۋدانىنىڭ باسپا ءسوز قىزمەتىنە سىلتەمە جاساپ حابارلايدى.
ودان كەيىن بورالداي اۋىلىنداعى «قاراتاۋ» مادەنيەت ۇيىندە جالعاسىپ، اۋدان اكىمى ب.تاناگوزوۆ كەلگەن قوناقتار مەن اۋدان تۇرعىندارىن قۇتتىقتادى. و.تايمانوۆتىڭ 150 جىلدىعىن اتاپ وتۋگە، كەسەنەنى قالپىنا كەلتىرۋگە ۇلەس قوسقان ءبىرقاتار ازاماتتاردى اقىننىڭ 150 جىلدىق مەدالىمەن جانە العىس حاتتارمەن ماراپاتتادى. جازۋشى-دراماتۋرگ، قازاقستاننىڭ ەڭبەك سىڭىرگەن قايراتكەرى، حالىقارالىق ادەبي «الاش» سىيلىعىنىڭ لاۋرەاتى ە.تۇرىسوۆ پەن قوعام قايراتكەرى، جازۋشى م.بايعۇت و.تايمانوۆتىڭ ولەڭدەرى، جىر-داستاندارى، ايتىستارى جيناقتالىپ، جارىق كورگەن كىتابىنىڭ لەنتاسىن سالتاناتتى تۇردە قيدى.
شارا رەسپۋبليكالىق اقىندار ايتىسىنا جالعاسىپ، ەلىمىزدىڭ استانا، جامبىل قىزىلوردا، سەمەي شىمكەنت قالالارى مەن بايدىبەك اۋدانىنان بارلىعى 10 اقىن قاتىستى.
ايتىستىڭ قورىتىندىسى بويىنشا باس جۇلدە اۆتوكولىكتى بايدىبەكتىك ءبىرجان بايتۋوۆ، ءبىرىنشى ورىندى الماتىلىق رينات زايىتوۆ، ەكىنشى ورىندى بايدىبەكتىك قاجىمۇقان ابزالوۆ، ءۇشىنشى ورىندى سەمەيلىك رۇستەم قايىرتاي يەلەندى. سونىمەن قاتار ايتىسكەر اقىندارىمىزعا اۋدان اكىمدىگى دايىنداعان اۋدان اكىمىنىڭ، گۇلسىم ادىلبەكوۆانىڭ، اباي اينابەكوۆتىڭ، امانباي قاناشايدىڭ، مانات قىزىنىڭ، اينابەك نىسانوۆتىڭ ارنايى جۇلدەلەرى مەن و.تايمانوۆقا 150 جىل مەدالى تابىس ەتىلدى.
ايتا كەتەيىك، 1991 جىلى ىرگەتاسى قالانىپ، اقىننىڭ كەسەنەسىنىڭ سوعىلۋىنا تىكەلەي باسشىلىق ەتكەن، ەلىمىزدىڭ قوعام قايراتكەرى، وڭتۇستىك قازاقستان وبلىسىنىڭ، بايدىبەك، سارىاعاش اۋداندارىنىڭ، جامبىل وبلىسىنىڭ شۋ اۋدانىنىڭ «قۇرمەتتى ازاماتى» و.اسانعازييەۆا اقىن و.تايمانوۆتىڭ 150 جىلدىعىنا بايلانىستى وتكەن رەسپۋبليكالىق اقىندار ايتىسىنىڭ قازىلار القاسىنا ءتوراعالىق ەتتى.
