وڭتۇستىك قازاقستان وبلىسىنىڭ اكىمى ج.تۇيمەبايەۆتىڭ ءتوراعالىق ەتۋىمەن قالا قۇرىلىسى كەڭەسىنىڭ وتىرىسى ءوتتى. وندا شىمكەنت قالاسىندا ىسكە اسىرىلعالى جاتقان «Shymkent City» ىسكەرلىك جانە تۇرعىن ءۇي كەشەنىنىڭ جوباسى تالقىلاندى. ياعني، جاڭادان بوي كوتەرەتىن قالاشىقتىڭ كونسەپسياسىنا ءبىرقاتار وزگەرتۋلەر مەن تولىقتىرۋلار ەنگىزۋ جايى ءسوز بولدى.

جيىندا ايماق باسشىسى شىمكەنت قالاسىندا حالىق سانىنىڭ ءوسىمىن ەسكەرە وتىرىپ، «Shymkent City» جوباسىنىڭ كەيبىر تۇستارىن قايتا قاراپ شىعۋ كەرەك ەكەنىن ايتتى.

«ەلباسىنىڭ نازارىنداعى بۇل جوبانىڭ كەي تۇستارىنا تۇزەتۋلەر ەنگىزۋ كەرەك دەپ ويلايمىن. شىمكەنت ەلىمىزدەگى ءۇشىنشى مەگاپوليس بولعاندىقتان مۇندا دەموگرافيالىق ءوسىم قارقىندى. ال، بولشاقتا حالىق سانى ەسەلەپ ارتاتىنىن ەسكەرسەك، قالادا كولىكپەن ءجۇرىپ تۇرۋ ايتارلىقتاي ماسەلەگە اينالارى ءسوزسىز. سوندىقتان جاڭا قالاشىقتا اۆتوتۇراقتار جەتكىلىكتى بولۋىن، سونداي-اق كولىك تىعىنىن بولدىرماۋ جولدارىن قازىردەن ويلاۋ كەرەك. ءتيىستى سالا ماماندارىنا وسى ماسەلەنى قايتا قاراپ شىعۋدى تاپسىرامىن»، – دەدى جانسەيىت تۇيمەبايەۆ.

جيىنعا قاتىسقان جاۋاپتىلار ايماق باسشىسىنىڭ ۇسىنىستارىنا قولداۋ ءبىلدىرىپ، الدا اتقارىلاتىن شارۋالارىمەن تانىستىردى.

جوبا اۆتورلارى ۇسىنعان سوڭعى نۇسقا بويىنشا جالپى اۋماعى 65،5 گەكتاردى قۇرايتىن «Shymkent City» كەشەنىندە 6762 ورىنعا شاقتالعان اۆتۇراق بولادى دەپ جوسپارلاعان. جالپى سانى 5554 پاتەردى قۇرايتىن 18 قاباتقا دەيىنگى كوپ قاباتتى تۇرعىن ۇيلەر بوي كوتەرەدى. سونداي-اق، زاماناۋي ۇلگىدەگى ساۋلەتتى مەكتەپتەر، سپورت كەشەنى، ويىنساۋىق ورتالىقتارى جانە دە الەۋمەتتىك نىساندار سالىنادى.

ايتا كەتەيىك، «Shymkent City» قالاشىعى شاھاردىڭ سولتۇستىك ايماعىندا، بايدىبەك بي ەسكەرتكىشىنىڭ ماڭىندا سالىنۋدا. اۋدان زاماناۋي ينفراقۇرىلىمىمەن، تۇرمىستا، بيزنەستى باستاۋدا قولايلى جاعدايىمەن جانە ەڭ جوعارى قالا قۇرىلىسى مەن ساۋلەتى جاعىنان ەرەكشەلەنەدى. اتالعان جوبا شىمكەنتتىڭ 2020 جىلعا دەيىنگى دامۋ تۇجىرىمداماسى اياسىندا ىسكە اسىرىلۋدا.