سىر دالاسىنىڭ تەرەڭ تاريحى، مادەنيەتى، ەكونوميكالىق جەتىستىگى قامتىلاتىن فوتوالبومدى كىتاپقا اقش پەن ەۋروپا ەلدەرىندەگى ارحيۆتەردەن سىر ءوڭىرىنىڭ تاريحي ورىندارى تۋرالى بۇرىن جاريالانباعان فوتودەرەكتەر ەنگىزىلمەك. بۇل تۋرالى قىزىلوردا وبلىسىنىڭ اكىمى قىرىمبەك كوشەربايەۆ ورتالىق كوممۋنيكاسيالار قىزمەتىندە "رۋحاني جاڭعىرۋ" باعدارلاماسىنىڭ ايماقتا ورىندالۋ بارىسى تۋرالى وتكەن باسپا ءسوز كونفەرەنسياسىندا مالىمدەدى.
البوم ءۇش تىلدە شىعارىلادى - قازاق، ورىس، اعىلشىن تىلدەرى.
«وسى جىلى ءوڭىرىمىزدىڭ تەرەڭ تاريحى، مادەنيەتى، ەكونوميكالىق جەتىستىگى قامتىلاتىن فوتوالبوم نەگىزىندە جاساقتالعان كىتاپ جارىق كورەدى. كىتاپقا اقش پەن ەۋروپا ەلدەرىندەگى ارحيۆتەردەن سىر ءوڭىرىنىڭ تاريحي ورىندارى تۋرالى بۇرىن ەش جەردە جاريالانباعان فوتودەرەكتەر ەنگىزىلمەك»،- دەدى قىرىمبەك كوشەربايەۆ.
سونىمەن بىرگە، «رۋحاني جاڭعىرۋ» باعدارلاماسى اياسىندا ايماقتا ورنالاسقان تاريحي-مادەني ەسكەرتكىشتەردىڭ تەلەاتلاسى جانە ايماق تاريحىنىڭ ەلەكتروندىق وقۋلىعى جارىق كورەدى. وسىندا ءومىر سۇرگەن تاريحي تۇلعالار، باتىرلاردىڭ ەرلىگى تۋرالى اڭىز-اڭگىمەلەر مەن جىراۋلاردىڭ قاناتتى سوزدەرى تۋرالى بەينەماتەريالدار ازىرلەنەدى.
سونداي-اق، ەڭبەك ادامىنىڭ شىنايى بەينەسى كورسەتىلەتىن «سىرىم مەنىڭ سىرلاسىم» جانە عارىش سالاسىنىڭ دامۋى تۋرالى «بايقوڭىر جانە كوسموس» كىتابىن ازىرلەۋ جوسپارلانۋدا.
