«سيفرلى قازاقستان» مەملەكەتتىك باعدارلاماسى جانە «قازاقستاننىڭ كيەلى جەرلەرىنىڭ گەوگرافياسى» اياسىندا قىزىلوردا وبلىسى تاريحي-مادەني مۇراسىنىڭ 3D-فورماتتى ينتەراكتيۆتى كارتاسى جاساقتالماق. بۇل تۋرالى قىزىلوردا وبلىسىنىڭ اكىمى قىرىمبەك كوشەربايەۆ ورتالىق كوممۋنيكاسيالار قىزمەتىندە «رۋحاني جاڭعىرۋ» باعدارلاماسىنىڭ ايماقتا ورىندالۋ بارىسى تۋرالى وتكەن باسپا ءسوز كونفەرەنسياسىندا مالىمدەدى. 

ينتەراكتيۆتى كارتا 2018 جىلدىڭ اياعىنا دەيىن جاساقتالادى. ول رەسپۋبليكالىق جانە جەرگىلىكتى ماڭىزى بار 150 ەسكەرتكىشتى قامتيتىن بولادى. 

يۋنەسكو ۇيىمى بۇكىلالەمدىك مۇراسىنىڭ الدىن-الا تىزىمىنە وبلىستان 9 ەسكەرتكىش ەڭگىزىلدى: سىعاناق، جانكەنت، كەسكەن-كۇيىك، شىرىك-رابات، ءبابىش مولا، جەنت، بالاندى، جەتىاسار مادەنيەتىنىڭ ەسكەرتكىشتەرى مەن ساۋىسقاندىق پەتروگليفتەرى ەنىپ وتىر. 

ايماقتا «قازاقستاننىڭ كيەلى جەرلەرىنىڭ گەوگرافياسى» باعدارلاماسىنىڭ ءبىرىنشى كەزەڭى ىسكە استى. ونىڭ اياسىندا تىزىمگە 12 جالپىۇلتتىق جانە 35 وبلىستىق تاريحي-مادەني ەسكەرتكىش ەڭگىزىلدى. قازاق حاندىعىنىڭ تۇڭعىش استاناسى سىعاناق پەن جانكەنت، سورتوبە، جەنت، شىرىك-رابات پەن كەردەرى كەسەنەسىنىڭ ارحەولوگيالىق زەرتتەۋلەرى جۇرگىزىلدى. 

سونىمەن قاتار، وتاندىق جانە شەتەلدىك تۋريستەر قارماقشى اۋدانىنداعى قورقىت اتا مەموريالدىق كەشەنى مەن ەتنواۋىلعا ۇلكەن قىزىعۋشىلىق ءبىلدىرىپ جاتىر. ەستەرىڭىزگە سالا كەتەيىك، مەموريالدىق كەشەن 1980ء-شى جىلدارى تۇركى الەمىنىڭ ابىزى قورقىت اتانىڭ قۇرمەتىنە سالىنىپ، 2014 جىلى ق ر پرەزيدەنتى نۇرسۇلتان نازاربايەۆتىڭ تاپسىرماسىمەن نىساننىڭ تولىق رەكونسترۋكسياسى جاسالىپ، زيارات ەتۋ ورتالىعى سالىندى. كەشەن «باتىس ەۋروپا-باتىس جۇڭگو» حالىقارالىق اۆتوجولىنىڭ بويىندا ورنالاسقان، سوندىقتان كەلىپ جاتقان تۋريستەر اعىنى، اسىرەسە «ەكسپو-2017» كورمە جۇمىسىنىڭ اياسىندا، ۇنەمى ارتىپ كەلەدى.