وڭتۇستىك قازاقستاندا دەمالىس كۇندەرى جالپى وبلىستىق سەنبىلىك ءوتتى. وعان 45 مىڭنان استام ادام قاتىستى. تازالىق شاراسى بارىسىندا 22 مىڭ گەكتار اۋماق تازارتىلىپ، 54  مىڭعا جۋىق اعاش اكتەلدى.

وبلىس اۋماعىندا وتكەن سەنبىلىك سەرپىندى ءوتتى. ەرىكتى جاستار مەن ەلدى مەكەن تۇرعىندارى جانە مەملەكەتتىك ورگاننىڭ قىزمەتكەرلەرى بۇل كۇنى اۋلالار مەن دەمالىس ورىندارىن جانە كوشە بويلارىن قوقىستان تازارتىپ، اعاش ءتۇبىن قوپسىتىپ، اكتەۋ-سىرلاۋ جۇمىستارىن جۇرگىزدى.

وبلىس  اۋماعىن كورىكتەندىرۋ، سانيتارلىق تازالاۋ جانە كوگالداندىرۋ ماقساتىندا وتكىزىلگەن جالپى وبلىستىق سەنبىلىكتە ءبىرقاتار جۇمىستار اتقارىلدى. ماسەلەن، جەرگىلىكتى اكىمدىك بەرگەن مالىمەت بويىنشا وڭىردەگى 1050 شاقىرىم جول جيەكتەرى مەن جاياۋ جۇرگىنشىلەر جولدارى، 4 714 شاقىرىم يرريگاسيا جۇيەسى مەن 189 بالالار جانە سپورت الاڭشالارى، 59 گەكتار بولاتىن ساياباقتار مەن سكۆەرلەر، سونىمەن بىرگە 143 دانا ايالدامالار اكتەلىپ، سىرلانىپ تازالاندى. بۇل جۇمىستارعا 341 دانا تەحنيكا جۇمىلدىرىلدى.

تازا اۋا – جانعا داۋا. وسى  ۇستانىمدى ۇستانعان  وڭتۇستىكقازستاندىقتار كوكتەم ايىندا ۇيىمداستىرىلعان 12 سەنبىلىككە ءبىر كىسىدەي قاتىسىپ، تازالىق جۇمىستارىنا ءوز ۇلەستەرىن قوستى. بۇل جۇمىستار الداعى ۋاقىتتا جالعاسىن تاباتىنىن ايتقان وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى ۇيىمداستىرىلاتىن سەنبىلىكتەرگە بارلىق تۇرعىنداردى بىرىگىپ قاتىسۋعا شاقىرىپ، ەلدى مەكەندەر تازالىعىنا ءوز ۇلەستەرىن قوسۋدى ايتتى.