وڭتۇستىك قازاقستان وبلىسى اكىمدىگىندە وبلىس اكىمى جانسەيىت تۇيمەبايەۆتىڭ توراعالىعىمەن وڭىردە ورنالاسقان ساۋدا ورىندار مەن بازارلاردى زاڭ تالابىنا ساي رەتتەۋ بويىنشا جيىن بولىپ ءوتتى. بۇل جايىندا Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى.

جيىندى اشقان ءوڭىر باسشىسى جالپى وبلىس بويىنشا 120 بازار مەن ساۋدا ورىندارى بار ەكەنىن ايتىپ، ونىڭ باسىم كوپشىلىگى ءتيىستى نورماتيۆتىك ستاندارتقا ساي كەلمەيتىنىن اتاپ ءوتتى.

«بۇگىنگى ءماجىلىس قازاقستان رەسپۋبليكاسى ۇكىمەتىنىڭ «ساۋدا قىزمەتىن رەتتەۋ تۋرالى» قازاقستان رەسپۋبليكاسى زاڭىنىڭ بازارلاردى تۇراقتى ساۋدا وبەكتىلەرىنە كوشىرۋ نورمالارىن قولدانىسقا ەنگىزۋ جونىندەگى تۇبەگەيلى شارالاردى قابىلداۋ» تۋرالى ارنايى تاپسىرماسىنىڭ ورىندالۋى بويىنشا وتكىزىلىپ وتىر. اتالعان تاپسىرمانى ورىنداۋ ءۇشىن، وبلىس ورتالىعىنداعى جانە اۋدان، قالالاردا ورنالاسقان ساۋدا ورىندارى مەن جالپى بازارلارداعى سانيتارلىق تالاپتاردى، كوممۋنالدىق شارۋاشىلىق، ساۋلەت-قۇرىلىس، زاڭسىز قۇرىلىس، جەردى ءوز بەتىنشە باسىپ الۋ، جەردى نىسانالى ماقساتىندا پايدالانباۋ، قاۋىپسىزدىك ەرەجەلەرىنىڭ ساقتالماۋى جانە باسقا دا وزەكتى ماسەلەلەر تالاپتارعا ساي ءوز شەشىمىن تابۋى ءتيىس»،-دەدى اكىم.  

كۇن تارتىبىندەگى ماسەلە بويىنشا ءسوز العان شىمكەنت قالاسى اكىمىنىڭ ورىنباسارى گۇلجان قۇرمانبەكوۆا قالاداعى 29 بازاردىڭ 15ء-ى باس جوسپارعا سايكەس كەلمەيتىنىن، ال 14 بازار قۇرىلىمداۋدى قاجەت ەتەتىنىن ءمالىم ەتتى. سونىمەن قاتار، ول شىمكەنت قالاسىنىڭ بولشەك ساۋدا كولەمى 329،1 ملرد. تەڭگەنى قۇرايتىنىن، ونىڭ 69 پايىزى شاعىن، ورتا جانە ءىرى ساۋدا كاسىپورىندارىندا، ال 31 پايىزى بازارلاردا جاسالعان ساۋدا كولەمى ەكەنىن ايتتى.

بۇدان بولەك، وقو تجد باستىعى ازاماتتىق قورعاۋ پولكوۆنيگى  نۇربولات دەربىسوۆ  وبلىس جانە شىمكەنت قالاسى اۋماعىنداعى ساۋدا نىساندارىنىڭ ءورت قاۋىپسىزدىگى جاعدايى تۋرالى بايانداما جاسادى.

ونىڭ ايتۋىنشا، باس پروكۋراتۋرا مەن ىشكى ىستەر ءمينيسترىنىڭ تاپسىرماسىنا سايكەس دەپارتامەنت قىزمەتكەرلەرىمەن وبلىس اۋماعىنداعى جوعارى تاۋەكەل دارەجەسىنە جاتقىزىلعان 106 ءىرى ويىن-ساۋىق ساۋدا ورتالىقتارىنىڭ 101-نە ءورت تەحنيكالىق تەكسەرۋلەر جۇرگىزىلگەن.

سونىمەن قاتار، ول تەكسەرۋ كەزىندە مەملكەتتىك ءورت باقىلاۋ ينسپەكتورلارىمەن وبەكتىنىڭ ەۆاكۋاسيالىق شىعۋ، ءورت ءسوندىرۋ اۆتوكولىكتەرىنىڭ عيماراتقا  جانە سۋ كوزدەرىنە جەتۋ جولدارىنا،  اۆتوماتتى دابىل قاققىش جانە ءسوندىرۋ قوندىرعىلارىنا، العاشقى ءورت ءسوندىرۋ جابدىقتارىنا، بازارلاردا ورتكە قارسى اراقاشىقتىقتارىنىڭ ساقتالۋىنا، وبەكت قىزمەتكەرلەرىنىڭ توتەنشە جاعداي جانە وقيعا كەزىندە ءىس ارەكەتتەرىنىڭ بىلىكتىلىگنە اسا نازار اۋدارىلعانىن اتاپ ءوتتى.

جيىندى قورىتىندىلاعان وبلىس باسشىسى بارلىق قۇزىرلى ورگاندار مەن جاۋاپتى سالا باسشىلارىنا بازار جۇمىستارىن رەتتەۋ باعىتىنداعى بارلىق زاڭدارمەن قارالعان قۇقىقتارىن ءوز دارەجەسىندە قولدانا وتىرىپ، بەلسەندى تۇردە جۇمىس جاساۋدى، ونداعى سانيتارلىق تالاپتىڭ ساقتالۋىن قاداعالاۋدى جانە بازار ماڭىنداعى اۆتوتۇراق ماسەلەسىن رەتتەۋدى تاپسىردى.