سىرداريانىڭ سول جاعالاۋىندا بۇرىنعى قازاق ورتالىق اتقارۋ كوميتەتى عيماراتىنىڭ سىزباسى بويىنشا قۇرىلىسى قايتا سالىندى، بۇل تۋرالى قىزىلوردا وبلىسىنىڭ اكىمى قىرىمبەك كوشەربايەۆ ورتالىق كوممۋنيكاسيالار قىزمەتىندە «رۋحاني جاڭعىرۋ» باعدارلاماسىنىڭ ايماقتا ورىندالۋ بارىسى تۋرالى وتكەن باسپا ءسوز كونفەرەنسياسىندا مالىمدەدى.
عيمارات ىشىندە رۋحاني جاڭعىرۋ ورتالىعى مەن مۇراجاي ورنالاساتىن بولادى. نىساننىڭ قۇرىلىسى تولىق اياقتالدى، جاقىن كۇندە ورتالىق پايدالانۋعا بەرىلەتىن بولادى.
«سىرداريانىڭ سول جاعالاۋىندا بۇرىنعى قازاق ورتالىق اتقارۋ كوميتەتى عيماراتىنىڭ سىزباسى بويىنشا رۋحاني جاڭعىرۋ ورتالىعىنىڭ قۇرىلىسى قايتا سالىندى. وندا 1925 جىلى ەتنوستى «قازاقتار» دەپ اتاۋ تۋرالى تاريحي شەشىم قابىلدانعان بولاتىن. جاڭا عيماراتتا رۋحاني جاڭعىرۋ ورتالىعى مەن مۇراجاي ورنالاستىرىلادى»، - دەدى ايماق باسشىسى.
ودان بولەك، سىرداريانىڭ سول جاعالاۋىندا جاستار رەسۋرستىق ورتالىعىنىڭ قۇرىلىسى جۇرگىزىلىپ جاتىر. اتاپ وتەيىك، بۇگىندە وبلىستا اۋىلدىق جەردەگى جاستارمەن جۇمىس ىستەيتىن 9 جاستار رەسۋرستىق ورتالىق جۇمىس ىستەيدى. ماسەلەن، ورتالىقتاردا شەت تىلدەرى مەن شەشەندىك شەبەرلىك كۋرستارى ۇيىمداستىرىلعان.
