بۇكىلالەمدىك مەيىربيكەلەر كۇنىنە وراي تالدىقورعان گارنيزونىنىڭ اسكەري گوسپيتالىندە مەديسينا قىزمەتكەرلەرى اراسىندا سايىس ءوتتى، دەپ حابارلايدى Qamshy.kz اقپارات اگەنتتىگى.
بەس مەيىربيكە مەن ءبىر مەداعا اراسىندا وتكەن تارتىس وڭاي بولعان جوق. سايىس شارتى بويىنشا ءار قاتىسۋشى ءوزىن تانىستىرۋدان باستاپ قىزمەتى بويىنشا تەوريالىق سۇراقتارعا جاۋاپ بەرىپ، ونى پراكتيكامەن ۇشتاستىردى.
گارنيزونعا قاراستى ءار اسكەري ءبولىمنىڭ مەيىربيكەسى اتالعان شارادا كاسىبي شەبەرلىكتەرىن كورسەتىپ، باقتارىن سىنادى. «دەنساۋلىققا پايدالى اس» تاقىرىبىندا تاعام ازىرلەدى، ءبىرى مونولوگ وقىسا، ەندى ءبىرى اۋەلەتە ءان شىرقادى.
- ورتا بۋىن مەديسينا قىزمەتكەرلەرىنە ارتىلعان جاۋاپكەرشىلىك زور. ادام ءومىرىن ساقتاپ قالۋدا العاشقى كومەك قولىن سوزاتىن دا سولار. سوندىقتان مەدبيكەلەردىڭ كاسىبي شەبەرلىكتەرىن شىڭداۋ، ولاردىڭ اراسىندا باسەكەلەستىكتى قالىپتاستىرۋ ماقساتىندا اتالعان سايىستى جىل سايىن ءداستۇرلى تۇردە ۇيىمداستىرىپ كەلەمىز، - دەپ اتاپ ءوتتى اسكەري گوسپيتالدىڭ باستىعى مەديسينا پودپولكوۆنيگى اسقار كولبايەۆ.
سايىس قورىتىندىسى بويىنشا ءبىرىنشى ورىندى اسكەري گوسپيتالدىڭ مەد اعاسى ارمان حاسانعالييەۆ يەلەنسە، ەكىنشى ورىنعا مەيىربيكە اكەركە بولەگەنوۆا لايىق دەپ تانىلدى. ال 18404 اسكەري ءبولىمىنىڭ مەيىربيكەسى مەرۋەرت كەريمجانوۆا ءۇشىنشى ورىننان كورىندى. بارلىق قاتىسۋشىلار العىس حات جانە باعالى سىيلىقتارمەن ماراپاتتالدى.
- بالا كەزىمنەن دارىگەر بولۋدى ارمانداپ ەدىم. جاركەنت قالاسىنداعى مەديسينا كوللەدجىن اياقتاعان سوڭ اسكەري گوسپيتالگە جۇمىسقا تۇردىم. وسى مەكەمەدە كاسىبيلىگىمدى ارتتىرىپ، تاجىريبە جيناپ كەلەمىن. بولاشاقتا جوعارعى وقۋ ورنىنا تاپسىرىپ، بىلىكتى دارىگەر بولۋدى ماقسات ەتىپ قويدىم، - دەدى سايىستىڭ جەڭىمپازى ارمان حاسانعالييەۆ.
تالدىقورعان گارنيزونىنىڭ اسكەري گوسپيتالى – قارۋلى كۇشتەرگە قاراستى ۇزدىك مەكەمەلەردىڭ ءبىرى. 45 جىلدان استام ۋاقىت بويى اسكەري قىزمەتشىلەر مەن ولاردىڭ وتباسى مۇشەلەرىنە ساپالى مەديسينالىق كومەك كورسەتىپ كەلەدى.
