سوتتان تىس تاتۋلاسۋ ورتالىعىن قۇرۋ ءۇشىن سىر ءوڭىرى پيلوتتىق ايماق رەتىندە تاڭدالىپ وتىر. بۇل تۋرالى قىزىلوردا وبلىسىنىڭ اكىمى قىرىمبەك كوشەربايەۆ ورتالىق كوممۋنيكاسيالار قىزمەتىندە «رۋحاني جاڭعىرۋ» باعدارلاماسىنىڭ ايماقتا ورىندالۋ بارىسى تۋرالى وتكەن باسپا ءسوز كونفەرەنسياسىندا مالىمدەدى.
جوبا ءساتتى جۇزەگە اسقان جاعدايدا قىزىلوردا وبلىسىنىڭ تاجىريبەسى بۇكىل رەسپۋبليكادا ەڭگىزىلمەك.
«ەلباسى ن.ءا.نازاربايەۆ داۋلاردى سوتتاردان تىس رەتتەۋ ينستيتۋتتارىن دامىتۋدى جالعاستىرۋ، ۇساق-تۇيەك ماسەلەلەر بويىنشا داۋلاردى شەشۋ سوتتاردان تىس تارتىپپەن جۇرگىزىلەتىندەي تەتىكتەر قاراستىرۋ جونىندە ناقتى تاپسىرمالار بەرگەن بولاتىن. وسىعان وراي، قازاقستان رەسپۋبليكاسىنىڭ جوعارعى سوتى «سوتسىز تاتۋلاسۋ ورتالىعىن» قۇرۋ جوباسى ۇسىنىپ وتىر جانە ونى جۇزەگە اسىرۋ ءۇشىن پيلوتتىق ايماق رەتىندە قىزىلوردا وبلىسى بەلگىلەندى. جاقسى تاجىريبەمىز دە از ەمەس. سونىڭ ءبىرى ن.ءىلياسوۆ اۋىلى قوعامدىق كەڭەسىنىڭ قۇرامىنداعى ارداگەر اقساقالدارى قولعا العان قىزمەتتى اتاپ ايتۋعا بولادى. مۇنداي تاجىريبەنى كەڭىنەن قولدانۋ قاجەت»، - دەدى ايماق باسشىسى.
ورتالىقتا مەدياتور، پسيحولوگ، داۋ-جانجالداردى شەشەتىن ماماندار جانە وزگە دە قىزمەتكەرلەر جۇمىس ىستەيتىن بولادى. مۇندا تاراپتار ءوز قالاۋىمەن كەلىسىمگە كەلە الادى.
